Prezident: Qoraqalpogʻistonda yoshlarni zamonaviy kasblarga yoʻnaltirishga alohida eʼtibor qaratiladi

Prezident Shavkat Mirziyoyev raisligida Nukus shahrida Qoraqalpog‘istonni ijtimoiy-iqtisodiy rivojlantirish masalalariga bag‘ishlangan yig‘ilish bo‘lib o‘tdi.

Yigʻilishda yoshlarni zamonaviy kasblarga yoʻnaltirish, ularga mehnat bozori talablariga mos bilim va koʻnikmalar berish, texnik taʼlim sifatini oshirish boʻyicha muhim vazifalar belgilandi.

Xususan, bir yilda 1 ming, kelgusi ikki yilda yana 5 ming yoshni axborot texnologiyalari va logistika sohasida yuqori daromadli ish bilan taʼminlash vazifasi qoʻyildi.

Shuningdek, olis hududlardagi yoshlarga axborot texnologiyalarini oʻrgatish uchun kamida 10 nafar iqtidorli vatandoshni jalb etib, tegishli loyihalarni amalga oshirish topshirildi.

Texnik taʼlimda xalqaro tajribani kengaytirishga ham alohida eʼtibor qaratildi.

Bugungi kunda Nukus shahridagi 1-son texnikumda “Pearson BTEC” xalqaro dasturi joriy etilgan boʻlib, uni tamomlagan yoshlarga 70 ta davlatda tan olinadigan kasb sertifikati beriladi.

Prezident ushbu tajribani kengaytirish vazifasini belgilab, yangi oʻquv yilidan Amudaryo, Beruniy, Chimboy va Qoʻngʻirot tumanlaridagi bittadan texnikumda “Pearson BTEC” xalqaro dasturini yoʻlga qoʻyishni topshirdi.

Shu bilan birga, yoshlarning amaliy koʻnikmalarini rivojlantirish maqsadida 1-oktyabrdan asbob-uskuna xaridi uchun beriladigan ssuda miqdori 20 million soʻmdan 50 million soʻmga oshiriladi. “Usta-shogird” asosida kasb oʻrganish xarajatlarini qoplashda yosh chegarasi 30 yoshdan 40 yoshga koʻtariladi.

Taxtako‘pirda Shinjon tajribasi asosida ozuqa yetishtirish tashkil etilib, xorijdan 5 ming bosh qo‘y-echki olib kelinadi. “Kegeyli naslli parranda” korxonasi quvvatini 2-3 karra oshirib, xoldingga aylantirish, texnikumda parrandachilik kurslari ochish topshirildi.

Kelgusi bahordan Nukus tumanidagi 10 ming gektarda qovun yetishtirish boshlanadi. Ispaniya, AQSh, Niderlandiya va Xitoydan eng yaxshi navlar va mutaxassislar jalb etilib, qayta ishlash hamda eksport bilan shug‘ullanadigan xolding tashkil qilinadi. Tumandagi texnikum laboratoriya va sinov poligoni bilan ta’minlanib, qovunchilik bo‘yicha tajriba almashish metodik markaziga aylantiriladi.

Nukus tibbiyot ilmiy akademiyasi, Bolalar klinikasi, Onkologiya markazi va yangi ko‘p tarmoqli shifoxona birlashtirilib, Universitet tibbiy klasteri tashkil qilinadi.

Kelasi yili qoraqalpoq xalqining buyuk farzandi, shoir va mutafakkir Berdaq Qarg‘abay o‘g‘li tavalludining 200 yilligini munosib nishonlash taklifi bildirildi. Shoirning ilmiy-ijodiy merosini o‘rganish, raqamlashtirish, asrab-avaylash va yoshlarga yetkazishni qamrab olgan dasturni bir oyda ishlab chiqish topshirildi.

Belgilangan vazifalar Qoraqalpogʻiston yoshlariga zamonaviy kasblarni egallash, xalqaro standartlar asosida taʼlim olish va mehnat bozorida talab yuqori boʻlgan sohalarda oʻz oʻrnini topishi uchun yangi imkoniyatlarni kengaytiradi.

Facebook | Instagram | Telegram