Paxtakor tumanidagi 8-sonli maktabga yaqinlaşganimizda tuş payti edi. Boşlanğiç sinflarda darslar tugagan, öqituvçilar ham kunlik işlarini yakunlayotgan bölişi mumkin. Şu payt maktab köçasida ketayotgan bir ayolni körib, hamrohimiz xizmat maşinasini töxtatdi.

— Şirinoysiz-a? — degan savol bilan boşlangan tanişuv bizni «Yil öqituvçisi — 2026» körik-tanlovi ğoliblaridan biri, boşlanğiç sinf öqituvçisi Şirinoy Muxtarova bilan uçraştirdi.

U juda şoşayotganini, uyda bir yoşli farzandi kutayotganini aytdi. Biz esa suhbatni köp çözmaslikka kelişdik.

Şirinoyning bu ğalabaga erişiş yöli oson keçmagan. Tanlovning saralaş bosqiçlarida u hali bir oylik çaqaloği bilan iştirok etgan. Oila taşvişlari, farzand parvarişi va kasbiy sinovlarni birdek uddalab, respublika bosqiçigaça yetib borgani uning irodasi va qat’iyatidan dalolat beradi.

— Öqituvçilikka maktab davrimdanoq mehr qöyganman. Ilk ustozim amakim bölganlar. U kişining dars ötiş uslubi, öquvçilar bilan munosabati menga katta ta’sir qilgan. Hatto uyga kelib, ukalarim va singillarimga dars ötardim, — deydi u.

Asli Foriş tumanidan bölgan Şirinoy maktabni tamomlagaç, oliy ta’lim muassasasining boşlanğiç ta’lim yönalişida tahsil oldi. 2018-yildan Paxtakor tumanida pedagogik faoliyatini boşladi. Tinimsiz izlaniş va öz ustida işlaş natijasida oliy toifali pedagog darajasiga erişdi, milliy sertifikat sohibi böldi.

Joriy yildagi «Yil öqituvçisi» tanlovida ham öz bilimi va mahoratini namoyon etib, ğoliblar qatoridan joy oldi.

— Turmuş örtoğimning qöllab-quvvatlovisiz bu natijaga erişa olmasdim. Ayniqsa, kenjatoyimizga qaraşda katta yordam berdilar. Tanlovga tayyorlanişim uçun barça şaroitlarni yaratib, menga işonç bildirdilar, — deydi Şirinoy.

Quvonarlisi, uning turmuş örtoği Şohrux Rahmonov ham boşlanğiç ta’lim yönalişini tamomlagan pedagog. Ular bir maktabda faoliyat yuritişadi. Oilada uç nafar farzand tarbiyalanayotgan bölsa, ota-ona maktabda ham, xonadonda ham yoş avlod kamoli uçun mas’uliyatni his etib yaşaydi.

Şirinoyning yutuği ortida oilaviy hamjihatlik, yaqinlar kömagi va katta mehnat mujassam. Zero, farzand tarbiyasi, rözğor taşvişlari bilan birga mas’uliyatli tanlovga tayyorlaniş har kimdan ham qat’iyat talab etadi.

Tanlovdagi yuqori natijalari uçun Şirinoy Muxtarova 52 ming AQŞ dollari miqdoridagi pul mukofoti bilan taqdirlandi. Oila uşbu mablağ evaziga uç xonali xonadon xarid qilişni rejalaştirmoqda.

Uning özi esa erişilgan natijani faqat moddiy mukofot bilan baholamaydi. Şirinoy uçun tanlov jarayonida orttirilgan bilim, tajriba va kasbiy mahorat ham alohida ahamiyatga ega.

— Men uçun eng qimmatli natija — egallagan bilimlarim va orttirgan tajribam. Buning barçasi öquvçilarga sifatli ta’lim berişimda asqotadi. Bu hali boşlanişi, oldimizda köplab marralar bor. Barkamol avlodni tarbiyalaş, Vatanimiz nomini dunyoga tanitadigan yoşlarni kamol toptiriş yölida yanada köproq mehnat qilişimiz kerak, — deydi u.

Şirinoy Muxtarovaning hayot yöli maqsadga sadoqat, tinimsiz izlaniş va oila qöllab-quvvatlaşi insonni yuksak marralarga yetaklaşini körsatadi. Uning ğalabasi nafaqat şaxsiy muvaffaqiyat, balki öz kasbiga mehr bilan xizmat qilayotgan ustozlar uçun ham munosib ibratdir.