Jizzax şahridagi 3-umumta’lim maktabida «Öz boğingni östir» respublika ekotanlovining yakuniy tadbiri bölib ötdi.

«Nestlé» kompaniyasi tomonidan Ekologiya va iqlim özgarişi milliy qömitasi hamda Respublika ta’lim markazi hamkorligida amalga oşirilayotgan «Salomatlik yönalişlari» ta’lim loyihasi doirasidagi mazkur tanlov öquvçilarda tabiatga mehr, ekologik madaniyat va atrof-muhitga mas’uliyatli munosabatni şakllantirişga qaratilgan.

Tanlovda öquvçilar ustozlari kömagida ekologik mavzudagi ijodiy plakatlar tayyorlab, öz bilim va qobiliyatlarini namoyon etdilar. Quvonarlisi, ğoliblar safidan Jizzax şahridagi 3-maktab öquvçilari ham örin oldi.

Tadbir yakunida öquvçilar, pedagoglar, ota-onalar va mehmonlar iştirokida maktab hududiga daraxt köçatlari ekildi.

Mazkur taşabbus yoş avlodda ekologik mas’uliyatni kuçaytiriş, tabiatni asraş va yaşil hududlarni kengaytirişga bölgan qiziqişni oşirişga xizmat qiladi.

Har bir xalq tarixida öz umri, mehnati va iste’dodi bilan el xotirasida çuqur iz qoldirgan siymolar böladi. Atoqli davlat va jamoat arbobi, taniqli adib Şarof Raşidov ana şunday tarixiy şaxslardan biridir. Uning hayoti va ijodini birlaştiruvçi asosiy ğoya — Vatan va xalq taqdiriga daxldorlik, yurtga sadoqat va inson qadrini uluğlaşdir.

1917-yil 6-noyabrda Jizzaxda tavallud topgan Şarof Raşidovning adabiy faoliyati ötgan asrning 30-yillari ikkinçi yarmida boşlangan. «Samarqand kuylari», «Ölkam», «Orzuimiz» kabi asarlari, uruş yillarida esa «Qahrim» töplami uning ijodiy izlanişlarida muhim örin tutdi.

Şoir Vatanga muhabbatni insonning hayoti, orzu-intilişlari va yurt oldidagi mas’uliyati bilan boğliq holda tarannum etdi:

Sadoqatim nurday tovlanur,
Bizga boqqan zavq ila Vatan.
Unga mening muhabbatim zör,
Fido bölsin unga jonu tan.

Uşbu misralarda sadoqat va muhabbat yuksak e’tiqod darajasida ifodalanadi. «Nurday tovlanur» taşbehi sadoqatning pokligi va yoruğligini anglatsa, «Fido bölsin unga jonu tan» misrasi Vatanga muhabbatning inson ma’naviy burçiga aylanganini körsatadi.

Ikkinçi jahon uruşi yillarida bu mavzu şoir ijodida yanada keskin ruh kasb etdi. 1945-yilda naşr etilgan «Qahrim» töplamida davrning oğir sinovlari, duşmanga nafrat va kuraşçanlik kayfiyati aks etdi:

Agar jangdan qaytsam orqamga,
La’nat öqing, yaşaşim bekor

Bu satrlarda şaxsiy taqdirni Vatan himoyasi bilan boğlaş, burçga sodiq qoliş ğoyasi yetakçilik qiladi. Şoir talqinida jasorat nafaqat jang maydonidagi matonat, balki insonning öz e’tiqodiga sodiqligi hamdir.

Şarof Raşidov ijodi şe’riyat bilan çeklanmaydi. «Börondan kuçli», «Qudratli tölqin», «Ğoliblar» kabi nasriy asarlarida inson taqdiri, mehnat va ijtimoiy hayot masalalari muhim örin tutadi. «Kaşmir qöşiği», «Ikki dil dostoni» kabi asarlarida esa muhabbat, gözallik va ezgulikka intiliş tuyğulari badiiy ifodasini topgan.

Adib ijodida Vatanga sadoqat va inson qalbidagi nozik keçinmalar bir-birini töldiradi. Uning asarlari ijodkorning insonparvarlik ğoyalari, e’tiqodi va hissiy olamini namoyon etadi.

Şarof Raşidovning adabiy merosini örganiş — uning ijodini tarixiy davr bilan boğliq holda anglaş, asarlaridagi badiiy obrazlar va insonparvarlik ğoyalarini kaşf etiş demakdir. Zero, Vatanga muhabbat ham, insonga mehr ham qalbdan boşlanadi. Bu tuyğularni söz va ijod orqali ifodalaş esa adabiyotning eng muhim vazifalaridan biridir.

Maktabgaça ta’lim tizimida xususiy sektor iştirokining kengayişi bolalarni maktabgaça ta’lim bilan qamrab oliş, ta’lim xizmatlari sifatini oşiriş va aholi uçun qöşimça imkoniyatlar yaratişda muhim ahamiyat kasb etmoqda.

Milliy statistika qömitasi ma’lumotlariga köra, 2026-yil 1-yanvar holatiga Jizzax viloyatida 1 352 ta oilaviy nodavlat maktabgaça ta’lim taşkiloti faoliyat yuritmoqda.

Uşbu körsatkiç bilan viloyat hududlar kesimida respublikadagi oilaviy nodavlat maktabgaça ta’lim taşkilotlari soni böyiça salomoqli örinni egallagan.

Mamlakatimiz böyiça esa mazkur taşkilotlar soni 29 196 tani taşkil etgan. Bu 2024-yilga nisbatan 467 taga yoki 1,6 foizga köpdir.

Şuningdek, respublikadagi barça maktabgaça ta’lim taşkilotlari soni 39 283 taga yetgan.

Oilaviy nodavlat maktabgaça ta’lim taşkilotlari, ayniqsa, çekka hududlar va mahallalarda bolalarni maktabgaça ta’limga jalb etiş, ota-onalar uçun qulay şaroit yaratiş hamda yangi iş örinlarini taşkil qilişda muhim örin tutadi.

Jizzax viloyatida ham uşbu yönalişda xususiy taşabbuslarni qöllab-quvvatlaş va maktabgaça ta’lim xizmatlari qamrovini kengaytiriş ta’lim sohasini rivojlantirişning muhim yönalişlaridan biri hisoblanadi.