Arnasoy tumanida aholi xonadonlarida chorvachilikni rivojlantirish, nasldor chorva mollari sonini ko‘paytirish va chorva uchun mustahkam ozuqa bazasini yaratish borasidagi ishlarga alohida e’tibor qaratilmoqda.

Tuman hokimi naslli chorvachilik bilan shug‘ullanayotgan, shuningdek, ushbu faoliyatni endi yo‘lga qo‘yayotgan xonadonlarda bo‘lib, aholi bilan muloqot qildi. Uchrashuvlar davomida xonadonlarda chorva mollarini parvarishlash, naslchilik yo‘nalishini rivojlantirish, ozuqa zaxirasini shakllantirish va yem-xashak ta’minotini to‘g‘ri tashkil etish masalalari muhokama qilindi.

Chorvachilikda yuqori samaradorlikka erishish, avvalo, chorva mollarining nasldorligi, parvarishlash sharoiti va ozuqa ta’minotiga bevosita bog‘liq. Shu bois xonadonlarda mavjud imkoniyatlardan oqilona foydalanish, ozuqa zaxirasini oldindan yaratish, chorva mollarini to‘g‘ri oziqlantirish va mahsuldorlikni oshirish muhim ahamiyat kasb etadi.

Bugungi kunda tumanda imtiyozli kreditlar asosida chorvachilik faoliyatini yo‘lga qo‘yayotgan xonadonlar soni ortib bormoqda. Mazkur yo‘nalish aholi bandligini ta’minlash, oilalar daromadini ko‘paytirish, go‘sht va sut mahsulotlari yetishtirish hajmini oshirish hamda xonadonlarda barqaror daromad manbalarini shakllantirish uchun keng imkoniyatlar yaratmoqda.

Tuman hokimi muloqotlar davomida xonadonlarda chorvachilikni yanada rivojlantirish, mavjud muammolarni aniqlash, ozuqa ta’minotini samarali tashkil etish va ajratilgan imkoniyatlardan maqsadli foydalanish muhimligini ta’kidladi.

Belgilangan vazifalarning izchil amalga oshirilishi chorvachilik tarmog‘ida mahsuldorlikni oshirish, aholi farovonligini yuksaltirish va tumanda qishloq xo‘jaligining ushbu muhim yo‘nalishini yanada rivojlantirishga xizmat qiladi.

14–19 oktabr kunlari Turkiyaning Bursa shahrida sportning qo‘l jangi turi bo‘yicha o‘smirlar o‘rtasida Jahon chempionati hamda kattalar o‘rtasida Jahon kubogi musobaqalari bo‘lib o‘tdi.

Dunyoning turli mamlakatlaridan kelgan kuchli sportchilar bahs olib borgan nufuzli xalqaro musobaqalarda Jizzax viloyati Yakkakurash sport turlariga ixtisoslashtirilgan sport maktabi tarbiyalanuvchilari ham munosib ishtirok etib, yuksak natijalarni qayd etdi.

Jumladan, Ergashev Anvar va Ortiqova Sharofat o‘z vazn toifalarida muvaffaqiyatli ishtirok etib, oltin medallarni qo‘lga kiritdi. Nasreddinova Ra’no esa musobaqani kumush medal bilan yakunlab, shohsupaning ikkinchi pog‘onasidan joy oldi.

Shu tariqa, jizzaxlik sportchilar xalqaro maydonda 2 ta oltin va 1 ta kumush medalni qo‘lga kiritib, viloyatimiz sport maktablarida yosh iste’dodlarni tarbiyalash, ularning mahorat va salohiyatini oshirish borasida olib borilayotgan ishlar samarasini yana bir bor namoyon etdi.

Ushbu natijalar sportchilarning muntazam mashg‘ulotlari, murabbiylarning mehnati va izchil tayyorgarligi samarasidir. Jizzaxlik sportchilarning xalqaro musobaqalardagi muvaffaqiyati viloyatimizda sportni rivojlantirish va yoshlarning nufuzli musobaqalarda munosib ishtirok etishi uchun yaratilayotgan imkoniyatlarning muhim natijalaridan biridir.

G‘olib va sovrindor sportchilarimizni ushbu yutuq bilan tabriklaymiz hamda ularga kelgusi musobaqalarda ham ulkan zafarlar tilaymiz!