Jizzax viloyatida an’anaviy «Ishbilarmon ayol — 2026» ko‘rik-tanlovining hududiy bosqichi bo‘lib o‘tdi.

Tadbir Tadbirkorlar va ishbilarmonlar harakati — O‘zbekiston Liberal-demokratik partiyasi tashabbusi bilan «Xalq bilan birga!” umummilliy dasturi doirasida tashkil etildi.

Tanlovning dastlabki bosqichida viloyatdagi 304 ta mahallada 4 ming nafardan ortiq xotin-qizning tadbirkorlik faoliyati o‘rganildi.

Tuman va shahar bosqichlarida g‘olib bo‘lgan ishtirokchilar hududiy bosqichda o‘z biznes loyihalari, mahsulotlari va tashabbuslarini namoyish etdilar.

Tanlovdan ko‘zlangan asosiy maqsad — xotin-qizlarning jamiyatdagi o‘rnini mustahkamlash, iqtisodiy va ijtimoiy faolligini oshirish, shuningdek, ularning tadbirkorlik tashabbuslarini qo‘llab-quvvatlashdan iborat.

Hakamlar hay’ati xulosasiga ko‘ra, Arnasoy tumani vakili, "YASMEEN BUILDPOINT” MCHJ rahbari Halima O‘rolboyeva birinchi o‘rinni egallab, 7 million so‘m pul mukofotiga sazovor bo‘ldi.

Ikkinchi o‘rin Jizzax shahri vakili, Ko‘zi ojizlar jamiyatining o‘quv-ishlab chiqarish korxonasi rahbari Nargiza To‘ychiyevaga nasib etdi.

5 million so‘m pul mukofoti bilan taqdirlandi.

Uchinchi o‘rin esa G‘allaorol tumani hunarmandi Barno Narzullayevaga berildi. U 3 million so‘m pul mukofotini qo‘lga kiritdi.

Tanlov yakunida g‘olib va sovrindorlarga faxriy yorliqlar hamda pul mukofotlari topshirildi. Turli nominatsiyalar bo‘yicha g‘oliblar va faol ishtirokchilar ham tashkilotchilarning tashakkurnomalari va esdalik sovg‘alari bilan taqdirlandi.

Mazkur tanlov xotin-qizlarning tadbirkorlik salohiyatini namoyon etish, ularning yangi tashabbuslarini rag‘batlantirish va hudud iqtisodiy rivojiga qo‘shayotgan hissasini e’tirof etishga xizmat qiladi.