Mamlakatimizda ta’lim sohasini rivojlantirish, zamonaviy ta’lim infratuzilmasini shakllantirish va aholiga sifatli ta’lim xizmatlarini ko‘rsatishga alohida e’tibor qaratilmoqda.

Milliy statistika qo‘mitasi ma’lumotlariga ko‘ra, 2026-yilning yanvar–iyul oylarida Jizzax viloyatida ta’lim sohasida ko‘rsatilgan xizmatlar hajmi 361,8 mlrd so‘mni tashkil etdi.

Ushbu ko‘rsatkich viloyatda ta’lim xizmatlariga bo‘lgan talab ortib borayotgani, ta’lim muassasalari faoliyati va sohada ko‘rsatilayotgan xizmatlar ko‘lami kengayib borayotganini ko‘rsatadi.

Mazkur davrda O‘zbekiston bo‘yicha ta’lim xizmatlari hajmi 27,2 trln so‘mni tashkil etib, 2025-yilning mos davriga nisbatan 18,4 foizga oshgan.

Ta’lim xizmatlari tarkibida oliy ta’lim sohasidagi xizmatlar eng yuqori ulushga ega bo‘lib, jami ta’lim xizmatlarining 41,2 foizini tashkil etgan.

Hududlar kesimida Jizzax viloyatida qayd etilgan 361,8 mlrd so‘mlik ko‘rsatkich ta’lim sohasidagi xizmatlar hajmi bo‘yicha respublika hududlari orasidagi mavjud ko‘rsatkichlardan birini tashkil etadi.

Ta’lim sifatini oshirish, yoshlarga zamonaviy bilim va kasbiy ko‘nikmalar berish, oliy va professional ta’lim imkoniyatlarini kengaytirish kelgusida ham hudud taraqqiyotining muhim yo‘nalishlaridan biri bo‘lib qoladi.

Forish tumanida aholi bandligini ta’minlash, xonadonlarning daromad manbalarini oshirish hamda kambag‘allikni qisqartirish borasida amalga oshirilayotgan ishlar o‘rganildi.

Huquqni muhofaza qiluvchi organlar mas’ullari hamda shtab a’zolari ishtirokida dastlab tuman hokimligida yig‘ilish o‘tkazildi. Unda hududda aholi bandligini ta’minlash, daromad manbalarini ko‘paytirish, kambag‘allikni qisqartirish yo‘nalishidagi ishlar tanqidiy-tahliliy muhokama qilinib, mavjud muammolar va ularni manzilli hal etish choralari belgilab olindi.

Shuningdek, "O‘zbekiston” mahallasida xonadonbay o‘rganishlar olib borildi. Jarayonda fuqarolarning bandligi, mavjud muammolari va ehtiyojlari o‘rganilib, ularni doimiy daromad manbaiga ega qilish bo‘yicha aniq vazifalar belgilandi.

Mas’ullarga har bir xonadon bilan individual ishlash, aniqlangan muammolarni tezkor bartaraf etish, aholi uchun munosib va barqaror daromad manbalarini yaratish bo‘yicha tegishli topshiriqlar berildi.

Belgilangan vazifalar ijrosi ustidan tizimli monitoring o‘rnatilib, aholi farovonligini oshirish va kambag‘allikni qisqartirish borasidagi ishlar izchil davom ettiriladi.

Jizzax viloyati Ichki ishlar boshqarmasi boshlig‘i ishtirokida G‘allaorol tumani Ichki ishlar bo‘limi shaxsiy tarkibi bilan xizmat yig‘ilishi o‘tkazildi. Yig‘ilishda hududda tinchlik va osoyishtalikni ta’minlash, jamoat xavfsizligini yanada mustahkamlash, huquqbuzarliklarning barvaqt oldini olish hamda ichki ishlar organlarining aholi oldidagi mas’uliyatini oshirish bilan bog‘liq masalalar atroflicha muhokama qilindi.

Yig‘ilishda avvalo, O‘zbekiston Respublikasi Prezidenti tomonidan shu yil 14 sentyabr kuni qabul qilingan 314-son qarorda belgilangan vazifalarning mazmun-mohiyatiga e’tibor qaratildi. Qarorda belgilangan ustuvor vazifalardan kelib chiqib, har bir hududda xavfsizlikni ta’minlashga tizimli va yangicha yondashish, mavjud muammolarni chuqur tahlil qilish va ularning sabablarini barvaqt aniqlash zarurligi ta’kidlandi.

Shuningdek, G‘allaorol tumanida jamoat xavfsizligini ta’minlashning samarali tizimini yo‘lga qo‘yish, aholi gavjum joylar, ko‘cha va jamoat hududlarida osoyishtalikni ta’minlash, huquqbuzarliklarga olib keluvchi omillarni aniqlash va ularni bartaraf etish bo‘yicha profilaktik choralarni kuchaytirish masalalari muhokama qilindi. Yig‘ilishda jinoyat va huquqbuzarliklarning oldini olishda profilaktik yondashuvga alohida urg‘u berildi. Ichki ishlar xodimlaridan fuqarolar murojaatlariga befarq bo‘lmaslik, har bir murojaatni chuqur o‘rganish, muammoning yechimini topishga amaliy hissa qo‘shish va aholi bilan ochiq muloqotni kuchaytirish talab etildi.

Shuningdek, xizmat intizomi va qonuniylikni ta’minlash masalasiga ham alohida to‘xtalib o‘tildi. Shu bilan birga, profilaktika inspektorlari, patrul-post xizmati, yo‘l harakati xavfsizligi va boshqa xizmatlar o‘rtasidagi hamkorlikni yanada kuchaytirish, hududdagi kriminogen vaziyatni doimiy tahlil qilib borish hamda xavfli tendensiyalarga nisbatan tezkor chora ko‘rish bo‘yicha vazifalar belgilab berildi.

Prezidentimiz Shavkat Mirziyoyevning 2025-yil 2 dekabr kuni Jizzax viloyatiga tashrifi doirasida belgilangan muhim vazifalar hududda ta’lim sohasini yangi bosqichga olib chiqish, yoshlarga zamonaviy bilim va kasbiy ko‘nikmalar berishga keng yo‘l ochdi. Bugun bu vazifalar Jizzax politexnika instituti misolida bosqichma-bosqich amaliy natijaga aylanmoqda.

Eng muhim o‘zgarishlardan biri — ta’limning auditoriya doirasidan chiqib, ishlab chiqarish va zamonaviy texnologiyalar bilan yaqinlashib borayotganidir.

2025–2026 o‘quv yilida tashkil etilgan "Avtomobilsozlik muhandislik maktabi” buning yaqqol namunasidir. O‘quv rejalari va fan dasturlari ishlab chiqarish ehtiyojlari asosida takomillashtirilmoqda.

Institutda professor-o‘qituvchilar salohiyatini oshirishga ham alohida e’tibor qaratilmoqda. 130 dan ortiq o‘qituvchi xorijiy OTMlarda malakasini oshirib qaytdi, 80 dan ortiq xorijiy OTM professor-o‘qituvchilari institutga tashrif buyurdi. Xalqaro hamkor OTMlar soni 60 dan oshdi.

Ta’lim imkoniyatlari zamonaviy laboratoriyalar bilan ham boyitilmoqda. Xususan, sun’iy intellekt laboratoriyasi uchun 4 milliard so‘mlik jihozlar olib kelindi, yana 6 milliard so‘mlik jihozlar kelishi kutilmoqda.

Talabalarni turarjoy bilan ta’minlash qamrovi esa 100 foizni tashkil etmoqda.
Bugungi bitiruvchi uchun bir diplom bilan cheklanib qolish yetarli emas. Shu maqsadda talabalarga IT, sun’iy intellekt, robototexnika va mexatronika, elektriklik, payvandchilik, santexnik-chilangarlik, 1S buxgalteriya, xorijiy tillar kabi yo‘nalishlarda qo‘shimcha kasb va xalqaro sertifikatlarni egallash imkoniyatlari yaratilmoqda.

Bu imkoniyatlar o‘z samarasini bermoqda. 2025–2026 o‘quv yilida 1 nafar talaba Prezident davlat stipendiyasi, 4 nafar Beruniy, 1 nafar Islom Karimov nomidagi davlat stipendiyasi sovrindori bo‘ldi. Yana bir talaba "Ulug‘bek vorislari” loyihalar tanlovining respublika bosqichida g‘oliblikni qo‘lga kiritdi.

Institutning xalqaro aloqalari ham kengaymoqda. Talabalar Slovakiya, Vengriya, Turkiya, Malayziya, Rossiya, Xitoy, Polsha, Qozog‘iston va Qirg‘izistondagi ta’lim dasturlarida ishtirok etmoqda. Jumladan, 3 nafar talaba "Stipendium Hungaricum” dasturi asosida magistraturada o‘qish imkoniyatiga ega bo‘ldi.

Yoshlar xalqaro musobaqalarda ham munosib natijalar ko‘rsatmoqda. 2026-yil iyun oyida Ostonada o‘tkazilgan IEIIC robototexnika musobaqasida 2 nafar talaba 2-o‘rinni egalladi. Sportda esa institut talabalari Muay-tay, para yengil atletika, ushu va boshqa yo‘nalishlarda respublika hamda xalqaro musobaqalarda sovrindor bo‘ldi.

Mazkur natijalarni birlashtirib turgan asosiy maqsad — yoshlarning salohiyatini ro‘yobga chiqarish va zamonaviy muhandislarni tayyorlash.

Bugun Jizzax politexnika institutida bilim, zamonaviy texnologiya, xalqaro tajriba va kasbiy ko‘nikmalar bir nuqtada — yangi avlod muhandisini tayyorlash maqsadi atrofida birlashmoqda.