.
.
يانور عيني يعود العيد ماحزنتي
ولا أفقدش ياغلاي وْلا فقدتيني

إلى أقبل العيد غنيتي وهيجنتي
منتي بفي الخضب والمولات تلهيني

خلي البني تبرم المولات بالسنتي
وأنتي حرامٍ عليها إنش تمريني

ياسيدة الحسن لوّش ماتحسنتي
وياباشة الغيد ، كانش ماتعرفيني

إلى أذن الصبح وصليتي وتسننتي
ومن عقب ذبح الضحايا للمضحيني

تناوشي من خلاقينش ماعينتي
فوق الحلا ياغناتي لاتحليني

لو تلبسين الخياش الغُبر ماشنتي
لاواللذي نزل الكوثر وياسيني

يطري علي بيت إبن عونٍ ليا بنتي
كن العتيبي على مدحش يلاحيني

ياكثر زينش لو إنش ماتزينتي
مدري مزينشْ رب البيت في عيني

والعيد ، تدرين ويش العيد لاهنتي ؟!
ماهو بيوم الثلوث إولا بالإثنيني

العيد والله ليلٍ فيه أنا وأنتي
في نُقرةٍ مايجيها الا الشياطيني



#مبارك_المطرباني

.

‏مْن أول آقول ياطيبك ويا غُلبك
‏إلين وصّلت ضن الطيّب لحده !

‏مزعجني بقلبي وقلبي ، وأثر قلبك
‏أسود من كراع الأثيوبي ومن خده ..

‏⁧#مبارك_المطرباني⁩