ARNASOY AEROPORTI ILK BOR XALQARO REYSNI QABUL QILDI

Aydarko‘l sohilida joylashgan Arnasoy aeroporti rekonstruksiya ishlaridan so‘ng Boeing 737-800 rusumli samolyotni qabul qildi.

Mazkur havo kemasi Dubaydan to‘g‘ridan to‘g‘ri parvoz qilib, Arnasoy aeroportiga qo‘ndi.

Arnasoy aeroportida uchish-qo‘nish yo‘lagi dastlab 1700 metr uzunlik va 30 metr kenglikda qurilgan. Keyinchalik uchish-qo‘nish yo‘lagining uzaytirilishi natijasida aeroportning yirik havo kemalarini qabul qilish imkoniyatlari kengaytirildi.

Aydarko‘l sohilida zamonaviy turistik infratuzilmani shakllantirish, dam olish maskanlari, mehmonxona va servis obyektlarini rivojlantirish bo‘yicha amalga oshirilayotgan loyihalar hududning turistik salohiyatini yanada oshirmoqda. Aeroportning faoliyati esa ushbu hududga keluvchi mehmonlar uchun transport imkoniyatlarini kengaytirishda muhim ahamiyat kasb etadi.

Shuningdek, aeroport infratuzilmasining rivojlanishi turizm bilan bir qatorda, hududning investitsiyaviy jozibadorligini oshirish, xizmat ko‘rsatish sohasini kengaytirish va yangi loyihalarni amalga oshirish uchun qo‘shimcha imkoniyatlar yaratadi.

Boeing 737-800 samolyotining Arnasoy aeroportiga qo‘nishi Aydarko‘l sohilida shakllanayotgan zamonaviy turistik infratuzilmaning yana bir muhim natijasi bo‘ldi.

🌐 Ijtimoiy tarmoqdagi rasmiy sahifalarimiz⭕️
💬Veb-sayt🚀Telegram📷Instagram🔵Facebook🎬You tube