«Соңғы бес жылдағы контрафактілік және заңсыз әкелінген өнімдердің нақты ауқымына қатысты жария әрі ведомствоаралық келісілген кешенді талдау жүргізіп, тауар санаттары мен тарату арналары бойынша бірыңғай дерекқор қалыптастыру қажет. Германия, Бразилия, Қытай, Үндістан және өзге де елдердің тәжірибесіне сүйене отырып, азаматтарға бірегей кодты сканерлеу арқылы тауардың түпнұсқалығын тексеруге мүмкіндік беретін мемлекеттік цифрлық платформа мен мобильді қосымша әзірлеу керек», – деді депутат.

«Кейбір орталықтар қысқа мерзімге ашылып, атауын немесе мекенжайын өзгертіп, бақылаудан жалтарып жатады. Әсіресе тегі-тамыры белгісіз, өзін білікті дәрігер ретінде жарнамалаған Қытай Халық Республикасының азаматтары төрт-бес ай халықты емдеген болып, елдің сеніміне кіріп, артынша емдеу орталығын жауып, «аңқау елге арамза емші» дегендей қалтасын қампайтып алып, кетіп қалып жатады. Бұл жағдайлар пациенттердің өмірі мен денсаулығына тікелей қауіп төндіріп, денсаулық сақтау жүйесіне деген сенімді әлсіретеді», – деді депутат.

«Білім беру мекемелерінің көбінде ғимаратқа тыйым салынған заттардың өтіп кетпеуін анықтайтын техникалық тексеру құралдары, соның ішінде металл детекторлары жоқ екенін атап өткім келеді. Соның бір мысалы ретінде жақында Алматы қаласындағы университеттердің бірінде болған сұмдық жағдайды айтсақ болады. Студент оқу орнына пышақ алып кіріп, оқытушыны жарақаттаған», – деді депутат.

«Бюджеттік ұйымдар электр энергиясын ең жоғары тарифтер бойынша төлейді, бұл тарифтер 1 кВт сағ үшін 82 теңгеге дейін жетеді. Бюджетке түсетін жүктемені азайту және энергия қауіпсіздігін қамтамасыз ету мақсатында баламалы энергия көздерінен электр энергиясын өндіру мен жеткізудің дербес сегментін дамыту арқылы бюджеттік ұйымдардың ғимараттарын шатырлық күн панельдерімен кезең-кезеңімен жабдықтау орынды деп саналады», – деді депутат.

«Бүгінде елімізде 1 миллионнан астам адам ең төменгі жалақымен өмір сүріп отыр. Бұл – миллиондаған отбасының шынайы жағдайы, әлеуметтік ахуалы. Ал енді сол адамдардың қолындағы ең соңғы тірегін – ақылы қоғамдық жұмыстарды қысқарту туралы Еңбек және халықты әлеуметтік қорғау министрінің желтоқсандағы бұйрығы «жалақысы аз адамдар саны қысқарады» деп бағалануы мүмкін. Бірақ ауылдағы жағдайды көрген адам үшін бұл – жұмыссыздардың саны көбейеді деген сөз», – деді депутат.