السلام عليكم ورحمة الله وبركاته
اسعد الله مساء الجميع بكل خير احب اشكر القائمين على هالقروب والاعضاء بصراحه بعد الله استفدت منهم الكثير خلال هالرحله

اللهم لك الحمد انتهت رحلتي من جورجيا امس على خير طبعاً كانا شخصين وكانت مدة الرحلة 8 ايام مابين تبليسي وجبال القوقاز وباتومي

اهم شيء اذا خلاص قربت رحلتك شيك على اغراضك قبل تمشي عشان ماتنسى شيء واذا لاقدر الله نسيت شيء حاول تتأقلم مع الوضع ولاتكدر خاطرك عشان ماتخرب سفرتك

طبعاً هذي المره الثالثه اللي اروح فيها لجورجيا اول سفره كانت اموري تمام ومانسيت شيء السفره الثانيه استاجرت سياره ونسيت الرخصه الأصل ورفضوا يعطوني السياره والحمدلله لقيت سواق وكملت رحلتي بسلام هالمره نسيت جميع صرافاتي بس الحمدلله تيسرت الامور كان معي 500 دولار حاسبت شركة السيارات ب240 لاني دفعت 100 دولار عربون والباقي حجزت فيه كوخ ومشيت اموري لين سحبت من Bank of Georgia البرتقالي يسحب ابل بي عن طريق الجوال طبعاً D360 ماقبلت تسحب منه وجربت الراجحي العادي وسحب بس ياخذون رسوم
بالنسبه للطيران حجزت عالجزيره الكويتي
بالنسبه لاجار السياره / اشكر شركة قمة طويق على التعامل الرائع من بداية التواصل معهم للحجز حتى ترجمة الرخصة حتى استلام السيارة وتسليهما للامانه كلمت حق اخذت منهم سياره كانت نظيفه وممتازه والحمدلله وباذن الله راح اعتمدهم في سفرياتي القادمه

التامين / تطبيق بي كير امنت منه انا واضفت معي زوجتي تقريباً ب86 ريال بعد الله يحميك انا سافرت مرتين وهذاي الثالثة المرات الاولى مأحد سألني عن التامين والحجوزات مع اني في كل سفره اطبعها واجهزها احتياط هالمره طلبوني التامين في مطار الكويت

السكن / من وجهة نظري انك تحجز اول يوم فقط لانك بتوصل تعبان ومافيك حيل تدور والباقي حجوزات وهميه عشان المطار يمكن يطلبون تذكرت العوده والتامين والسكن فتكون مجهز وضعك

انا عن نفسي حجزت اول ليله في تبليسي فقط وبعدها رحت غوداوري استاجرت من نفس الفندق Monte Hotel ليله ب 200 لاري تقريباً 285 ريال حول هالسعر طبعاً شامل الافطار بينما المواقع من 250 الى 300 لاري لان سعرهم ارخص من المواقع طبعاً انت قارن السعر قبل تستاجر اذا الموقع ارخص استاجر منه والعكس بعدها رحت كازبيجي واستاجرت كوخ طبعاً ماحصلته بالمواقع ولاكن دورت للي فالمواقع غاليه وجلست ابحث وتوفقت فيه الحمدلله وهذا اسمه Cottage paradise ب 200 لاري نظيف وفيه شطاف
بعدها توجهت لباتومي واستاجرت اول ليله في فندق Cabo Verde Boutique Hotel ب180 لاري لان المسافه من كازبيجي الى باتومي من 4.30 الى 5 ساعات صراحه الفندق كويس وفيه شطاف بس عالشارع مباشره وبرضه سكة القطار مقابل الفندق فكان مزعج شوي بس حق ترييحه ونومه وبعد استاجرت كوخ
Darchi ب250 لاري تقريباً 350 ريال
بينما فالمواقع غالي بس نظيف وحلو السياره توصل الى الكوخ بس عيبه الطريق شوي متعب وبرضه مافيه شطاف بس لي المروش قريب ويفي بالغرض للي مامعه الشطاف المحمول حق الرحلات

فالحمدلله توفقت في هالرحله وحبيت انقلكم تجربتي طبعاً اللي يبي يرتاح لازم يرتب اموره من بدري من ناحيه حجز السياره ويضبط جدوله من بدري وباقي الأمور سهالات باذن الله

السلام عليكم ..

بعد رحلة الى جورجيا للمرة الثالثة على التوالي .. مقسمه على عدت مراحلة .

مرحلة زوجين .. ومرحلة عائلية .. ومرحلة لوحدي .
2023 م
الزيارة الأولى كانت زوجين فقط كانت التنقلات مع سائق أخذ علينا 160 لاري في اليوم الواحد من الساعة 9 صباحاً الى الساعة 5 مساءً داخل جولة داخل باتومي والمرتفعات وجولات على الشلال والبزارات لمدة يومين تعتبر كافيه جداً .

باكورياني يوم واحد لا توجد فيها شي يستاهل سواء الاسترخاء اذا انتم لا ترغبون في الترفيه تلفريك + زحليقه كرستال . سعر التلفريك 60 لاري ذهاب وعودة محطتين المحطة الاولى يوجد كافي ومطعم .
ثم الزحليقه المحطة الثانية سعر الزحليقه 40 لاري . وتوجد منطقة ديدفلي سعر ارخص تقريباً 15 لاري .
ملاحظة :الطريق بين مركز باكورياني الى كرستال توجد فيه اعمال صيانة حالياً .
الانتقال من باكورياني الى باتومي او تبليسي عبر الحافلات 35 لاري تقريباً .
كما تستطيع زيارة برجومي لقرب المسافة او تسكن في برجومي وتزور باكورياني ايضاً توجد باصات وسائقين من باكورياني الى برجومي وباسعار مناسبة .

تبليسي مدينة جميلة وكانت اكثر التنقلات عبر الباص السعر 1.20 لاري وكان جميل جداً عند اختيار الوجهه في قوقل ماب اختار نوع الرحلة سياره ، باص ، على الاقدام اختار باص يطلع لك اقرب موقع الانتظار يطلع لك رقم الباص على سبيل المثال رقم الباص ، 320 انتظر على مقاعد الانتظار فقط من دقيقه الى 5 دقائق حتى يصل الباص ثم اتبع الارشادات بالخريطة لديك ونقاط النزول وتبديل الباص حتى تصل الى وجهتك الباصات تطلع فوق عند الملاهي وتوصلك جميع الوجهات التي قد تحتاجها في تبليسي ، لم نحتاج لسائق نهائيا ، وزرنا الكثير من الامكان مع الباص واختيار الوجهه .

التنقل بين المناطق :

توجد محطة حافلات صغيره تمشي الصباح من تبليسي الى كازبجي الشخص الواحد 40 لاري اذا وصلت هناك سوف تجد سائقي تكاسي سعر اليومية 150 لاري حسب الاتفاق مع السائق ياخذك جولات على المطل وعلى المرتفعات والشلالات في المنطقة وقد تحتاج يومين فقط اذا مدة رحلتك قصيره وتعبتر كازبجي منطقة هادئة لمحبين الهدوء والاستجمام والاسترخاء في اجواء باردة وجميله طوال مدة الرحلة .

الانتقال من تبليسي الى باكورياني 20 لاري
الانتقال من تبليسي الى باتومي 40 لاري
للشخص الواحد .

للمعلومية :
غوداوري .. جبال القوقاز .. كازبجي .

تعتبر منطقة وحدة ..

كوتايسي لا يوجد فيها شي افضل من ما ذكر اعلاه .

السلبيات : اوربي باتومي
الحذر عند الحجز غرفة في اوربي باتومي عن طريق البوكنق كثير وجدتهم عند موظفي الاستقبال ويعتقدون ان الحجز لديهم و يتفاجئون أن الحجز لدى شخص أخر ارجو الانتباه من فنادق اوربي كل غرفة لها مالك او شركة و توجد حالات كثيره من النصب تجد السعر في البوكنق رخيص وعند وصولك تجدهم يطلبون منك زيادة في السعر ، والبعض منهم هاتفه مغلق ولا تستطيع التواصل عند وصولك مما يسبب لك الكثير من التأخير والبعض منهم يتصل عليك ويقول لك لا يوجد لدي غرفة متاحة حتى وان كان حجزك مؤكد ويطلب منك الالغاء ليرفع السعر خصوصاً ايام عطلة الاسبوع عندهم لا تلغي تواصل معهم عبر ارسال لرسالة مكان الاقامة في البوكنق لا تتواصل معه عبر الهاتف او الواتساب وغير مناسب للعائلات .

كذلك الانتباه من سائقي التكاسي في المطارات وكذلك اسعار شرائح الانترنت لا تشتري الا لضرورة القصوى اخذ لك ارخص سعر لو يوم واحد تمشي فيه امورك عند الوصول .


الشعب الجورجي لا يحبون الضحك مع الغرباء اذا انت كوميدي وتحب تضحك مع الناس ما راح تناسبك جورجيا . اذا انت شخص لا تتحدث كثير فقط في حدود السؤال والجواب فقط ممكن تناسبك .

كثير من الجورجيين لا يتحدثون الانجليزية مشاكل قد تواجهها عند وصولك او الركوب مع بولت .

المطاعم :
غالية جداً قد تحتاج اكثر من 120 ريال يومياً للوجبات الثلاثة لشخص الواحد .

الترفيه :

اسعار غالية جداً .

خلاصة الموضوع :
بعد تجارب رحلاتي لجورجيا لا تعتبر جورجيا افضل وجهة زرتها في سفري .