Jizzaxda atom energetikasi sohasi uchun yuqori malakali muhandislar tayyorlashga qaratilgan xalqaro ta’lim hamkorligi yangi bosqichga ko‘tarilmoqda. Jizzax politexnika instituti (JIZPI) hamda Moskva muhandislik fizikasi instituti Milliy tadqiqot yadro universiteti o‘rtasida energetika muhandisligi yo‘nalishida «2+2» qo‘shma ta’lim dasturini yo‘lga qo‘yish bo‘yicha kelishuvga erishildi.

Mazkur hamkorlik O‘zbekiston Respublikasi Prezidentining 2025-yil 2 dekabr kuni Jizzax viloyatiga tashrifi davomida JIZPIda atom energetikasi sohasida muhandislik maktabini tashkil etish va yetakchi xorijiy ta’lim muassasasi bilan qo‘shma dasturlarni joriy qilish bo‘yicha bergan topshiriqlari ijrosi doirasida amalga oshirilmoqda.

Topshiriqlar ijrosini ta’minlash maqsadida 2026-yil 13 oktabr kuni JIZPI rektori Alisher Usmonqulov Moskva muhandislik fizikasi instituti Milliy tadqiqot yadro universitetining Toshkent filialiga tashrif buyurib, universitetning birinchi prorektori Oleg Nagornov bilan muzokaralar o‘tkazdi. Uchrashuvda Kurchatov instituti direktori o‘rinbosari Viktor Yegorichev hamda Toshkent filiali direktori Shavkat Abdukamilov ham ishtirok etdi.

Tashrif davomida delegatsiya filialning o‘quv va ilmiy laboratoriyalari, moddiy-texnik bazasi bilan tanishdi. Muzokaralarda muhandislik ta’limi sifatini oshirish, ilmiy hamkorlikni kengaytirish va qo‘shma ta’lim dasturlarini amalga oshirish masalalari muhokama qilindi. Yakunda energetika muhandisligi yo‘nalishida «2+2» modeli asosida qo‘shma ta’lim dasturini yo‘lga qo‘yish bo‘yicha hamkorlik shartnomasi imzolandi.

Ushbu ta’lim modeli talabalarga o‘qishning bir qismini Jizzax politexnika institutida, qolgan qismini esa hamkor universitetda davom ettirish imkonini beradi. Bu orqali ularning nazariy bilimlarini chuqurlashtirish, zamonaviy laboratoriyalarda amaliy ko‘nikmalarini rivojlantirish va xalqaro ta’lim tajribasini o‘zlashtirish uchun sharoit yaratiladi.

Zamonaviy energetika sohasi chuqur bilim, yuksak kasbiy mahorat va ilg‘or texnologiyalarni puxta egallagan muhandislarga ehtiyoj sezadi. Shu nuqtayi nazardan, mazkur hamkorlik mamlakat energetika tarmog‘i uchun malakali mutaxassislar tayyorlash, milliy kadrlar salohiyatini oshirish va Jizzaxda atom energetikasi yo‘nalishida muhandislik ta’limini rivojlantirish yo‘lidagi muhim qadamdir.

Oiladagi bir og‘iz og‘ir so‘z, o‘zaro tushunmovchilik va ranjishlar ba’zan xonadon tinchligiga putur yetkazishi mumkin. Bunday kelishmovchiliklardan esa, eng avvalo, farzandlar aziyat chekadi. Shu bois oilaviy nizolarning oldini olish, oilaviy qadriyatlarni asrab-avaylash muhim ahamiyatga ega.

Jizzax viloyati Do‘stlik tumanidagi Sanoatchilar mahallasida Oilaviy qadriyatlarni mustahkamlash komissiyasi tomonidan ajrim xavfi ostidagi oilalar bilan muntazam uchrashuvlar tashkil etilmoqda. Ularda muammolar tinglanib, kelishmovchiliklarni bartaraf etish va oilalarni qo‘llab-quvvatlash choralari ko‘rilmoqda.

Navbatdagi uchrashuvda to‘rt oila vakillari bilan ochiq muloqot o‘tkazildi. Suhbatlar davomida o‘zaro hurmat, ishonch va murosa, shuningdek, farzandlar manfaatlarini ustuvor qo‘yish masalalariga e’tibor qaratildi.

Natijada ikki oilaning yarashuviga erishildi. Qolgan ikki oilaning muammolarini chuqurroq o‘rganish va amaliy yordam ko‘rsatish uchun qo‘shimcha muddat belgilandi.

Muloqotda mahallaning nuroniy otaxon va onaxonlari ham ishtirok etib, hayotiy tajribalari bilan o‘rtoqlashdilar. Ular oilada sabr-toqat, kechirimlilik va bir-birini tushunishning ahamiyatini ta’kidladilar.

Oilaviy nizolarning oldini olishda muammolarni barvaqt aniqlash, ularning sabablarini bartaraf etish va zarur hollarda mutaxassislar ko‘magidan foydalanish muhimdir. Eng asosiysi, yarashuvning barqarorligini ta’minlash va farzandlar uchun sog‘lom muhit yaratishdir.

Arnasoy tumanida 2027-yil hosili uchun g‘alla ekish mavsumini uyushqoqlik bilan tashkil etish, agrotexnik tadbirlarni o‘z vaqtida va sifatli amalga oshirish masalalariga bag‘ishlangan seminar o‘tkazildi.

Tadbir Hamdo‘stlik, B. Fayziyev hamda Ulug‘bek suv iste’molchilari uyushmalariga qarashli fermer xo‘jaliklari vakillari ishtirokida tashkil etildi. Unda tuman hokimi Odil Musanov va tuman Fermerlar kengashi raisi Munavvar Sobirov qatnashib, yangi mavsumga tayyorgarlik va fermerlar oldida turgan muhim vazifalar yuzasidan fikr almashdilar.

Seminar davomida yer maydonlarini ekishga sifatli tayyorlash, sara urug‘lik dondan foydalanish, yerga ishlov berish hamda ekish ishlarini agrotexnik talablar asosida tashkil etish masalalariga alohida e’tibor qaratildi. Shuningdek, qishloq xo‘jaligi texnikalaridan samarali foydalanish, mavjud resurslarni maqsadli yo‘naltirish va barcha agrotexnik tadbirlarni belgilangan muddatlarda bajarish muhimligi ta’kidlandi.

Ta’kidlanganidek, g‘allachilikda mo‘l va sifatli hosil yetishtirish, avvalo, mavsumga puxta tayyorgarlik ko‘rish, yer unumdorligi va urug‘lik sifatiga e’tibor qaratish hamda agrotexnik qoidalarga qat’iy rioya etishga bog‘liq. Shu bois fermer xo‘jaliklari rahbarlariga ekish jarayonini samarali tashkil etish va belgilangan vazifalarni mas’uliyat bilan bajarish bo‘yicha tavsiyalar berildi.

Seminar yakunida 2027-yil hosili uchun g‘alla ekish ishlarini o‘z vaqtida va sifatli amalga oshirish, mavjud imkoniyatlardan unumli foydalanish hamda mo‘l hosil yetishtirish uchun mustahkam zamin yaratish yuzasidan tegishli vazifalar belgilab olindi.