عظّمَ اللهُ لكم الأجر، وأحسن اللهُ لكم العزاءَ بذكرى استشهاد الإمامِ الحسنِ المُجتبى (صلوات الله عليه)

الشاعر محمد الجماسي
٧ من شهر صفر | ١٤٤٨هـ

#استشهاد_الحسن_المجتبى


أقرأ بالتوراة وأنجيل الزمن
أعظم الآيات آيات الحسن


١/ لا يقل عن أبو اليمه بالشأن
أترعرعو واتربو ابنفس الحضن
إبكربلاء هم عنده مستشهد ابن
وعنده زوجه اتسلبت وي الضعن


٢/ بالشجاعه المجتبى هم لافته
طابر الطابر علي وشگ هامته
ريشه من جبريل حط أبخوذته
وداس بأرض النهروان إشگد فتن


٣/ بالعلم بثه مباشر من علي
وأبخطب نهج البلاغه ممتلي
إبن مصحف فاطمه وثاني ولي
والمسائل كلهه يمه استسلمن


٤/ بالكرم لو حاتم الطائي انعرف
سفرة ابن الزهره من طرف الطرف
إمن المدينه يمكن إتطــــخ بالنجف
وتغرگ إبصينيته جياع الزمن


٥/ يدري باچر زينب إتظل بالظلام
چان گبل الطــف يخيط بالخيام
درع سوه للحسين إمن السهام
وگله اسف راح تبقه ابلا چفن


٦/ إمعاويه الطاغي إستخف إبحرمته
وجعده بنت الاشعث اللي سمّته
بالنبل مــــــروان زف اجنـــازته
والبقيع إمن البچي إعيونه عمن


الشاعر #محمد_الجماسي
صفر الأحزان | ١٤٤٨هـ

[ تلگوها يالمشاية ]

[ #الأربعينية_١٤٤٨هـ ]

https://youtu.be/OWIJk0ZOAks?si=7iTj-gI5eAkB3iI3


أداء: الرادود الحاج #حيدر_السعد
كلمات: الشاعر #محمد_الجماسي


مجالس العشرة الثانية من شهر محرّم الحرام


هيئة السيد أحمد الغريفي
الديوانية – الحمزة الشرقي

#الاربعينية

جينه للطف زائرين
نحيي يوم الأربعين
كلشي بالدنيه حسين
كلشي بالدنيه حسين

١/ بس ابواليمه ابعمرنه.. وكلشي ماعدنه سواه
تربته النسجد عليهه.. هيه عنوان الصلاة
الدنيه لو خلص هواهه.. نبقه نتنفس هواه
احسين نطلب من رحمته.. بس رضه الزهره ورضاه

بالحشر هوه الشفيع
وكل تعبنه ما يضيع
عنده إيمان ويقين
كلشي بالدنيه حسين

٢/ الدنيه لو دارت وجهه.. وقفل أبوابه الزمان
نعتني الباب الحسين.. ونلكه يم بابه الأمان
أبو فاضل منه نشرب.. غيره ياناس وحنان
ومن حبيب ابن مظاهر.. نستلم صك الجنان

انفرح الزهره نريد
من نجي الكبر الشهيد
نبقه نزحف عالأدين
كلشي بالدنيه حسين

٣/ آدم وحواء دكّوا.. باب أبو اليمه برجاء
وحصلوا من الله نظرة.. لأن زاروا كربلاء
وعيسى بالضامي توسل.. وارتفع عنه البلاء
وموسى شگّ البحر لمن.. ندب سيد الشهداء

كل رسالات السماء
فسروها الأنبياء
وعرفوا الشي الثمين
كلشي بالدنيه حسين

٤/ حبًّا بسيد البريه.. وحبًّا بحامي الحِمه
وبالحسن حب وكرامه.. واحترام الفاطمه
من نزور احسين إلنه.. تنزل أرزاق السمه
احسين وي نبضة كلبنه.. عايش ابمجره الدمه

الماتمسك بالإمام
يبقه عايش بالضلام
وإحنه بالدم كاتبين
كلشي بالدنيه حسين

٥/ من عطية العوفي ناده.. جانَه يا جابر رزق
آني جاي أنظر سواده.. وكلبي يا جابر يرق
جابر يكله يا خادم.. روح إلهم وانطلق
ولو طلع ضعن السباية.. إنتَ حر وتنعتق

أعمى جابر بالطفوف
لكن بكلبه يشوف
شاف ضعن الطاهرين
كلشي بالدنيه حسين

٦/ العسكري كال بحديثه.. وهذا ثابت بالصحيح
خمسة للمؤمن علايم.. بيهن ذنوبه تطيح
وأعظم الأشياء هيّه.. زيارة احسين الذبيح
خذوا كل الدنيه بس.. انطونه شَمّه من الضريح

والحمد لله نكول
من عرفنه ابن البتول
صرنه وادم مؤمنين
كلشي بالدنيه حسين


#محمد_الجماسي

جديد قصيدة | خلصت أيام الخدمة
أداء: الرادود الحاج حيدر السعد
كلمات: الشاعر محمد الجماسي
https://youtu.be/1opsjC0tIg4?si=gLdfaydw-Z-6NlJH
ليالي شهر صفر
1448 هـ – 2026 م
هيئة الشيب الخضيب
بغداد – النهروان

#الاربعينية

يبو فاضل يبو فاضل
...
من اليسر جيتك يكافل خدري
تدري اشجرالي خويه لو ماتدري
سوط الشمر عباس ورم ضهري
تعبانه اجيتك والمدامع تجري

يالاخو لاتعتذر..انهض وفك الكبر
خل اشوفك يبوالغيره اشسوه بمتوني الشمر
يبوفاضل يبوفاضل
...
يحتاج اسوالف لوتعرف أحوالي
من يوم ماعفتوني ياكفالي
الحادي سباني والصبر يبرالي
وبالناكه اتستر واضم اخيالي

ويني اووين السبي..وانه علوية نبي
جنت امشي اوياك خويه وهسه وي الأجنبي
يبو فاضل ..يبو فاضل
...
بالكوفه ياعباس أشد الامي
بيت اهلي شفته واذكرت ايامي
هسه ابسبي وامجرحات اجدامي
وراسك يخويه عالرمح كدامي

والعشاير بالسره..كلمن العنده مره
خلصوهه وضلت اختك عالهزل و اميسره
يبو فاضل يبو فاضل
...
والشام اذاني وعمالي اعيوني
وبين السياط المعركه وامتوني
ترضه بخرابه يالاخو ايكعدوني
وبالسوك اطب والوادم ايطكوني

استقبلونه يالكمر..بالطبول وبالحجر
وين أضم نسواني خويه قد خزينا أمن النظر
يبو فاضل يبو فاضل
...
انته كبل هم سامع بعلويه
تدخل قصر متجتفه ومسبيه
وايزيد خويه كاعد بكرسيه
انتي منو ايگلي ويشتم بيه

وراس ابواليمه بطشت..والله من شفته متت
ايزيد طكه بخيزرانه وانه عالراس الطمت
يبوفاضل يبوفاضل
....
امريه غريبه والشماته اهوايه
وبالشام كل ساعه تغثني احجايه
رديتلك خويه يراعي الرايه
اكعد وشوف امتوني الامدمايه

اكعد وكلي الكوه.. جيتك الطف نينوه
بيه ديره امن الجروح
وشوفتك هيه الدوه
يبوفاضل يبوفاضل
...
امن الشام أجيت الكربله باحزاني
شو مالكيتك يالكفيل امتاني
انهض يسبع الكنطره اتلكاني
الهيمه جوتني والرمل غطاني

ضعني طب الكربله..يعباس استقبله
وصيح من كبرك يخويه ياهله بزينب هله
يبوفاضل يبوفاضل
...
حسابي تفرش كربله الملكانه
والرايه انظرهه ترف فوكانه
حسبالي ترجع للوطن ويانه
بس اشيكومه الكطعو ذرعانه

يالطحت عالمشرعه..والادين امكطعه
فاجعة فكدك يخويه مامثلهه فاجعه
يبوفاضل يبوفاضل
...

#محمد_الجماسي

#الاربعينية


دلّوني بطريق احسين وامشيله
أريد أنعاه واقرايه أسويله


عميّه أمن البواچي وبالجفن سطره
أنه الزهره أمه وجايه الكبره
أريد أنعاه وأبلل بالدمع نحره
بيوم الأربعين ومجلس أهديله


وياكم أريد ألطَم على امصابه
هم شفتو شهيد امسلبه اثيابه
أريد أفرش عباتي وأكعد ابابه
والزاير حوائج آنه أكضّيله


لو طبيتو للحظره يمشايه
تلكوني اعله بابه امحزمه ابرايه
ضلعي ايطيب لمن اسمع اقرايه
عالضل بالشمس محد يفيله


واقرولي اعله زينب من ترد باجر
ترجع من سبيهه بكسرة الخاطر
علوية علي وبحالهه اشصاير
الله ايساعده السلبو مداليله


يازوار اذا ردتوني اسجلكم
أريد أسمع بجيكم وي لطمتكم
على المذبوح صبّوا اوياي دمعتكم
وهنياله الاذكره اليوم وادعيله


باجر بالقيامه آنه الاحاميكم
مثل الطير ياشيعه التقط بيكم
أعرف اوجوهكم وأعرف اساميكم
كل خادم اعرفنه بتفاصيله


وللعباس واجب نمشي ونطوفه
هذا الكطعو عالمشرعه اجفوفه
مصيوب النظر والهامه مخسوفه
كضاي الشدد عباسنه ادخيله


#محمد_الجماسي

#استشهاد_رسول_الله


فاطمة اتسمّيله.. وحيدر ايتجيله
كلشي واضح.. بالملامح.. ناوي عالسفر


موت الله مامات النبي
مات بغدر صحبانه
اتمرض لجن وي الدوه
دستله سم افلانه

جان المخطط ينقتل
والسلطه الهم تنتقل
وحيدر يبايع بالغصب
وبسمارهم يذبح طفل

وبالفعل سوّوهه.. التجربة وخاضوهه
اقره عنهم.. ذوله منهم.. جم جرم صدر


من شربوه ذاك الدوه..
والسم تمكّن منه
ضل يضعف وطوله انحنه
وبروحه تمشي الونه
سيطر على أعظاءه المرض
كلبه وكف مابي نبض
باوع عله الزهره وعلي
واتشاهد وجفنه غمض

السمّمو هاديهم.. لعنة الله اعليهم
مو صحابه.. بل عصابه ذوله موبشر


وإنَّك على خُلق
هيج الله جان ايمدحه
واصحابه اذوه اشكثر
وافلان جان ايجرحه

والمانطق عن الهوه
وعند الله عالي المستوه
يهجر يكلوله الربع
مااجو كالوله الكوه

وباخير انفاسه.. بس علي عد راسه
والبقيه.. جاهليه.. خنجر بضهر


الحسن باحظان النبي
واحسين كام ايشمه
وزينب ازغيرونه واجت
حزنانه كعدت يمه

وجدهم يكللهم هله
باشرف واقدس عائله
باجر جرحكم يبتدي
من البقيع الكربله

واحد ايسمونه.. وواحد يذبحونه
وهالاميره.. تروح اسيره والدمع نهر


بعده النبي عالمغتسل
وسوو تحالف ضده
طعنو الدين وصاحبه
وسوو جرايم بعده

هاك اسمع باول جرم
الزهره لازم تنظلم
وعن الوصي لو دافعت
تندفع كون وتنلطم

ايساعد الله الزهره.. أمن الرفس والعصره
وابطنهه.. مات ابنهه بسابع الشهر


#محمد_الجماسي

#استشهاد_رسول_الله


الوداع الوداع يا رسول الله الوداع

يا رسول الله برحيلك.. مطرت أدموع السَّمه
مَكّه مفجوعة وكئيبة.. والمدينة مُضَلّمه
لبست أهدوم النواعي.. الليلة بنتك فاطمة
والحسن واحسين يبجون.. إبحضن حامي الحِمه

واليتامه الليلة تصرخ.. يا محمد بافتجاع
الوداع الوداع يا رسول الله الوداع


جان كلمن شاف وجهك.. يا محمد يبتشر
وسَفه هالوجه السماوي.. اتغطّه بتراب الكبر
علي بتابوتك الليلة.. شيّع أحلام العمر
والأخو الدافن أخيه.. إيبيّن بضهره الكسر

الفاكد أعزاز بحياته.. تخلص أيامه ضياع
الوداع الوداع يا رسول الله الوداع


طبع الاتفارك ابوهه.. اتعيش مكسورة كلب
وفاطمة من المدامع.. سَوّت الكبرك درب
ليلة الدفنوك بيهه.. حَسّت بخوف ورعب
تصرخ وتلطم وجهه.. الحجرتك لمن تطب

امعصبة بعصابة خَظره.. وتبجي من دون انقطاع
الوداع الوداع يا رسول الله الوداع


مانمت وسط المكابر.. بعدك اعله المغتسل
والعذاب اعله أهل بيتك.. من سقيفتهم نزل
أمّتك نكرت وصيتك.. ردّت العصر الجهل
المحسن ابطن أمه بعده.. وكتلة إكبار انكتل

انذبح بالبسمار ظُلماً.. من كبل يوم الرضاع
الوداع الوداع يا رسول الله الوداع


كل سنه انجدد مصابك.. يالنبي بآخر صفر
والدموع اعليك من دم.. يمكن ايترسن نهر
احنه ماناسين يومك.. مو مثل بعض البشر
كسرة افراكك جبيره.. المابجه بيومك خسر


وانقطع عنا الوحي.. بغقدك وحك العتره ضاع
الوداع الوداع يا رسول الله الوداع


#محمد_الجماسي

▪️عظّمَ اللهُ لكم الأجر، وأحسن اللهُ لكم العزاءَ بذكرى أستشهاد رسول الله (صلى الله عليه وآله)

#محمد_الجماسي

#استشهاد_الامام_العسكري

آجرك الله يامهدينه
والعسكري اليوم غمضت عينه
...
عظم الله الاجر يبن الحسن
والحسن هاليوم ملفوف بجفن
الذهب وسفه بالاتراب اندفن
والجبد مسموم وامكطعينه
....
مات ابوك وماتت احلام العمر
ابعامك الخامس يمهدي وتنكسر
خيمه عينك صارت ودمعك جمر
وفاجعه التجويك هم تجوينه
...
ضلمه عمرك غابت اليوم الشمس
يايتيم ومحد بحالك يحس
الدنيه ليش اوياك دارت بالعكس
الناس صلفه وحقك امضيعينه
....
الدنيه ليش اتبيع بيك وتشتري
وانته ذاك الهاشمي والحيدري
يالدفنت الروح وي العسكري
والكلب حزناً ترف جنحينه
...
اليوم سامره بسواد اتوشحت
وشعلة الايمان والحك انمحت
المناير والمنابر صرحت
وسيعلم من قتل والينه
...
مشية المكسور صارت مشيتك
ويلي عالمسموم تصرخ دمعتك
يمكن الهاليوم تلطم هامتك
واحنه هم اعله الحسن لطمينه
...
كل عزاء ايصير نجريلك دمع
وجوه خيمتكم يغايب نجتمع
يمته يبن العسكري نورك يشع
عجل الله بالفرج نادينه
...

#محمد_الجماسي

#ولادة_رسول_الله

يازاير المدينه
سلم على نبينه
...
وياك أخذ سلامي والتحيه
للمنولد في هاذه المسيه
شيخ العوالم سيد البريه
جد الحسين ووالد الزجيه

بانواره طل علينه
سلم على نبينه
...
قبل الوجود المصطفى وجوده
الكون كله ينحني السجوده
ويه كتاب الله النبي خلوده
الصادق المايخلف بوعوده

نوره وسطع جبينه
سلم على نبينه
...
ياراكبا قطاعة البوادي
للقبة الخضراء يحن فؤادي
مشتاكه روحي للحبيب الهادي
يمته الفرج يهل الرحم انادي

كلبي امتله بحنينه
سلم على نبينه
...
يازائر المسجد اريدك انه
اتوصل سلامي للنبي امانه
اشرف نبي وبرحمته اجانه
وبخيمته لمانه وبحنانه

تمطر كرم يمينه
سلم على نبينه
...
هالليله هل اهلاله والكون انسر
والخير غطانه وطرد كل الشر
هنو الزجيه بالولاده وحيدر
وبمحفله هنياله كلمن يحظر

وايبارك بيقينه
سلم على نبينه
....
ياشيعته رغما على عذاله
صلو على طه الرسول واله
طشو الورد هالليله باستقباله
الضلم مات ابمولد العداله

وعجلو بفرج ولينه
سلم على نبينه
...

#محمد_الجماسي

[ اشتياقي ]

«قصيدة كتبت للإمام الغائب مولانا بقية الله الأعظم الحجة ابن الحسن المهدي المنتظر صلوات الله وسلامه عليه وآله»


أداء: الملا #مرتضى_الحميداوي​
كلمات: الشاعر #محمد_الجماسي​


https://youtu.be/RYnRza83-5s?si=uWuMOT5wBPfrT_XX

حب الولايه وخدمة احسين
الله يرزقك ذني الاثنين
لمن اتواسي الزجيه
بالليالي الفاطميه
يالموالي


١/لو ردت رزق الحلال اتنوله بس دك بابهه
اطلب وفشلان صدك مايرد طلابهه
احنه احباب ام ابوهه ونبجي دم لمصابهه
وفاطمه ابيوم القيامه ماتعوف احبابهه

باب الزجيه افضل البوب
يغسل ضميرك من الأذنوب
يلله كوم احيي العزيه
بالليالي الفاطميه
يالموالي


٢/عالضلع ابجي وتصيرابمنزلة سلمانهه
وعابس الثاني تحسبه الينجوي بنيرانهه
إم حسن وحسين فايض عالخدم احسانهه
لو تطشرنه الذنوب ايلمنه بيت احزانهه

مد ايدك وكللهه محتاج
اتلبسك بديهه ام الحسن تاج
جرب وشوف العطيه
بالليالي الفاطميه
يالموالي


٣/اكبر أمن الدنيه سفرة فاطمه الخدامهه
(فكلو منها هنيئا) يالحييتو ايامهه
عالسطوح وبالشوارع خل ترف اعلامهه
وباللعن اهل السقيفه كسرو اصنامهه

ولمن تكتبون اعله الاضلاع
كون القصايد بيهن اوجاع
حباً بجدة رقيه
بالليالي الفاطميه
يالموالي


٤/الزهره مضلومه ابعمرهه واحنه كلنه انصارهه
الله خالقنه أمن اجلهه ومن أجل كرارهه
بالونين وبالمناحه ينشلع بسمارهه
وسطرت العين ابدمعنه تنمسح آثارهه

عاشور الاول يهدم الحيل
والثاني باسم السحكته الخيل
الدمعه والخدمه سويه
بالليالي الفاطميه
يالموالي


٥/مبني بالحب والعقيده وماتهدم ساسنه
والغبار البالعزاء انصوغه تاج ابراسنه
الزهره ريحانة ابوهه التسوه اهلنه وناسنه
المايحب الزهره احنه انحطه جوه امداسنه

لو عالسراط اتزل الاقدام
هيه التنجيكم يخدام
رحمه من الله ونبيه
بالليالي الفاطميه
يالموالي


٦/باجر بيوم القيامه اتكظنه واتدلينه
وتلتقطنه الزهره وامن اجهنم اتنجينه
ويم علي على منابر من ضوه اتخلينه
واحنه من فاضل الطينه ربك امسوينه

آمنه بيهم واحنه ذرات
وخلص عمرنه بالعزائات
يلله حط ايدك بديه
بالليالي الفاطميه
يالموالي

#محمد_الجماسي

قصيدة [ يا زَهرةَ عُمري ]
من وَجعِ أميرِ المؤمنين في فَقدِ الزهراءِ عليها السلام

يا زَهرةَ عُمري
بيّه ولا بيچ الكَسر
يا زَهرةَ عُمري
يا وِسفه خَدچ يِنسطر

نَجمة وطَحتي اعله الكاع
ويُوسف أحلامي انباع
يا زَهرةَ عُمري
...
١/ يا نَورس حياتي والبَشر غِربان
يا رَيّة علي المخنوگة بالدُخان
روحي الجِنّتچ يا كَوثَر الرَحمان
ما تِرهم نِحط إمراية يِم عِميان

مِن عَينچ طاحت
كل ذِكرياتي وعِشرتي
مِن عَينچ طاحت
أجمل أماني بِدنيتي

يا الرِحتي بِغير أوداع
ويُوسف أحلامي انباع
يا زَهرةَ عُمري

٢/ مَمنوع الحَمامة اعله الشَجر تِنلاح
إذا يِوگع غُصن يِتحاسب الفَلّاح
يا طَير اليِطير الكاسِريله أجنَاح
مَكسور الضِلع لو نام ما يِرتاح

تِكظّين أضلوعچ
لَمِن تِشمّين الهَوه
تِكضّين أضلوعچ
هَيچي وَصلتي المُستوه

يالمِتي بَساع بَساع
يُوسف أحلامي انباع
يا زَهرةَ عُمري

٣/ داحي الباب ما يِگدر يِطفي الباب
أبو تراب وعليچ اليوم هَالّ اتُراب
النِحبهم لِيش تِبعوا سِچّة الغِياب
لا زاد الهَني ولا عَيش بَعدچ طاب

طَگاچ الثاني
وأكبر جَبان الطَگ مَرّة
طَگاج الثاني
وآنه الگِلتلچ مَعذرة

أَسد وحاطوني أضباع
يُوسف أحلامي انباع
يا زَهرةَ عُمري

٤/ الايِعاشر وَرد فايِح يِضل عِطره
اليِسطر خَد مَرّة رَب السَمه إيسطِره
عَلَيه لو عَلَيچ الفاتِحة أقرَه
عَلي إيتچي العَلي ضَلّيت يالزَهره

چِن دافِن روحي
لَمِن دَفنت إجنازتچ
چِن دافِن روحي
ويَوميّة أشَم بِشيلتچ

كُلشي بترحالچ ضاع
يُوسف أحلامي انباع
يا زَهرةَ عُمري

٥/ إذا ما يَوم أذكُرچ يِختِنَگ صَدري
وأعَوّضه بِثاني يَوم بِدَمعتي التِجري
يَتيم إخلاف عَينچ يا بَعد عُمري
أكُض بِيَدي اليَتامة لو أكُض ظَهري

مَكسور أجنَاحي
لَگدَر أطير ولا أحُط
مَكسور أجنَاحي
واتناثَرت مِثل القُرط

أمسافِر مِن غِير إمتاع
يُوسف أحلامي انباع
يا زَهرةَ عُمري

٦/ أخيرًا قَلَّ صَبري والتَجَلُّد مات
إلّا مِن ناصِرًا ظَهري شِبَع طَعَنات
لو ما أضَحّي بيچ إيِموتِن الآيات
والوَادم تِرَد تِعبُد هُبَل واللّات

والدِين بِضِلعچ
وبِصبري يِتَنَفّس بَقه
والدِين بِضِلعچ
ظَل ابَهائه و رَونَقِه

لَكِن قِلّة الاتّباع
ويُوسف أحلامي انباع
يا زَهرةَ عُمري



#محمد_الجماسي

قصيدة [ نار الفَگد ]
من مُصابِ أميرِ المؤمنين في فَقدِ الزهراءِ عليها السلام

حاير شضَمّد وآنه أبو تراب
كسر الضلع لو كسر الاغياب
...

١/ كسر الضلع لو نِفترض هاد
الكسر الظهر ما يِرهم اضماد
وآنه گَطعت النوم والزاد
عَگب أُم أبوها وأُم الأطياب

٢/ نار الفَگد ما تِطفي بالماي
اشوية الدمع والفاجعة أَهواي
زَهرة حياتي وريع دُنياي
لأجل الستر لاذت وَره الباب

٣/ النار تِطفي وتِبگه الجروح
والزَهرة ليش مُقرَّرة إتِروح
چانت العِشرة الروح بالروح
كِلمة مَحنّة ولَمّة أحباب

٤/ الكل اجتماعِن فِرقه معلوم
وبالدُنيه هذا الحُكم مَرسوم
الفَرح ساعة والحُزن دوم
واعله النِحبهم نِلبس أنگاب

٥/ جَر النَفَس گُوّه عَلَي صار
بِعَيني طِفل وإبرَيتي بسمار
حَيدر بَقه إيصبّر الكرّار
وأَصوابي كِلش للعظم طاب

٦/ لَمِن نَعشها للدفن راح
طِحت وعَلَي بَيتي غِفل طاح
حَتّى علي هم يا علي صاح
واحد المَوت وكِثرة الأَسباب

٧/ قَلّ الصَبر واتهدّم الحيل
وانهاري صاير يِشبه اللَيل
وَيلي على الزهراء وآ ويل
اشلون بِوِجهه الزهرة تِنصاب

#محمد_الجماسي