በአውሮፓ ቀን የህፃናት ሩጫ የአዲስ አበባ ታዳጊዎች የአትሌቲክስ ሻምፕዮና ተካሔደ

የአዲስ አበባ አትሌቲክስ ፌደሬሽን የ16 ዓመች በታች የታዳጊዎች የአትሌቲክስ ሻምፕዮና በአውሮፓ የህፃናት ሩጫ ላይ ተካሔደ።

ዛሬ በኢትዮጵያ ስፖርት አካዳሚ በነበረው የአውሮፓ ቀን የህፃናት ሩጫ ውድድር ላይ ለመዝናናት ከተሳተፉት ህፃናት ባሻገር የፌደሬሽኑ የታዳጊዎች ውድድር ከፍተኛ ፉክክር የታየበት ነበር።

በውድድሩ በሁለቱም ፆታዎች ያሸነፉት ታዳጊዎች የማበረታቻ ሽልማት ከፌዴሬሽኑ ፕሬዝዳንት አትሌት መልካሙ ተገኝ እና በአውሮፓ ህብረት የኢትዮጵያ አምባሳደር ሶፊ ፍሮም-ኤመስበርግ ሽልማቶቻቸውን ተረክበዋል።

አምባሳደር ሶፊ በውድድሩ መክፈቻ ላይ ባደረጉት ንግግር “ከታላቁ ሩጫ በኢትዮጵያ ፣ ከትምህርት ቤቶችና ከማህበረሰቡ ጋር በመሆን ይህንን ዝግጅት በማድረጋችን እንዲሁም የቀጣዩ ትውልድ አትሌቶችን የምንፈጥርበት በመሆኑ ደስተኞች ነን” በማለት ተናግረዋል።

የአውሮፓ ህብረትና የኢትዮጵያ ወዳጅነትን 50ኛ ዓመት በተከበረበት የዛሬው የአውሮፓ ቀን ሩጫ ላይ ወደ 1800 የሚደርሱ ህፃናት የተሳተፉበት ነበር።

የ2017 ኢትዮ ቴሌኮም ታላቁ ሩጫ በቦቆጂ ግንቦት 17 ቀን ለ4ተኛ ጊዜ ይካሄዳል

ታላቁ ሩጫ ከቱሪዝም ሚኒስቴር ጋር በመተባበር እያዘጋጀው የሚገኘው የልወቅሽ ኢትዮጵያ ክላሲክስ (Discover Ethiopia Classics) የአራት ከተሞች ተከታታይ ውድድር ሶስተኛ የውድድር ከተማ ቦቆጂ ሆናለች።

የኢትዮቴሌኮም ታላቁ ቦቆጂ ሩጫ ግንቦት 17 እንደሚከናወን ዛሬ በቱሪዝም ሚኒስቴር በተሰጠ ጋዜጣዊ መግለጫ ላይ ይፋ ተደርጓል። በጋዜጣዊ መግለጫው ላይ የቱሪዝም ሚኒስቴር ሚኒስትር ደኤታ አቶ እንደገና አበበ፣ የባህልና ስፖርት ቱሪዝም ሚኒስቴር ደኤታ አቶ መኩዬ መሐመድ የተገኙ ሲሆን በተጨማሪም የበቆጂ ከተማ ምክትል ከንቲባ አቶ በዙ አበበ እና ሌሎችም ጥሪ የተደረገላቸው እንግዶች ተገኝተዋል ፤ ንግግርም አድርገዋል።

በመጨረሻም ለ3ተኛው ከተማ የልወቅሽ ኢትዮጵያ አዘጋጅ ቦቆጂ የአዘጋጅ ከተማ ልዩ ባንዲራና ቲሸርት በሁለቱ ሚኒስቴር ደኤታዎች ለቦቆጂ ምክትል ከንቲባ ተበርክቱዋል፡፡

በዝግጅቱ ላይ የዚህ ልወቅሽ ኢትዮጵያ ጠቀሜታ አጠር ባለ ጥናት የጅማን ተሞክሮ እንደ ምሳሌ በመውሰድ የቀረበ ሲሆን በዝርዝሩም የኢኮኖሚ ፣ የቱሪዝም ፍሰት እና የስፖርታዊ ግንኙነት ጥቅም ባጭሩ ቀርቧል፡፡

በአትሌቶች እና የጤና ሯጮች የ12 ኪ.ሜ. ውድድር ፣ የ16 ዓመት በታች የታዳጊዎች ሻምፒዮና እና የህፃናት የሩጫ ውድድሮች በኢትዮቴሌኮም ታላቁ ቦቆጂ ሩጫ ላይ የሚካሔዱ ውድድሮች ሲሆኑ ከአዲስ አበባ ለሚመጡ ተሳታፌዎች ምዝገባው እስከ ፊታችን እሁድ (ግንቦት 10 / 2017ዓ.ም.) የሚቀጥል እንደሆነም ታውቋል። ውድድሩ ከሩጫም በተጨማሪ በአርሲ ሰንሰለታማ ተራሮች ላይ የሚደረግ የእግር ጉዞን እና የካምፒንግ ፕሮግራምን ያካተተ እንደሚሆን ተገልዷል፡፡

ስዩም ድሪባ እና መሰረት ጣፋ የ2017 ኢትዮ ቴሌኮም ታላቁ የቦቆጂ ሩጫን አሸነፉ

አራተኛ አመቱን ያስቆጠረው የ2017 ኢትዮቴሌኮም ታላቁ የቦቆጂ ሩጫ ዛሬ መነሻና መድረሻውን በቦቆጂ ስታድየም በማድረግ ተከናውኗል።

በ12ኪ.ሜ. የአትሌቶች ፉክክር በወንዶች በግል የተወዳደረው ስዩም ድሪባ አሸናፊ ሲሆን አማን ቃዲ ሁለተኛ እንዲሁም ነጋሳ ደቀባ ሶስተኛ በመሆን ውድድራቸውን አጠናቀዋል። በሴቶች የጣፎ አትሌቲክስ ክለብ አትሌቷ መሰረት ጣፋ የአንደኝነቱን ቦታ ስታገኝ ደርቤ ተጫል እና ወርቄ አበጀ ተከታዮቹን ደረጃዎች ይዘዋል።

በዝግጅቱ ላይ የቱሪዝም ሚኒስቴር ሚኒስትር ሰላማዊት ካሳ ፣ ሚኒስትር ዲኤታ እንደገና አበበ (ዶ/ር) ፣ የአርሲ ዞን መስተዳደር አስተዳደር አቶ ኢብራሂም ከድር እንዲሁም የቦቆጂ ከተማ ከንቲባ አቶ በዙ አበበ እና ሌሎችም ከፍተኛ የመንግስት ኃላፊዎች ተገኝተዋል። በተጨማሪም በውድድሩ ላይ ለመሳተፍ ኢትዮጵያን ጨምሮ ከ13 የተለያዩ ሀገራት የተውጣጡ ፤ ወደ 75 የሚጠጉ ተሳታፊዎች ከአዲስ አበባ ወደ ቦቆጂ ተጉዘዋል።

በአርሲ አባቶች ባህላዊ ምርቃት የተጀመረው የዛሬው ውድድር ከአትሌቶች ጠንካራ ፉክክር ባሻገር የጤና ሯጮች የ12ኪ.ሜ. ውድድር ተከናውኖበታል። በውጤቱም በወንዶች ጃፈር ጀማል እንዲሁም በሴቶች ዴንማርካዊቷ ስቲነ ማርች አሸናፊ የሆኑበት ውጤት ተመዝግቧል።

ጠንካራ ፉክክር የታየበት የ15 ዓመት በታች የታዳጊዎች ሻምፕዮና የብዙ ተመልካቾችን ቀልብ የሳበ ውድድር ሲሆን ፤ የ2000ሜትር ርቀትን የሸፈነ ነበር። በተጨማሪም የ11 ዓመት በታች እና የህጻናት ውድድሮችም የዝግጅቱ ተጨማሪ ድምቀቶች ነበሩ።
የ'ልወቅሽ ኢትዮጵያ’ ተከታታይ ውድድር ቀጣይ እና የዚህ አመት የመጨረሻ መዳረሻ አርባምንጭ ከተማ ስትሆን ውድድሩ ሰኔ 22 ቀን 2017 ዓ.ም. ይደረጋል።