سألوا مرة الراحلة تيتة نبيلة شو نصيحتك بالحياة للصبايا والسيدات ؟!

ابتسمت بطريقة هادئة وجاوبت:

بدك تشتري بيت ؛ لاتحكي ..

بدك تروحي تنبسطي مع عيلتك وأهلك وأحبابك ؛ لاتحكي ..

عندك مشروع ؛ لا تحكي ..

مبسوطة بحياتك مع زوجك ؛ لا تحكي ..

مرتاحة بدراستك أو بشغلك وحياتك ؛ لا تحكي ..

أكتر أحلامنا بتبطل تتحقق من كتر الكلام فيها لهيك لا تحكي ..
ماعم نقول نسيء الظن بالكل .. مو كل الناس مناح ولاكلهن سيئين .. بس ماعاد نعرف المنيح من السيء ..
في ناس عندها حسد وغيرة بيكفي تهدم حلم غيرن والعين حق .. لهيك سكري تمك ولا تحكي ..

غالبية أصدقائك والمقربين بيحبو يشوفوكي بخير بس مو أحسن منهن ..

متل ماقلنا مابدنا نظلم الكل .. في ناس فعلا بتحبك وبتردلك الخير بس ماعاد نعرف المنيح من السيء ..👌اوك !!

صباح الخير

( طيارة السورية يلي بتروح على أوروبا ليش سموها أم شادي ؟!)

هي الطيارة الها قصة انو مالها ضمن اسطول طيران السورية انما مستأجرة من خطوط احدى الشركات الأجنبية لانه شروطها ومواصفاتها تنطبق ضمن معايير المطارات الاوروبية بقى من باب الطرفة في فقرة بمسلسل ( بقعة ضوء ) بتحكي عن شخص اسمه ( ابو شادي بين الأيادي) طبعاً أدى دور ابو شادي بين الأيادي الفنان ايمن رضا بيكون عنده مكتب مناسبات افراح وأتراح شغل عراضات شامية وسيف وترس وميزته من وين مادقيته بيرن على قولة أهل الشام بيفوت مع أبوه للعريس وبيطلع مع أمها للعروس يعني غسيل ودعك بقى لما جابو هي الطيارة على السورية كل ما بدهم يقدموا على وجهة أوروبية يقدموا بياناتها كونه هية الطيارة الوحيدة يلي ممكن يستقبلوها بمطارات أوروبا حتى طواقمها أجنبية الكباتن وفريق الضيافة على امستردام شغلوها وعلى المانيا قدمولها أوراقها كوبنهاجن وفيينا كمان بعتوها بقى اجى واحد بالمطار فن هل الفنة وقال هي متل ابو شادي بين الأيادي وين مابعته بيرجع غانم ومشي عليها الاسم ولقبوها ( الخانم ام شادي) على راحت ام شادي ورجعت ام شادي تخيلوا حتى لما نيموها بمطار كوبنهاجن يوم زيادة منشان يامنولها وقود اضطروا يأجلوا رح فينا لمدة 24 ساعة لحتى تشرف ( الخانم ام شادي) من كوبنهاغن وترجع تسافر على النمسا

بقى هي قصة ( الخانم ام شادي ) هي طيارة عليها شعار السورية بس ملكيتها لشركة ليتوانية وهذه هويتها:

🌹 طائرة Airbus A320-214 تابعة لشركة Heston Airlines الليتوانية، وذلك بنظام التأجير مع الطاقم (ACMI).

• الشركة المشغلة: Heston Airlines (ليتوانيا)
• نوع الطائرة: Airbus A320-214
• تسجيل الطائرة: LY-MAU

( عجبتكم قصة الخانم ام شادي)

( رجعت الزحمة على مطار دمشق اليوم ومدققين كتير على المونة السائلة)

😎 لاقنينة عصير حصرم ولا قطرميز مكدوس مزيت ولا دبس رمان ولا سمنة بلدية ومطربان معقود مشمش وأخواته من بقية الفواكي كل هاد ممنوووووع كتير مدققين بالتفتيش عند المغادرة

📌 رجعت الزحمة اليوم على مطار دمشق بعد يومين كانت حركة المسافرين فيه خفيفه وخاصة من بعد 10 صباحاً إلى 6 مساء

📌 اليوم غالبية الحجوزات عنا بخدمة ترحال مطار دمشق على سيارات الجيب والفانات العائلية بعكس اليومين الماضيين يلي كان الضغط مركز على فئة السيارات الميني

📌 طلعنا اليوم اول برنامجين توصيل 5 صباحاً وبعدين تنوعت المواعيد على برامج التوصيل والاستقبال على مراحل النهار وآخر برنامج استقبال نفذناه اليوم بخدمة ترحال مطار دمشق 6 مساء

🌹 الحمد لله نحنا بنتشرف اليوم خدمة ترحال مطار دمشق عدد مشتركينها من المحافظات السورية أعلى بكتير من دمشق وهاد دليل ثقة بنتشرف فيها

🌹 من فضل الله بتتصل أم من طرطوس بتطلب أنو السيارة تنتظر بنتها بكراج البولمان بالشام لتوصلها لمطار دمشق قال لأنه مابتأمن تبعتها الا معنا منشان يرتاح بالها ومأمنة هليها

🌹 كمان اليوم العم ابو باسل بعت بنته اليوم من اللاذقية بالبولمان واستقبلناها من كراج البولمان ووصلناها بالحفظ والصون إلى مطار دمشق

🌹 هاد غير حجوزات حمص وحماه وحلب ودرعا من فضل الله صارت خدمة ترحال مطار دمشق ضمن الخيار الأول لجميع مشتركين الخدمة في المحافظات وهاد شرف كبير النا

هاد كل شي لليوم تحياتنا للجميع والسلام عليكم ورحمه الله وبركاته

خدمة ترحال مطار دمشق 00963999213539

( ياصباح الخير منشان المواد الغذائية بمطار دمشق ياجماعة نحنا مالنا الشيف رمزي لحتى نحلل نوعية الأكل والشرب!)

📌 أول شيء يسعد صباحكم بكل خير في مشكلة بسيطة حابين نحكي عنها بنعاني منها كل ماننشر عن المسموح والممنوع فيما يخص المواد الغذائية للسفر عند المغادرة من مطار دمشق

📌 المطبخ السوري غني بتنوعه بالأكلات المختلفة والمشكلة التسمية لنفس الأكلة بين مدينة والتانية ممكن تختلف بقى الله يوفقكم خفوا علينا بالاسئلة نحنا نوهنا بشكل عام ولكن موضوع الاختصاص والله بدنا نعتذر منكم حقكم علينا

📌 يعني نحنا بنفهم بزيت الزيتون السمنة دبس الرمان عصير الحصرم مطربانات المربيات أو قطرميزات ( المعقود ) هدول الممنوعين وتوابعها

📌 أما أسماء الأكلات الغريبة يلي بتتصلوا لتسألونا عنها بخدمة ترحال مطار دمشق اذا مسموحة ولا ممنوعة مافينا نحكم عليها لانه مابنعرف مكوناتها وفي شغلات أول مرة بنسمع فيها بقى بدكم تعذرونا

📌 طبعاً كامل الاحترام والتقدير لكل مدينة سورية ومطبخها بالنهاية منشان مايتحور كلامنا غلط بالعكس هي تنوع ثقافات بيفتخر فيها كل انسان سوري

يعني امبارح اتصلت علينا مهندس مغترب بأفريقيا قلي انا بحط وقت اجازتي كل سنة بهاد الوقت منشان يصدف مع وقت مونة المكدوس الرجل ماعم يستوعب انو ممنوع المزيت خبرناه انو ياخده معه مجمد وبس يوصل هنيك بيضيف عليه زيت زيتون أول ينقل حجزه من مطار دمشق إلى مطار بيروت أو عمان منشان يحسن ياخد معه مكدوس مزيت

بقى شفتوا لوين وصلت معنا القصة انتقلنا من عملنا وراء الدركسيون إلى مجال الشيف رمزي لحتى نعطي حلول بديلة بطريقة تحضير المونة لتصير مطابقة للمعايير الخاصة بمطار دمشق ومطار حلب حتى تنقبل

حديث قبل النوم ( ذكرياتنا رغم وجعها بتضلها حلوة)

اليوم الصبحيات وصلت مدام مع اطفالها على مطار بيروت حملنا الشناتي بباكاج السيارة وحزمناهم وحشاكيل الأطفال مع التابات طلعناهم معنا بالسيارة لفت انتباهي مصنف اوراق سميك جايبته معها المدام مشينا بهل السيارة ولادها الله يسلمهن التهو بالتابات وانا ركبت اول وتوكلت على الله وصلت على جسر الزبداني والمدام ساكتة طول الطريق مافي الا تفتح هل المصنف وتتصفح يلي بقلبه أنا سمعان صوت خشخشة الأوراق بس ملتهي بالسواقة قبل مانوصل على السورية اتصلت اختها فيها وبلشت تدردش معها مالقيتها غير صارت تبكي المدام قلتلها صلي على النبي يا مدام الخير صاير شي والله انشغل بالي والله كنا رايقين اول ما طلعنا ماحكت شي نزلنا ختمنا بالسورية واللبنانية وكملنا درب طريقنا وصلت على الاستراحة نزلت جيب ضيافة للأطفيل ماشاء الله أوادم ومربايين وبيسمعوا الكلمة والمدام عابسة وصافنة كملنا طريقنا فكرت المشكلة مني أو مقصر بحقها قلتلها مدام عفواً في شي زاعجك مني بتصرفاتي أنا قصرت معك أو ارتكبت غلط منشان اعتذر منك أنا مابحب حدا يطلع معي ويكون زعلان مني الله يكرمك سامحيني على اي تقصير هوون ابتسمت المدام قال لا والله ما قصرت بس نزلت زيارة اسبوعين على الشام أنا وولادي وامبارح اخي اخدني على بيت أهلي يلي تهجرنا منه قبل 14 سنة منشان شوفه كيف صار دخلت عليه موصفيان فيه لاحيطان ولا سقوف كله مكسر بس دخلت على غرفتي ولقيت غراضي تحت الردم جلاءات المدرسة والمرحى والقصص يلي شاريتها كلها لما كنت بالمدرسة لاممتهم كلهم وحاطتهم بظرف مجلد قال اخدتهم معها منشان تراجعهم وهي بالطيارة قام فتحتهن بقلب السيارة المسكينة محروق قلبها على ذكرياتها وبيتها تبع الاهل يلي راح قلتلها لك بنتي الدايم الله هلأ صرتي أم وعندك اولاد الله يسلملك ياهن يلي فات مات صحيح الأسى مابينتسى بس الحياة بدها تمشي والحمد لله تحررنا انت معك حق تزعلي بس مابيصير ولادك يشوفوكي حزينة الله يرضى عليكي ضبي هل المصنف ولاتفتحيه هلأ انت على طريق سفر مو وقتها الله يكرمك انتبهي على ولادك وهلأ ابو العيال بيكون ناطركم بالمطار لحتى يستقبلكم ومشتقلكم لازم توصلوا لعنده مبسوطين عم تضحكوا وفرحانين ضحكت قال والله معك حق بس الواحد بيتأثر وبيزعل على ذكرياته ضحكت قلتلها يابنتي الحياة رحلة شايفة كرسي السيارة يلي قاعدة عليه كل يوم مع طلعة ضوء بيجلس نفس مكانك مسافر جديد عنده قصة وحكاية بتشبه حكايتك بالنهاية يلي مرق عليكي مرق على خيرك وفي غيرك مرق عليه قصة أقسى من حكايتك بقى حمدي الله على قدره ونصيبه والله يحميلك هل الشمعات ويسلمك لبيتك وزوجك ودعناهم والحمد لله وصلوا بخير وسلامه

قديش ذكرياتنا نحنا السوريين قاسية يلي مرق علينا 15 سنة شيء مابيتحمله العقل الله يحسن ختامنا يارب