ពិធីជួបសំណេះសំណាលជាមួយនិស្សិតជ័យលាភីអាហារូបករណ៍រដ្ឋាភិបាលចិន សហភាពអឺរ៉ុប តួកគីយ៉េ រ៉ូម៉ានី ឆ្នាំសិក្សា២០២៦-២០២៧។
__

រាជធានីភ្នំពេញ៖ ព្រឹកថ្ងៃពុធ ទី១៤ ខែតុលា ឆ្នាំ២០២៦ ឯកឧត្តមសាស្រ្តាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល បានទទួលជួបសំណេះសំណាល ជាមួយនិស្សិតជ័យលាភីអាហារូបករណ៍រដ្ឋាភិបាលចិន សហភាពអឺរ៉ុប តួកគីយ៉េ រ៉ូម៉ានី ឆ្នាំសិក្សា២០២៦-២០២៧ ដឹកនាំដោយសហព័ន្ធនិស្សិតកម្ពុជានៅបរទេស សរុបចំនួន ១៨រូប នៅទីស្តីការក្រសួងសុខាភិបាល។

ក្នុងឱកាសជួបសំណេះសំណាលនេះ ឯកឧត្តមសាស្ត្រាចារ្យរដ្ឋលេខាធិការ អបអរសាទរចំពោះជ័យលាភីទាំងអស់ និងបានលើកឡើងថា មូលធនមនុស្សគឺជាអាទិភាព ជាការយកចិត្តទុកដាក់ របស់រាជរដ្ឋាភិបាលអាណត្តិមុនៗ និងរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិត និងភាពឆ្លាតវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ទន្ទឹមនឹងនេះ សុខភាពទាំងផ្លូវកាយ និងផ្លូវចិត្ត មានសារសំខាន់ណាស់ ដើម្បីឱ្យក្មួយៗជាជ័យលាភីអាហារូបករណ៍ ក្រេបជញ្ជក់ឱ្យបាននូវចំណេះអស់លទ្ធភាព ដើម្បីក្លាយខ្លួនជាមូលធនមនុស្ស ដែលមានសមត្ថភាព និងត្រឡប់មកវិញចូលរួមក្នុងការកសាងប្រទេសយើងឱ្យរុងរឿង និងសម្រេចនូវចក្ខុវិស័យ ឆ្នាំ២០៣០ និងឆ្នាំ២០៥០ របស់រាជរដ្ឋាភិបាល។

ឯកឧត្តមសាស្ត្រាចារ្យរដ្ឋលេខាធិការ ក៏បានជម្រាបជូនអំពីវឌ្ឍនភាពនៃវិស័យសុខាភិបាល ពិសេសការទប់ស្កាត់ការឆ្លងរីករាលដាលជំងឺកូវីដ-១៩ និងសារសំខាន់នៃភាពជាអ្នកដឹកនាំរបស់មន្ត្រីគ្រប់កម្រិត ព្រមទាំងវឌ្ឍនភាពរីកចម្រើនគ្រប់វិស័យនៃប្រទេសយើង ដែលបានមកពីសុខសន្តិភាព ដោយសារនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន។

ជ័យលាភីអាហារូបករណ៍ទាំងអស់ក៏ជាទូតសុច្ឆន្ទៈ ដើម្បីផ្សព្វផ្សាយអំពីអារ្យធម៌ វប្បធម៌របស់ប្រទេសកម្ពុជា ដែលមានយូរលង់ណាស់មកហើយ និងបង្ហាញពីសេចក្តីថ្លៃថ្នូរ ការគោរពវិន័យរបស់ប្រជាជនខ្មែរ ទៅលើឆាកអន្តរជាតិ។ ក្រោយការជួបសំណេះសំណាល តំណាងនិស្សិតជ័យលាភីទាំងអស់ បានប្តេជ្ញាខិតខំសិក្សារៀនសូត្រ ដើម្បីទទួលយកចំណេះដឹងថ្មីៗ និងត្រឡប់មកវិញចូលរួម ក្នុងការកសាងប្រទេសជាតិយើងឱ្យបានរីកចម្រើនរុងរឿង។

សូមបញ្ជាក់ផងដែរថា ការជួបសំណេះសំណាលនេះ មានការអញ្ជើញចូលរួមដោយ អគ្គនាយករងបច្ចេកទេសសុខាភិបាល អនុប្រធាននាយកដ្ឋានអភិវឌ្ឍន៍ធនធានមនុស្ស អនុប្រធាននាយកដ្ឋានសហប្រតិបត្តិការអន្តរជាតិ និងសាកលវិទ្យាធិការរង នៃសាកលវិទ្យាល័យវិទ្យាសាស្ត្រសុខាភិបាល។

🌐Website
📱Facebook
📱Telegram
📱X (twitter)
📱Tiktok
📱YouTube

រដ្ឋមន្រ្តីសុខាភិបាល៖ «សុខភាពល្អ គឺជាទ្រព្យសម្បត្តិដ៏មានតម្លៃបំផុតរបស់មនុស្ស និងគ្រួសារ។ ថ្ងៃនេះ យើងមិនត្រឹមតែផ្តល់សេវាពិនិត្យព្យាបាល និងវ៉ែនតាទេ ប៉ុន្តែយើងកំពុងផ្តល់ក្តីសង្ឃឹម ឱកាស និងភាពកក់ក្តៅជូនប្រជាពលរដ្ឋ។ គោលដៅរបស់យើង គឺឱ្យប្រជាពលរដ្ឋមានសុខភាពល្អ មើលឃើញច្បាស់ រស់នៅដោយសេចក្តីថ្លៃថ្នូរ។»
__________

នាព្រឹកថ្ងៃសៅរ៍ ទី១៧ ខែតុលា ឆ្នាំ២០២៦ ពិធីចុះពិនិត្យជំងឺទូទៅ សុខភាពភ្នែក និងចែកវ៉ែនតា ជូនប្រជាពលរដ្ឋ ដែលរៀបចំឡើងនៅសាលាបឋមសិក្សាភ្នំពេញថ្មី ដឹកនាំដោយ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល។ ពិធីនេះមានការចូលរួម ឯកឧត្តមសាស្ត្រាចារ្យ ម៉ម ប៊ុនហេង តំណាងរាស្រ្តមណ្ឌលរាជធានីភ្នំពេញ និងក្រុមគ្រូពេទ្យស្ម័គ្រចិត្ត សម្តេចអគ្គមហាសេនាបតីតេជោ ហ៊ុន សែន មកពីគ្រប់បណ្តាមន្ទីរពេទ្យជាតិ រដ្ឋបាលខណ្ឌសែនសុខ និងមូលនិធិ Fred Hollows ដែលបង្ហាញពីការចូលរួមយ៉ាងសកម្ម ក្នុងការលើកកម្ពស់សុខុមាលភាពប្រជាពលរដ្ឋ។

ឯកឧត្តមសាស្រ្តាចារ្យរដ្ឋមន្រ្តី បានលើកឡើងថា «ការនាំសេវាសុខាភិបាលទៅជិតប្រជាពលរដ្ឋ គឺជាការប្រែក្លាយគោលនយោបាយទៅជាផលប្រយោជន៍ជាក់ស្តែងសម្រាប់ប្រជាពលរដ្ឋ។ ការជួយឱ្យមនុស្សម្នាក់មើលឃើញវិញ គឺជាការផ្តល់ឱកាសថ្មីដល់ជីវិតរបស់គាត់។ យើងមិនវាស់សមិទ្ធផលត្រឹមចំនួនអ្នកបានពិនិត្យទេ ប៉ុន្តែវាស់តាមគុណភាពសេវា និងការផ្លាស់ប្តូរជីវិតប្រជាពលរដ្ឋ។ សុខាភិបាលល្អ មិនមែនរង់ចាំតែអ្នកជំងឺមករកយើងទេ ប៉ុន្តែត្រូវខិតខំទៅរកអ្នកដែលត្រូវការសេវា។ ការបង្ការជំងឺ និងការរកឃើញទាន់ពេល គឺជាការវិនិយោគលើសុខភាព គ្រួសារ និងអនាគតប្រទេសជាតិ»។

ការចុះពិនិត្យសុខភាពនាពេលនេះ ក្រោមការយកចិត្តទុកដាក់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ចំពោះសុខុមាលភាពរបស់ប្រជាពលរដ្ឋ។

ក្នុងឱកាសសំណេះសំណាលនេះ ឯកឧត្តមសាស្រ្តាចារ្យរដ្ឋមន្រ្តី សូមលើកទឹកចិត្តប្រជាពលរដ្ឋ ក្នុងការលើកកម្ពស់សុខភាពទូទៅ និងសុខភាពភ្នែកទទួលបានលទ្ធផលល្អប្រសើរ ដោយ៖ ១) ត្រូវយកចិត្តទុកដាក់ពិនិត្យសុខភាពទូទៅ និងសុខភាពភ្នែក ជាពិសេសអ្នកមានទឹកនោមផ្អែម និងលើសសម្ពាធឈាម។ ២) ត្រូវថែរក្សាសុខភាពទូទៅ តាមរយៈការរស់នៅប្រកបដោយអនាម័យ របបអាហារមានតុល្យភាព ហាត់ប្រាណឱ្យបានទៀងទាត់ និងសម្រាកឱ្យបានគ្រប់គ្រាន់។ ៣) ការពារសុខភាពភ្នែក ដោយរបបអាហារ របៀបរស់នៅ អនាម័យភ្នែក និងត្រូវទទួលការពិនិត្យតាមដានបន្ត ប្រសិនបើមានការប្រែប្រួលគំហើញ។

សូមជម្រាបជូនថា ប្រជាពលរដ្ឋអញ្ជើញមកទទួលសេវាពិនិត្យសុខភាពភ្នែក ផ្តល់វ៉ែនតា និងសុខភាពទូទៅ សរុបចំនួន ៩២០៥ករណី ក្នុងនោះមាន ផ្នែកសម្ភព, ផ្នែករោគស្រ្តី, ផ្នែកជំងឺទារក កុមារ, ផ្នែកត្រចៀក ច្រមុះ បំពង់ក និងចក្ខុរោគ, ផ្នែករូបភាពវេជ្ជសាស្រ្ត, ផ្នែកជំងឺបេះដូង, ផ្នែកជំងឺថ្លើម ក្រពះ ពោះវៀន, ផ្នែកវះកាត់ប្រព័ន្ធប្រសាទ, ផ្នែកជំងឺទូទៅ, ផ្នែករោគកុមារ, ផ្នែកសុខភាពមាត់ធ្មេញ, ផ្នែកវះកាត់តូច និងធំ ក្នុងករណីតម្រូវការវះកាត់នឹងបញ្ជូនវះកាត់បន្តនៅមន្ទីរពេទ្យជាតិ។

🌐Website
📱Facebook
📱Telegram
📱X (twitter)
📱Tiktok
📱YouTube