قناتي في اليوتيوب ، يشرفني اشتراككم فيها ، الجديد بينزل فيها الليله 🙏🏻♥️

دوب دوب الليل عشى ودوب النوم طار
ودوب شيطان الهواجيس رز إليْ علمه

كاحت الـدله عويدي وكاحتها بهار
لين فاخت موقي النوم وإنزاح عتمه

كن في راسي سواليف مرضاً في شهار
للطواري فيه لجه وحنه ورزمه

وكن شياطين الهواجيس فيه تدق طار
حالفه ماتركد إلين أسوي ملحمه

هاجسي ماعاد فيها يمين وْلا يسار
أزهمك ياخوي تكفى يامنّي بزهمه

لاتعذر خل عذرك لغير اليوم ، غار
دق صدرك وإعصب الرأس والقاف إدحمه

وكب راسٍ تطربه عزفة أوتار القيتار
وإنص راسٍ يبني المجد ماهب يهدمه

يطربه حذف الصوالين وزيان البكار
ماأطربه صلاح الأخفش ولا حمود السمه

وإختصر لو إن مجده مايقبل الإختصار
أبك هذا فيه فوق ألف وخمس إمْية سمه

جاهله ! قولو له إن ماعلى نغيمش غبار
لو يسال ( المجد ) منهو ابن قروش ؟ علمه

من يمينه حط له مجد وأصداء ووقار
من يمينه لا بمنحه ولا هب مكرمه

شامريٍ فيه للطيب قوه وإقتدار
لابغى غيره يسوي ماسواه أفحمه

ودون صبيان ال شامر ليـا ثـار الغبار
البحر الأحمر يعومه ليا قالو عمه

دونهم ماقد تراخا ولا ساق العذار
وإن وقف للموقف الكايد الصعب حسمه

وراسه أبين في المواقيف من شمس النهار
يابعد راسٍ تساوى وجوده وعدمه

ان نصيته لو على الموت الأزول مااستخار
شيخٍ تذري مذاريه ويرف علمه

وان تعزوى اخو هيا للكبار وللصغار
إجل همك لعنبا اللاش وإبليس إرجمه

لازهمته كن راسه يولّع فيه نــااار
وكنك تولِّـع دوافير غازٍ في دمه

من على راسه لو إيركد الرسلان فـار
كن حطب سمر المدينه تحتها تضرمه

مزبن إلي واقعٍ بين نار وبين غار
واحدٍ ياكله همه ، وياكل برطمه

لو درو عنه النحاحيت نِّحات الخيار
حطو صورّه على كل حايط وصنمه

محزمٍ لابارو الناس من حولي مابار
محزمي وأنا وأنا أخو إنوير محزمه

قبل أعرفه واصغر أحلامي ، أصغرها كبار
بيني وتحقيق الأحلام منا لـيدمهْ

ومن عرفته كل حلمٍ ماكان يصير صار
كنّه يقول أي شيءٍ تمناه إحلمه

من يقول طويق في نجد قله بإختصار
عان واللهْ طويق عانه بعينه وعلمه

*تلتفت * الارقاب صوبه وله الأيدي تشار
منهْ لو ينشد عدوٍ صدوقٍ ماهثمه

إن زعل مايزعل إلا على طوال العمار
وإن رضى سولف لصبيان بيته وخدمه

التواضع لو له إشعار هذا له شعار
يوم غيره بس يادوب يجتر نسمه

لو يجي له قندهارٍ من أقصى قندهار
من تحفايه به تقول دمه ولحمه

أخطلٍ تصغر معا ذكره الأسماء الكبار
مسرفٍ في راس ماله وفي إبله وغنمه

خالقه ربي وبالٍ على المال ودمار
شوف عيني *حذفه * المال توي برزمه

خل ملاك الآباعر وملاك *العقار*
ويش فزاع آل مكتوم عنده وكرمه

لأستشار أبو ( وش أعطيه ) ؟! يعطي ماأستشار
لو يولى مال وليـام بلقيتس صرمه

كن من بينه وبين الدراهم رد ثـار
ثاعيٍ فيها بشيكه وحبره وقلمه

إقتدر ياخوي والله يحب الإقتدار
لاتحلل يانغيمش ماربي حرمه

لاطريتك طال صوتي ودمي منك فار
يوم غيرك لاطريته طريته تمتمه

منك الطيّب لو يْغار ، من حقه يغار
البلا لاغار منك ضعيّف ورخمه !

من حكا بك زاده اسمك معزه وإعتبار
ومن تحاكا فيك عيّن من إيسكر ثمه

هتلر العجمان عانوه قصاف العمار
الخصيم إلى أستوى له يشوته بقدمه

علمو خصمه ماعنده له إلا شب نار
كان عاده يسمع العلم ولا يطعمه

وعلموه يطر أزاريره إزرارٍ إزرار
لأستعر قيلونه وضاق ثوبه ونسمه

وإسبرينه لايخليه ليل إولا نهار
لايوقف هتلر عجيم في عروقه دمه

مبارك المطرباني