ការចុះពិនិត្យវឌ្ឍនភាព និងពង្រឹងគុណភាពសេវាសុខាភិបាល នៅមន្ទីរពេទ្យបង្អែកខេត្តកោះកុង។
——

ខេត្តកោះកុង៖ ថ្ងៃពុធ ទី១៤ ខែតុលា ឆ្នាំ២០២៦ ឯកឧត្តមសាស្ត្រាចារ្យ ថុង សុខហ៊ាន រដ្ឋលេខាធិការក្រសួងសុខាភិបាល បានអញ្ជើញចុះពិនិត្យវឌ្ឍនភាព និងស្វែងយល់អំពីបញ្ហាប្រឈម នៅមន្ទីរពេទ្យបង្អែកខេត្តកោះកុង។

ក្នុងឱកាសនោះ ឯកឧត្តមសាស្ត្រាចារ្យ បានកោតសរសើរ និងវាយតម្លៃខ្ពស់ចំពោះស្មារតីលះបង់ និងកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រី បុគ្គលិកសុខាភិបាលទាំងអស់ ដែលបានរៀបចំសោភ័ណ្ឌភាព បរិស្ថាន អនាម័យ ឯកសណ្ឋាន បដិសណ្ឋារកិច្ច​ និងការបម្រើសេវាពិនិត្យ ព្យាបាលជូនប្រជាពលរដ្ឋបានយ៉ាងល្អប្រសើរ។

ជាមួយគ្នានេះ ឯកឧត្តមសាស្ត្រាចារ្យ បានណែនាំឲ្យបន្តពង្រឹងបន្ថែមលើចំណុចមួយចំនួនរួមមាន៖
១.បន្តពង្រឹងគុណភាព និងសមត្ថភាពផ្នែកសង្គ្រោះបន្ទាន់ វះកាត់ និងអមវេជ្ជសាស្ត្រ
២.រៀបចំប្រព័ន្ធគ្រប់គ្រងឯកសារអ្នកជំងឺ និងរដ្ឋបាល ឱ្យបានកាន់តែល្អ
៣.គ្រប់គ្រងការប្រើប្រាស់ថវិកាអភិវឌ្ឍន៍មន្ទីរពេទ្យឲ្យមានតម្លាភាព និងប្រសិទ្ធភាពខ្ពស់។

ជាចុងក្រោយ ឯកឧត្តមសាស្ត្រាចារ្យ បានពាំនាំនូវប្រសាសន៍ផ្តាំផ្ញើសួរសុខទុក្ខ និងការថ្លែងអំណរគុណពី ឯកឧត្តមសាស្ត្រាចារ្យ រដ្ឋមន្ត្រី ជូនចំពោះមន្ត្រីសុខាភិបាលទាំងអស់ និងលើកទឹកចិត្តឲ្យបន្តខិតខំប្រឹងប្រែងដើម្បីលើកកម្ពស់សុខុមាលភាពប្រជាពលរដ្ឋឲ្យកាន់តែប្រសើរ។

🌐Website
📱Facebook
📱Telegram
📱X (twitter)
📱Tiktok
📱YouTube

កិច្ចប្រជុំជំនាញបច្ចេកទេសស្តីពី ការពិនិត្យ និងពិភាក្សាលើសេចក្តីព្រាងច្បាប់ស្តីពី «ភស្តុភារកម្ម»។
——

រាជធានីភ្នំពេញ៖ ចាប់ពីថ្ងៃទី១៣  ដល់ថ្ងៃទី១៤ ខែតុលា ឆ្នាំ២០២៦ ឯកឧត្តមវេជ្ជបណ្ឌិត ស៊ិក ប៊ុណ្ណា រដ្ឋលេខាធិការក្រសួងសុខាភិបាល បានដឹកនាំក្រុមការងារនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសម្អាង នៃក្រសួងសុខាភិបាល ចូលរួមក្នុងកិច្ចប្រជុំជំនាញបច្ចេកទេសដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពី «ភស្តុភារកម្ម» ដែលបានប្រព្រឹត្តទៅ នៅទីស្តីការគណ:រដ្ឋមន្ត្រី ក្រោមអធិបតីភាព ឯកឧត្តម លីវ សុវណ្ណា រដ្ឋលេខាធិការទីស្តីការគណ:រដ្ឋមន្ត្រី និងឯកឧត្តម នៅ បោនន័រ សហប្រធាន​ និងជាប្រធានក្រុមទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។

កិច្ចប្រជុំដ៏មានសារ:សំខាន់នេះ បានផ្តោតសំខាន់លើការពិនិត្យមើលខ្លឹមសារលម្អិតទាក់ទងនឹងវិស័យភស្តុភារកម្មក្នុងព្រះរាជាណាចក្រកម្ពុជា ដែលមានសារៈសំខាន់សម្រាប់វិស័យដឹកជញ្ជូនទំនិញនានាទាំងក្នុងប្រទេស និងតំបន់ ដើម្បីឆ្លើយតបទៅនឹងក្របខណ្ឌកិច្ចព្រមព្រៀងអាស៊ាន ស្តីពីការដឹកជញ្ជូនពហុរូបភាព និងកំណើន​សេដ្ឋកិច្ចជាតិ។

គួរបញ្ជាក់ផងដែរថា កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវរដ្ឋលេខាធិការ អនុរដ្ឋលេខាធិការ លោក លោកស្រី ជាតំណាងក្រសួង ស្ថាប័នពាក់ព័ន្ធ ព្រមទាំង ឯកឧត្តម លោកជំទាវ ជាថ្នាក់ដឹកនាំ មន្ត្រី និងក្រុមការងារ នៃទីស្តីការគណ:រដ្ឋមន្ត្រី។

🌐Website
📱Facebook
📱Telegram
📱X (twitter)
📱Tiktok
📱YouTube

ជំនួបពិភាក្សាការងារជាមួយគណៈប្រតិភូ Sharda University នៃសាធារណរដ្ឋឥណ្ឌា។
——

រាជធានីភ្នំពេញ៖ ថ្ងៃសុក្រ ទី១៦ ខែតុលា ឆ្នាំ២០២៦ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល បានជួបពិភាក្សាការងារជាមួយគណៈប្រតិភូ Sharda University នៃសាធារណរដ្ឋឥណ្ឌា ដើម្បីពង្រឹង និងពង្រីកកិច្ចសហប្រតិបត្តិការលើវិស័យសុខាភិបាល ជាពិសេសការអប់រំ ការបណ្តុះបណ្តាលធនធានមនុស្ស និងការចូលរួមសហការក្នុងការផ្តល់សេវាសុខាភិបាល នៅតាមមន្ទីរពេទ្យ។

ក្នុងឱកាសនេះ ឯកឧត្តមសាស្ត្រាចារ្យ រដ្ឋលេខាធិការ បានស្វាគមន៍គណៈប្រតិភូ និងបានលើកឡើងអំពីវឌ្ឍនភាព និងទិសដៅអាទិភាពរបស់វិស័យសុខាភិបាលកម្ពុជា ដែលផ្តោតលើការបង្ការជំងឺ ការរកឃើញជំងឺនៅដំណាក់កាលដំបូង ការពង្រឹងការថែទាំសុខភាពបឋម និងការលើកកម្ពស់គុណភាព និងសុវត្ថិភាពនៃសេវាសុខាភិបាល នៅតាមមណ្ឌលសុខភាព និងមន្ទីរពេទ្យបង្អែក ដើម្បីឆ្លើយតបនឹងតម្រូវការសុខភាពរបស់ប្រជាជន។

ភាគីទាំងពីរបានពិភាក្សាអំពីលទ្ធភាពសហការលើការបណ្តុះបណ្តាល និងអភិវឌ្ឍសមត្ថភាពបុគ្គលិកសុខាភិបាល ការផ្លាស់ប្តូរចំណេះដឹង និងបទពិសោធន៍វិជ្ជាជីវៈ ការស្រាវជ្រាវ និងការគាំទ្រផ្នែកបច្ចេកទេស ព្រមទាំងការចូលរួមសហការនៅតាមមន្ទីរពេទ្យ ដើម្បីពង្រឹងសមត្ថភាពការផ្តល់សេវាពិនិត្យ ព្យាបាល និងថែទាំអ្នកជំងឺឱ្យកាន់តែមានប្រសិទ្ធភាព។

ជាមួយគ្នានេះ តំណាងប្រតិភូ Sharda University បានបង្ហាញពីសក្តានុពល និងលទ្ធភាពក្នុងការចូលរួមគាំទ្រកិច្ចសហប្រតិបត្តិការ ជាមួយក្រសួងសុខាភិបាល តាមរយៈក្រុមវេជ្ជបណ្ឌិតឯកទេស និងអ្នកជំនាញសុខាភិបាល ដែលមានបទពិសោធន៍ ដើម្បីចូលរួមចែករំលែកចំណេះដឹង បណ្តុះបណ្តាលធនធានមនុស្ស និងពង្រឹងគុណភាពសេវាសុខាភិបាលនៅតាមមន្ទីរពេទ្យនានា។

ជំនួបនេះបានបង្ហាញពីឆន្ទៈរួម ក្នុងការបន្តពង្រឹងកិច្ចសហប្រតិបត្តិការរវាងកម្ពុជា និងសាធារណរដ្ឋឥណ្ឌា ជាពិសេសការភ្ជាប់ការអប់រំ ការអនុវត្តវិជ្ជាជីវៈ និងប្រព័ន្ធសុខាភិបាល ដើម្បីអភិវឌ្ឍធនធានមនុស្ស លើកកម្ពស់គុណភាពសេវាសុខាភិបាល និងរួមចំណែកកែលម្អសុខភាព និងសុខុមាលភាពរបស់ប្រជាជនកម្ពុជា។

ជំនួបពិភាក្សាការងារនេះ គឺជាជំហានដ៏សំខាន់ក្នុងការពង្រឹងកិច្ចសហប្រតិបត្តិការរវាងក្រសួងសុខាភិបាលកម្ពុជា និង Sharda University នៃសាធារណរដ្ឋឥណ្ឌា ដោយផ្តោតលើការអភិវឌ្ឍធនធានមនុស្ស ការបណ្តុះបណ្តាលជំនាញវិជ្ជាជីវៈ ការផ្លាស់ប្តូរបទពិសោធន៍ និងការចូលរួមគាំទ្រសេវាសុខាភិបាល នៅតាមមន្ទីរពេទ្យ។ កិច្ចសហប្រតិបត្តិការនេះដែរ មានសក្តានុពលក្នុងការរួមចំណែកពង្រឹងសមត្ថភាពបុគ្គលិកសុខាភិបាល លើកកម្ពស់គុណភាពសេវាពិនិត្យ និងព្យាបាល ព្រមទាំងពង្រីកលទ្ធភាពទទួលបានសេវាសុខាភិបាលប្រកបដោយគុណភាព និងសមធម៌ សំដៅរួមចំណែកដល់ការអភិវឌ្ឍប្រព័ន្ធសុខាភិបាលកម្ពុជាឱ្យកាន់តែរឹងមាំ និងការលើកកម្ពស់សុខភាព និងសុខុមាលភាពរបស់ប្រជាជនកម្ពុជា។

🌐Website
📱Facebook
📱Telegram
📱X (twitter)
📱Tiktok
📱YouTube