🔑«AMANAT» партиясының сайлауалды бағдарламасы: Іле ауданында 60 отбасы баспаналы болды

Алматы облысы Іле ауданында «AMANAT» партиясының сайлауалды бағдарламасы аясында әрқайсысы 72 пәтерден тұратын екі жаңа көппәтерлі тұрғын үй пайдалануға берілді. Өтеген батыр ауылында орналасқан бұл тұрғын үйлер әлеуметтік жағдайы осал санаттағы азаматтарға берілді.

Іле ауданының әкімі Қайыржан Жақсымбетов және «AMANAT» партиясы Іле аудандық филиалының төрағасы Алмасбек Сәтібаев жаңа қоныс иелеріне пәтер кілтін табыстады. Көпбалалы және толық емес отбасыларға, жетім балалар мен ата-анасының қамқорлығынсыз қалған балаларға, мүгедектігі бар адамдарға, бюджет саласының қызметкерлері мен ардагерлерге басымдық берілді.

Іле ауданында 5 мыңнан астам адам тұрғын үй кезегінде тұр. Билік өкілдері азаматтарды тұрғын үймен қамтамасыз ету жұмысы жүйелі жүргізіліп жатқанын атап өтті. Былтыр әлеуметтік жағдайы осал санаттағы азаматтарға арналған 269 үй мен пәтер сатып алынды. Биыл Өтеген батыр ауылында тағы 144 пәтер беру жоспарлануда.

Жоба партия тарапынан атқарылып жатқан ауқымды жұмыстың бір бөлігі саналады. Былтыр Алматы облысында «AMANAT» партиясының сайлауалды бағдарламасы аясында 28 тұрғын үй мен 1 522 пәтер пайдалануға берілді.

📌«AMANAT» партиясы көппәтерлі үйлерді басқару жүйесін жаңғырту жұмысын күшейтуде

«AMANAT» партиясы тұрғын үй-коммуналдық шаруашылығын жаңғыртуға және көппәтерлі тұрғын үйлерді басқару сапасын арттыруға бағытталған «Тұрғындар аманаты» жобасын жүйелі түрде жүзеге асыру жұмысын жалғастыруда. Астанада партияның Орталық аппараты мен өңірлік филиалдары өкілдерінің, Мәжіліс депутаттарының және өңір әкімдері орынбасарларының қатысуымен кеңес өтті.

«AMANAT» партиясының сайлауалды бағдарламасында тұрғын үй-коммуналдық саланы жаңғырту жұмысы негізгі басымдықтардың бірі ретінде айқындалды. Бүгінде инженерлік желілерді жаңарту, шығындардың ашықтығын арттыру және тұрғын үйлерді басқару жүйесін жетілдіру жұмысы жүргізілуде. Бұл қадам инфрақұрылымның тозуын төмендетіп, қызмет сапасын арттыруға мүмкіндік беріп отыр.

Партия фракциясы атқарған жұмыс аясында «Тұрғын үй қатынастары туралы» Заңға өзгерістер енгізілді. Нәтижесінде, тұрғындардың құқығы заң жүзінде бекітіліп, көппәтерлі үйді басқару нысанын өз бетінше таңдауына, тарифтерді бекітуіне, жұмсалатын қаржыны қадағалауына және басқарушы құрылымдардың қызметі туралы толық әрі нақты ақпарат алуына мүмкіндік берілуде.

«Тұрғындар аманаты» жобасы ел азаматтарының жартысынан астамын қамтиды. Алдағы уақытта өңірлерде әкімдердің қатысуымен форумдар өткізіледі. Сондай-ақ МИБ және ПИК белсенділерін оқыту, тұрғын үйлерді күрделі жөндеуден өткізуге атсалысу, сондай-ақ партия филиалдары жанынан жобаның фронт-офистерін ашу көзделуде.

Бұл жұмыс еліміздің барлық өңірінде кеңінен жүзеге асырылып, «AMANAT» партиясының тұрақты бақылауында болады.

✔️Жаңа Конституция жобасында «адам мемлекет үшін емес, мемлекет адам үшін» қағидаты айқындала түсті – Президент

Бұл туралы Мемлекет басшысы Қасым-Жомарт Тоқаев Үкіметтің кеңейтілген отырысында айтты.

Президент Жаңа Конституция, ең алдымен, «Күшті Президент – ықпалды Парламент – есеп беретін Үкімет» тұжырымдамасына негізделетінін атап өтті.

«Соңғы жылдардағы саяси реформаларға кеңінен қарасақ, Қазақстан суперпрезиденттік билік формасынан түбегейлі бас тартып, беделді әрі ықпалды Парламенті бар президенттік республика үлгісіне көшкеніне көз жеткізуге болады. Ұсынылып отырған өзгерістер – осы үдерістің заңды жалғасы», – деді ол.

Қасым-Жомарт Тоқаевтың айтуынша, соңғы жылдардағы саяси жаңғыртулар, соның ішінде 2022 жылғы конституциялық реформа мемлекетіміздің конституциялық негізін толық қайта құру қажет екенін көрсетеді.

«Бұл – мемлекетті басқарудың жаңа жүйесін қалыптастыру деген сөз. Ұсынылған түзетулер билік құзыреттерін қайта бөлуге, тежемелік және тепе-теңдік жүйесіндегі теңгерімді күшейтуге, ең бастысы, барлық саяси институттардың тиімділігі мен орнықтылығын жақсартуға мүмкіндік береді»

, – деді ол.

Президент Жаңа Конституция жобасында «адам мемлекет үшін емес, мемлекет адам үшін» қағидаты айқындала түскенін мәлімдеді.

🗣Мемлекет басшысы: Жаңа инвестициялық кезеңді бастауымыз керек

Бұл туралы Президент Қасым-Жомарт Тоқаев Үкімет отырысында мәлімдеді.

Ол елдегі инвестициялық ахуал жалпы алғанда тұрақты екенін атап өтті. 2022 жылдан бері тартылған тікелей инвестиция көлемі 84 миллиард доллардан асып, негізгі капиталға салынған қаражат шамамен 50 пайызға артты. Алайда былтыр елімізге тартылған тікелей инвестицияның көлемі өссе де, оның қарқыны әлі де баяу болып тұр.

«Мемлекет жеке капитал рөлін өзіне алудан бас тартуы қажет. Жеке капитал тартуға қолайлы жағдай жасау үшін біраз еңбектену қажет. Ал қаржыны қазынадан алып, оны инвестиция деп көрсете салу әлдеқайда оңай. Ауырдың үстімен, жеңілдің астымен жүрмей, нарықтық экономика қағидаттарына бағыну қажет», – деді Қасым-Жомарт Тоқаев.