Jizzax viloyati hokimi rahbarligida hududlarda paxta hosilini qisqa muddatlarda va nobudgarchiliksiz yig‘ib olish bo‘yicha amalga oshirilayotgan ishlar muhokama qilindi.

Mavsumning ayni qizg‘in pallasida terim sur’atlarini yanada oshirish, mavjud texnika va imkoniyatlardan samarali foydalanish, mexanizatorlar mehnatini munosib rag‘batlantirish hamda terim jarayonida yuzaga kelayotgan masalalarni tezkor hal etish vazifalari belgilab berildi.

Bugungi kunga qadar viloyatda 92 ming tonna, ya’ni 26,4 foiz paxta terib olingan. Kunlik terim hajmi 12,9 ming tonnani tashkil etmoqda.

Ayrim hududlarda kunlik terim sur’atlarini oshirish uchun mavjud imkoniyatlardan yanada samarali foydalanish zarurligi ta’kidlandi. Xususan, paxta terish mashinalarining ish unumdorligini oshirish, texnikalardan tunu kun samarali foydalanish va qo‘shimcha mexanizatorlarni jalb etish muhim vazifalardan biri sifatida qayd etildi.

Tahlillarga ko‘ra, ayrim mexanizatorlar qo‘shimcha sheriklar bilan navbat asosida ish tashkil etib, bir sutkada 60–70 tonnagacha paxta terib olmoqda. Bu tajribani boshqa hududlarda ham keng qo‘llash orqali mavjud texnikalardan yanada samarali foydalanish mumkin.

Shu bilan birga, paxta terish mashinalarini tashish texnikalari bilan ta’minlash, qabul maskanlarida texnikalarning navbatda turib qolishining oldini olish va ish jarayonini uzluksiz tashkil etish bo‘yicha mas’ullarga vazifalar yuklatildi.

Terim jarayonida yoqilg‘i ta’minotini barqaror yo‘lga qo‘yish, maxsus texnikalar orqali dalalarga yoqilg‘i yetkazib berish va mavsum davomida uzilishlarga yo‘l qo‘ymaslik bo‘yicha ham aniq topshiriqlar berildi.

Mexanizatorlar mehnatiga haq to‘lash masalasiga ham alohida e’tibor qaratildi. Hozirga qadar 2,8 milliard so‘m ish haqi to‘langan. Mehnat haqini o‘z vaqtida, belgilangan tartibda plastik kartalar orqali to‘lab borish hamda terim bilan bog‘liq moliyaviy hisob-kitoblarni tizimli tashkil etish zarurligi ta’kidlandi.

Shuningdek, terilgan paxtani rasmiylashtirish ishlarini jadallashtirish, PQ-17 hujjatlari va hisob-fakturalarni o‘z vaqtida rasmiylashtirish hamda ushbu jarayonni kunlik nazoratga olish vazifasi qo‘yildi.

Paxta qabul qilish maskanlarida elektr ta’minoti barqarorligini ta’minlash, mavsum davomida uzilishlarga yo‘l qo‘ymaslik bo‘yicha mas’ul tashkilotlarga aniq vazifalar yuklatildi.

Viloyat va tumanlar ishchi guruhlari tomonidan fermer xo‘jaliklari bilan shartnomaviy rejalarni bajarish bo‘yicha manzilli ishlar davom ettirilmoqda.

Hudud rahbarlari va mas’ul tashkilotlarga paxta terimi sur’atini yanada oshirish, mavjud texnikadan to‘liq foydalanish, aniqlangan masalalarni tezkor hal etish hamda mavsumni uyushqoqlik bilan yakunlash bo‘yicha vazifalar belgilab berildi.

Asosiy maqsad — yetishtirilgan paxta hosilini qisqa muddatda, sifatli va nobudgarchiliksiz yig‘ib-terib olishdir.

Jizzax viloyatida "Yashil makon” umummilliy loyihasini yangi bosqichga olib chiqish, kuzgi ko‘chat ekish mavsumini uyushqoqlik bilan tashkil etish va hududlarni yanada ko‘kalamzorlashtirish masalalari viloyat hokimi Ulug‘bek Mustafoyev rahbarligida ko‘rib chiqildi.

O‘tgan bahorgi mavsumdagi ayrim kamchiliklar tahlil qilinib, asosiy e’tibor ko‘chatlar soniga emas, ularning qayerga va qanday sharoitda ekilishi, suvi hamda keyingi parvarishiga qaratilishi ta’kidlandi.

Joriy yil kuzida viloyatda 10,8 million tup ko‘chat ekish rejalashtirilgan. Bu bahorgi mavsumdagi 5,9 million tuplik rejaga nisbatan qariyb ikki barobar ko‘p.
Ko‘chatlar mahallalar, fermer xo‘jaliklari dala chetlari, yangi bog‘ va tutzorlar, o‘rmon xo‘jaliklari, avtomobil va temir yo‘llar bo‘ylari, sanoat korxonalari atrofi, kanal va ariqlar sohillari, ta’lim hamda tibbiyot muassasalari hududlariga ekiladi.

Jumladan, 3,9 million tup ko‘chat bog‘ va tutzorlar barpo etishga, 1,6 million tupi mahallalarga, 1,8 million tupi fermerlar dala chetlariga yo‘naltiriladi.

Hokimlar va soha rahbarlariga ko‘chat ekiladigan joylarni o‘n kun muddatda tayyorlash, sug‘orish masalalarini hal etish va yetarli ko‘chat zaxirasini yaratish vazifasi yuklatildi.

"Yashil makon”ning samarasi jamoatchilikning faol ishtirokiga ham bog‘liq. Shu maqsadda mahalla faollari, nuroniylar, faxriylar va jamoatchilik vakillarining ishtiroki kuchaytiriladi. Xonadonlar atrofiga daraxt va gullar ekish, mahallalarni ko‘kalamzorlashtirish ishlarida mahalla raislari bosh-qosh bo‘ladi.

23-sentabrda imzolangan PF-206-sonli Farmonda belgilangan vazifalar doirasida mahallalarda "3-30-300" xalqaro standarti tamoyilini joriy etish — har bir inson hisobiga 3 tupdan daraxt ekish, 30 foiz daraxt soyasini ta’minlash va 300 metr masofada yashil hudud tashkil etish maqsad qilinmoqda.Shuningdek, viloyatning 13 ta mahallasida 3 gektardan maydonda namunaviy "Yashil bog‘”lar barpo etiladi.

Ko‘chat ekish bilan birga atrof-muhitni toza saqlash, chiqindilarni o‘z vaqtida olib chiqish, ariq va zovurlarni tozalash hamda mavjud daraxtlarni asrashga ham e’tibor qaratiladi.
Shu maqsadda 1 oktabrdan "Tozalik va obodonlik” dolzarb oyligi boshlanadi. Unda mahallalar, ko‘p kvartirali uylar atrofi, ijtimoiy soha obyektlari, avtomobil yo‘llari va boshqa jamoat joylarida tozalash va obodonlashtirish ishlari amalga oshiriladi.

Yer maydoni cheklangan hududlarda ko‘p kvartirali uylar oralig‘ida, maktab va bog‘chalar hovlilarida mahalla "mikro-o‘rmon”lari, beton va asfalt qoplamali joylarda esa "Jamoatchilik kichik bog‘lari” tashkil etiladi.

Viloyatda hududlarning yashillik darajasini oshirishga qaratilgan "Yashil dastur”lar ham ishlab chiqiladi. Ularda yangi bog‘lar, soyali sayr ko‘chalari, suv tejovchi sug‘orish tizimlari va daraxtlarni parvarishlash bo‘yicha aniq manzil, mablag‘, muddat va mas’ullar belgilanadi.

Bularning barchasi Jizzaxni yanada yashil, toza va obod hududga aylantirishga xizmat qiladi.

Zero, daraxt ekish — bir kunlik tadbir emas. Unga suv, mehnat va doimiy parvarish kerak. Shuning uchun "Yashil makon”da asosiy mezon ekilgan ko‘chatlar soni emas, ularning ertaga ham yashnab turgani bo‘lishi kerak.

Mas’ullarga belgilangan vazifalar ijrosini nazorat qilish, ishlarni tizimli tashkil etish va natijadorlikni ta’minlash topshirildi.

— "Yashil makon” — bu bugungi vazifa emas, kelajak avlodlarga toza va obod muhit qoldirish mas’uliyatidir, — dedi viloyat hokimi.