កិច្ចប្រជុំពិភាក្សាជាមួយក្រុមអ្នកជំនាញចិន ស្តីពីវឌ្ឍនភាព និងការកែលម្អប្លង់រចនាគម្រោងពង្រឹងសមត្ថភាពមន្ទីរពេទ្យបង្អែកខេត្តព្រះសីហនុ
——

រាជធានីភ្នំពេញ៖ នៅព្រឹកថ្ងៃសុក្រ ទី១៦ ខែតុលា ឆ្នាំ២០២៦ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងធ្វើឱ្យប្រសើរឡើងមន្ទីរពេទ្យបង្អែកខេត្តព្រះសីហនុ បានដឹកនាំកិច្ចប្រជុំពិភាក្សាជាមួយក្រុមអ្នកជំនាញចិននៃក្រុមហ៊ុន China IPPR International Engineering Co., Ltd. (IPPR) ដើម្បីពិនិត្យវឌ្ឍនភាព និងពិភាក្សាកែសម្រួលប្លង់រចនាគម្រោង ដែលជាជំនួយរបស់រដ្ឋាភិបាលសាធារណរដ្ឋប្រជាមានិតចិន ជូនរាជរដ្ឋាភិបាលកម្ពុជា។

កិច្ចប្រជុំនេះ តំណាងក្រុមអ្នកជំនាញចិនបានធ្វើបទបង្ហាញអំពីវឌ្ឍនភាពគម្រោង និងសំណើប្លង់រចនាថ្មី ដែលផ្តោតលើការរចនាឱ្យត្រូវទៅតាមសណ្ឋានដី កែលម្អទីតាំង ការរៀបចំច្រកចេញចូល និងប្រព័ន្ធចរាចរណ៍ក្នុងបរិវេណមន្ទីរពេទ្យ ការរក្សាដើមឈើធំៗ និងការបង្កើនលំហបៃតង។ ទន្ទឹមនេះ ភាគីចិនក៏បានបង្ហាញអំពីការរៀបចំមុខងារសេវាសុខាភិបាលក្នុងអគារថ្មី រួមមានផ្នែកពិគ្រោះជំងឺក្រៅ បន្ទប់វះកាត់ និងផ្នែកប្រពោធនកម្ម (ICU) ផ្នែកសេវារូបភាពវេជ្ជសាស្ត្រ និងសេវាគាំទ្រនានា។

លោកជំទាវរដ្ឋលេខាធិការ ក៏បានណែនាំឱ្យពិនិត្យលម្អិតលើហេដ្ឋារចនាសម្ព័ន្ធពាក់ព័ន្ធ ដើម្បីធានាឱ្យអគារថ្មី អាចគាំទ្រសេវាសុខាភិបាលប្រកបដោយប្រសិទ្ធភាព។

គម្រោងនេះឆ្លុះបញ្ចាំងពីកិច្ចសហប្រតិបត្តិការរវាងកម្ពុជា-ចិន ក្នុងការពង្រឹងហេដ្ឋារចនាសម្ព័ន្ធសុខាភិបាល និងលើកកម្ពស់សមត្ថភាពផ្តល់សេវាព្យាបាលជូនប្រជាពលរដ្ឋនៅខេត្តព្រះសីហនុ និងតំបន់ជុំវិញ។

កិច្ចប្រជុំនេះ មានការអញ្ជើញចូលរួមពី ឯកឧត្តមវេជ្ជបណ្ឌិត ស៊ុង វិនតៈ រដ្ឋលេខាធិការ និងជាប្រធានគ្រប់គ្រងគម្រោង ឯកឧត្តម លោក លោកស្រី តំណាងនាយកដ្ឋានសេវាសុខភាព នាយកដ្ឋានការពារសុខភាព នាយកដ្ឋានសហប្រតិបត្តិការអន្តរជាតិ នាយកដ្ឋានហិរញ្ញវត្ថុ អង្គភាពលទ្ធកម្ម វិទ្យាស្ថានជាតិសុខភាពសាធារណៈ នៃក្រសួងសុខាភិបាល តំណាងមន្ទីរសុខាភិបាលនៃរដ្ឋបាលខេត្តព្រះសីហនុ និងមន្ទីរពេទ្យបង្អែកខេត្តព្រះសីហនុ។

🌐 Website
📱 Facebook
📱 Telegram
📱 X (twitter)
📱 Tiktok
📱 YouTube