لا ياغناتي كان إن العذر ينجيني
لو إنهْ ما أنجى ربع همام من سالم

فالعذر منش ، ترى ماهوب بيديني
لا يابعد كل من راسل ومن كالم

لكني أصد من صوتش ، لايغريني
رغم إن ودي بصوتش ، والله العالم

خلي المواصل ( رسايل ) ، بينش وبيني
من طلة أول شهر تسعه وانا مسالم

و( ألوه ) من فاهك المعسول ، تغويني
إغواية الضُلم ، للمستقوي الضالم

سُباتي إلي خذا من عمري ، وديني
صحيت عقبه مثل مايصحي الحالم

وتقصيري إلي مضى مني ، يكفيني
خليني أكفّر ذنوبي ، وأنا سالم

والله يالو إن مانيب أردع شياطيني
إن كان عيّدت قبل تعيّد العالم

لكن لا شفنا هلال العيد عانيني
مولِّـم إبليسي ومتحزم ، ووالم ..

الحب ماهوب تقزيره ، وتعليله
الحب يثر على الإنسان ( شوفيني ) !

يقضي على حاله ويقضي على حيله
وأنا ماداني على قلبك ، تعرفيني

من كثر ما أدرى على قلبك ، وماْ ويله
ودي اني أستاصله وأركبه فيني

وأريّحه من عنا الحب ، وغرابيله
مع إني آخاف لا أحبك بقلبيني ..

تراك منت بسفينة نوح
وْلاني بولد نوح يالطيّب !

من كثر ماقد شبعت جروح
للصده ، أجرّي الهيّب

وْصاير تقول قطعة لوح
ماعادني بالأول الطيّب ..

صلو على النبي ، اللهم صل وسلم على نبينا محمد ♥️:(