خلال آخر 12 شهر وصل حجم الإنفاق على شراء الأراضي الافتراضية في مشاريع الميتافيرس إلى 2 مليار دولار 😯
احتلت مشاريع Voxels | Sandbox | Decentraland صدارة قائمة أكثر الأراضي المباعة.
قامت الكثير من كبرى العلامات التجارية حول العالم مثل Samsung - Ubisoft - Adidas - Atari - Gucci بشراء أراضي على هذه المشاريع لإنشاء متاجر افتراضية.
اشتريت أراضي في الميتافيرس ولا ناوي تعمل زي جدك؟

تاريخ ثعباني شوية..

إدارة تويتر بعد ما فصلت 50% من الموظفين بتوعها اكتشفت إنهم محتاجين موظفين كتير من اللي اتفصلوا.. ودلوقتي عايزينهم يرجعوا تاني 🤡

لعبة Warhammer: Vermintide 2 متاحة مجانا على ستيم.
اللعبة ممتازة وتقدر تضيفها دلوقتي وهتفضل في حسابك للأبد.

يعتبر المعااج أهم مكونات الكمبيوتر التي يجب اختيارها بعناية، ولكن مع كثرة المصطلحات التقنية مثل الأنوية، المسارات، التردد، كسر السرعة، الكاش وغيرها من المصطلحات قد يصبح من الصعب على المستخدم العادي اختيار المعالج بشكل صحيح.
في هذا المقال سنتعرف على المعالجات وخصائصها بشكل مبسط، مع شرح لكافة المصطلحات الهامة عنها وتأثيرها في أداء المعالج 👇
https://bit.ly/2Z5z47H

شركة ميتا تقرر تسريح آلاف الموظفين، وحسب تقرير WSJ هتكون أكبر عملية تسريح في تاريخ الشركة.
سهم META هبط أكثر من 70% خلال العام الحالي، وهو أسوء أداء لسهم في مؤشر S&P 500 (مؤشر يضم أسهم أكبر 500 شركة مالية أمريكية).
ليشع ده لو فضل مصمم على الميتافيرس بتاعه ده الشركة هتيجب درفها..

وبخني..

مارك زوكربيرج يؤكد خطط شركة ميتا بتسريح آلاف الموظفين بسبب الوضع المالي السيء للشركة.
الشهر اللي فات شركة ميتا خسرت 80 مليار دولار من قيمتها السوقية بعد الإعلان عن نتائجها المالية المخيبة في الربع التالت من 2022.. وخلال العام الحالي فقط خسرت الشركة 70% من قيمتها السوقية كأسوء أداء لأكبر 500 شركة تقنية.
مارك في خطابه للتنفيذين داخل الشركة قال إنه يتحمل مسئولية عملية التسريح الضخمة اللي هتحصل بسبب "التفاؤل المفرط" حول مستقبل الشركة واللي أدى إلى زيادة التوظيف بطريقة مبالغ فيها.

النهاردة شركة ميتا فصلت 11 ألف شخص دفعة واحدة 😑

الفترة اللي فاتت كان فيه مظاهرات كبيرة في الصين ضد الحكومة بعد ما عدد من البنوك وقفت سحب الأرصدة ومنعت العملاء من الحصول على أموالهم.
المتظاهرين كانوا بيستخدموا ميزة في الآيفون اسمها AirDrop عشان يشاركوا فيديوهات وصور التظاهر بشكل آمن وعشوائي، لأن فيه خيار إرسال واستقبال الملفات من أي شخص في محيط الموبايل.
النهاردة شركة آبل بعتت تحديث مخصوص للمستخدمين في الصين فقط عشان تخلي الميزة دي متاحة لمدة 10 دقائق فقط، وبعد كدة هيتم وقف إمكانية استقبال الملفات من "أي شخص" ولازم يكون اللي هتشارك مع الملفات في جهات الاتصال على الموبايل.
طبعا حاجة زي كدة هتخلي مشاركة الملفات بشكل مخفي لعدد من المستخدمين "مناسب في الحالات دي" شيء شبه مستحيل.
شركة آبل رفضت تعلق على علاقة التحديث ده بالمظاهرات الأخيرة في الصين، وقالت إن التحديث ده ممكن يتم إرساله لدول تانية بعد كدة.

بقالنا سنين بنطالب بفك الحجب عن موقع Medium في مصر بدون أي استجابة..
أول ما الأجانب وصلوا مصر عشان قمة المناخ واشتكوا من حجب الموقع بقدرة قادر الحجب اتفك !
وهي دي مصر باختصار...

امبارح تم الإفصاح عن ثغرة موجودة في جميع هواتف جوجل بيكسل بتسمح لأي شخص عنده وصول مادي للموبايل إنه يتجاوز قفل الشاشة.
خطوات الثغرة كانت بتعتمد على التالي:
▪️ إدخال معلومات إلغاء القفل (زي الكود أو البصمة) 3 مرات غلط
▪️ تبديل الشريحة اللي في الموبايل بشريحة تانية
▪️ إدخال كود الـ PIN الخاص بالشريحة 3 مرات غلط
▪️إدخال الـ PUC بشكل صحيح
▪️ تعيين كود PIN جديد للشريحة
تم فك قفل الشاشة وأصبح المخترق داخل الموبايل يقدر يشوف جميع الملفات اللي عليه.
التقرير ذكر كذلك إن الثغرة غالبا موجودة في بعض أجهزة الأندرويد الخاصة بشركات تانية.
حسب تقرير الباحث الأمني فتعامل شركة جوجل مع الثغرة برغم خطورتها كان تعامل غير احترافي. الثغرة تم الإبلاغ عنها في شهر يونيو وتم إصدار إصلاح ليها في في 5 نوفمبر !!!
جوجل كمان رفضت قبول الثغرة أكتر من مرة، والباحث قدر يقنعهم بالثغرة من خلال مقابلة بعض المسئولين في الشركة في أحد مؤتمرات صيد الثغرات.
بعد قبول الثغرة تم منح الباحث مكافأة 70 ألف دولار.

بعد فصل 11 ألف موظف.. شركة ميتا قالت للموظفين إنهم هيشاركوا بعض في المكاتب عشان الشركة تقلل المصاريف 🙂

الذهب 🪙 🚀
أموالك في البنك خسرانة مهما زاد عددها
احتفظ بالذهب ولا تحتفظ بالكاش
ده لو لسه حد معاه كاش يعني..

أسعار الذهب محليا بترتفع حتى لو الذهب بينخفض لأن عملتك قيمتها بتقل باستمرار + إنعدام الرقابة على الأسواق.
دي طريقة سهلة بعتمد عليها في شراء الذهب أون لاين بسعر السوق العالمي 👇
https://youtu.be/j4YnOqo5p4c

الأسبوع اللي فات فريق عمليات مشتركة من مكتب التحقيقات الفيدرالي FBI والقوات الجوية الأمريكية هاجموا منزل مؤسس موقع Dreamland Resort.
موقع Dreamland Resort هو موقع متخصص في تتبع أنشطة المنطقة 51 في ولاية نيفادا، ودي عبارة عن قاعدة للقوات الجوية، لكن المكان ده تحديدا منتشر حوله نظريات مؤامرة كتير في أمريكا.
أشهر نظريات المؤامرة حول المنطقة دي إنها بتستخدم لإجراء تجارب شديدة السرية، وبيتم فيها فحص مركبات الفضائيين اللي بينزلوا الأرض، وبعض السكان حول المنطقة أبلغوا عن رؤية أجسام غريبة في موقع القاعدة.
مؤسس موقع Dreamland Resort بيراقب المنطقة 51 من سنة 1999، وبينشر على الموقع أي تحديثات أو نشاطات في المنطقة، ويعتبر أنشط مجتمع أون لاين للمهووسيين بقصص ونظريات المؤامرة.
الهجوم غير معروف سببه الرئيسي حتى الآن، وهل الموقع نشر حاجة سرية كان مينفعش نشرها؟
المؤسس ذكر إنه تم مصادرة كل الأجهزة الإلكترونية في المنزل من موبايلات وأجهزة كمبيوتر وكاميرات ودرونز.
في سنة 2019 شاب أنشأ حدث Storm Area 51 على فيسبوك لاقتحام المنطقة 51، والحدث انتشر بشكل فيروسي وكان منضم ليه 1.5 مليون شخص، ولكن تم إلغاءه بسبب الخوف على حياة المشاركين أثناء الاقتحام.

إيلون ماسك النهاردة فصل 4,400 متعاقد مع تويتر، بعد أقل من أسبوع من فصله 3,700 موظف.
تويتر بقى فوضى.. وشركات كتير وقفت الإعلانات على الموقع بسبب تخوفات من إدارة المحتوى على المنصة، وعدم وجود عدد كافي من الموظفين لمنع انتشار المحتوى المخالف.
تويتر بيخسر يوميا حوالي 4 مليون دولار والخسارة هتزيد مع وقف شركات كبيرة إعلاناتها على المنصة، وماسك بيحاول يعوض الخسارة دي من خلال طرد الموظفين (اللي هو أصلا من أسباب المشكلة) وبيع علامة التحقق باشتراك شهري 8$ واللي بردو تم وقفها بعد ما تم استغلال الميزة لإنشاء حسابات وهمية لشركات كبيرة واستخدامها في الاحتيال.
هو تقريبا كان دخل الشركة بحوض كإشارة منه إنه ناوي يغرق الشركة..

فيسبوك لجأت لشركة مشبوهة لحذف إضافة FB.Purity من متجر جوجل كروم.
الإضافة دي كنت سبق ونشرت عنها قبل كدة وهي بتحسن كتير من استخدام الموقع وبتسمح بإخفاء الإعلانات والريلز ومنشورات التطبيقات والألعاب وأي منشور فيه كلمة معينة.. وبتخلي التايم لاين أفضل بكتير..
فيسبوك كل شهر تقريبا يغير في كود الموقع عشان يعطل الإضافة والطرق اللي بتعتمد عليها لإخفاء المحتوى، وكل مرة مطور الإضافة ينجح إن يلاقي حل.
آخر حاجة لجأتلها فيسبوك هي استخدام شركة سيئة السمعة اسمها AppDetex متخصصة في القضاء على أي أدوات أو تطبيقات بيعملها مطورين لتحسين استخدام مواقع معينة بحجة انتهاك العلامة التجارية للموقع. ( بالمناسبة رمز FB اختصار Fluff Busting مش Facebook).
المطورين اللي بيعملوا الحاجات دي بيعملوها غالبا بشكل مجاني في وقت فراغهم، والنزاعات اللي زي دي بتحتاج حد عنده خلفية قانونية أو عنده تمويل كافي للاستعانة بشركة محاماة.. وطبعا المطورين لا عندهم لا ده ولا ده.. والموضوع بينتهي بوقف المنتج تماما زي ما حصل مع تطبيق فانسد.
الشركات بدل ما تركز على تحسين منتجاتها وتطويره وتشوف إيه المشاكل اللي المستخدمين بيشتكوا منها وتعالجها.. بتركز على القضاء على أي مجهود يحاول يحسن تجربة المستخدم للمنتج..
حاجة منتهى التخلف

شركة أمازون تخطط لتسريح 10,000 موظف هذا الأسبوع. (أكبر عملية تسريح في تاريخها).
شركة فيسبوك قامت بتسريح 11 ألف موظف. (أكبر عملية تسريح في تاريخها).
شركة تويتر قامت بتسريح 7700 موظف ومتعاقد. (أكبر عملية تسريح في تاريخها).
الشركات دي قيمتها مليارات الدولارات، وشركة زي أمازون مثلا قيمتها تريليون دولار، وصافي ربح الشركة في الربع التالت كان 2.9 مليار دولار، وأول حاجة بيفكروا فيها لتخفيض النفقات هي طرد الموظفين..