G‘ALLAOROLDA UZUMCHILIK RIVOJILANIB, YANGI TOKZORLAR VA EKSPORT SALOHIYATI OSHMOQDA

Joriy yilda G‘allaorol tumanida 907 gektar yer maydoni qayta o‘zlashtirilib, qishloq xo‘jaligi foydalanishiga kiritilmoqda. Natijada 302 gektar bog‘zor va 510 gektar yangi tokzor barpo etiladi. Ayni paytga qadar 596 gektar yer maydoni o‘zlashtirildi.

Bugungi kunda tumandagi xo‘jaliklarda jami 4 496 gektar tokzor mavjud bo‘lib, shundan 1 270 gektari hosil beradigan, 3 226 gektari esa yosh tokzorlardan iborat.

— Bu yil sohibkorlarimiz qariyb 16 ming tonna uzum yetishtirib, yig‘ishtirib olishni maqsad qilgan. Mahsulotlar ichki bozor bilan bir qatorda Rossiya Federatsiyasi va Yevropa mamlakatlariga eksport qilinadi, — deydi tuman hokimligining qishloq va suv xo‘jaligi masalalari bo‘yicha bosh mutaxassisi Akbar Ro‘ziboyev.

2026-yilda intensiv texnologiyalar asosida 420,6 gektar yangi bog‘zor va 179,3 gektar tokzor barpo etish loyihalari amalga oshirilishi rejalashtirilgan. Buning natijasida 550 ta yangi ish o‘rni yaratiladi.

Shuningdek, "Xonimqo‘rg‘on” QFY hududida "Qo‘shrabot agrostar” MCHJ tomonidan 50 gektar lalmi maydonda 5,5 milliard so‘mlik loyiha asosida zamonaviy intensiv tokzor barpo etiladi. Loyiha doirasida suv tejovchi texnologiyalar joriy qilinib, muzxona, quritish sexi va logistika markazi tashkil etiladi. Natijada 100 nafar mahalliy yoshning bandligi ta’minlanadi.

Ayni paytda tumanda uzumchilik yo‘nalishida 154 ta fermer xo‘jaligi faoliyat yuritmoqda.

Shunday xo‘jaliklardan biri «Guliston” FXHU hududidagi "Dilshodbek o‘rikzori” fermer xo‘jaligidir. Xo‘jalik rahbari Ilhom Mustanov 15 yildan buyon toyifi uzum navini yetishtirib kelmoqda.

Xo‘jalikning 9,8 gektar yeri bo‘lib, shundan 4,5 gektari uzumzor, 4,3 gektari bog‘dan iborat.

— Asosan toyifi uzum navini yetishtirapmiz. Bu yil 15 tonna hosil yig‘ishtirib olishni rejalashtirganmiz, — deydi fermer Ilhom Mustanov.

Toyifi — kechpishar, xo‘raki uzum navlaridan biri bo‘lib, yirik boshlari, sersuv va karsildoq go‘shti bilan ajralib turadi. Navning yana bir muhim xususiyati — saqlash va uzoq masofaga tashishga chidamliligi. Shu bois toyifi uzumi ichki bozor bilan birga eksport uchun ham talab yuqori bo‘lgan mahsulotlardan sanaladi.

G‘allaorolda toyifi uzumi o‘ziga xos brend mahsulot sifatida shakllangan. Ilhom Mustanov xo‘jaligida besh nafar yosh doimiy, yana besh nafar yosh mavsumiy ish bilan ta’minlangan. Uzumchilikdan olinayotgan daromad esa oila farovonligi, farzandlar ta’limi va xo‘jalikni kengaytirishga yo‘naltirilmoqda.

Xo‘jalik a’zolari kelgusi yilda eksportbop uzum navlarini ko‘paytirishni rejalashtirgan. Ayni paytda pishib yetilgan hosil peshma-pesh ichki bozorga chiqarilmoqda.

G‘allaorol dalalaridan qaytar ekanmiz, plantatsiyalarda tillarang tusga kirib pishib yetilgan uzum boshlari ko‘zni quvontirar, bu esa tumanda uzumchilikning tobora rivojlanib borayotganidan darak berardi.

📲https://gov.uz/oz/jizzax sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

BAXMALDA TADBIRKORLAR BILAN OCHIQ MULOQOT O‘TKAZILDI

Joriy yilning 3 sentabr kuni kambag‘allikni qisqartirish, aholi bandligini ta’minlash va daromadlarini oshirish masalalariga bag‘ishlangan videoselektor yig‘ilishida berilgan topshiriqlar ijrosini ta’minlash maqsadida Baxmal tumanida tadbirkorlar bilan ochiq muloqot tashkil etildi.

Unda O‘zbekiston Respublikasi Markaziy banki Boshqaruv raisi o‘rinbosari Sanjar Nosirov hamda Baxmal tumani hokimi Aziz Ergashev ishtirok etdi.

Muloqot davomida hududda tadbirkorlikni rivojlantirish, yangi ish o‘rinlari yaratish, aholi bandligini ta’minlash va daromadlarini oshirish, shuningdek, kambag‘allikni qisqartirish borasida amalga oshirilayotgan ishlar muhokama qilindi.

Tadbirkorlarning faoliyatini kengaytirish, yangi loyihalarni ishga tushirish va mavjud muammolarini hal etish bilan bog‘liq masalalar yuzasidan fikr-mulohazalar tinglanib, ularni qo‘llab-quvvatlash bo‘yicha tegishli vazifalar belgilab olindi.

Ochiq muloqot tadbirkorlar bilan bevosita muloqotni kuchaytirish, ularning tashabbuslarini qo‘llab-quvvatlash va aholi uchun barqaror daromad manbalarini yaratishga qaratildi.

📲https://gov.uz/oz/jizzax sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

JIZZAXDA PAXTA TERIMIDA QO‘L MEHNATIGA TO‘LIQ BARHAM BERILDI

Jizzax viloyati hokimi tashabbusi bilan joriy yilgi paxta yig‘im-terimida qo‘l mehnatiga to‘liq barham berilib, hosil zamonaviy paxta terish kombaynlari yordamida tunu-kun yig‘ib olinmoqda.

Fermerlar bu yondashuvni yuqori baholab, viloyat hokimining paxta terimini to‘liq mexanizatsiyalashtirish borasidagi tashabbusi va amaliy ishlari ular uchun katta yengillik yaratganini ta’kidlamoqda.

Xususan, Mirzacho‘l tumanidagi “Oyqar Arsloni” fermer xo‘jaligida ham paxta hosilini zamonaviy texnikalar yordamida yig‘ib olish ishlari qizg‘in davom etmoqda.

— Qo‘l mehnatiga ehtiyoj qolmadi. Hosilimiz zamonaviy texnika yordamida qisqa muddatda va nobudgarchiliksiz yig‘ib olinmoqda. Buning uchun, avvalo, tashabbus ko‘rsatgan viloyat hokimiga hamda kechayu kunduz mehnat qilayotgan mexanizatorlarga minnatdorchilik bildiramiz, — deydi fermer xo‘jaligi rahbari Shuhrat Soatov.

📲https://gov.uz/oz/jizzax  sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

🎥 Videoreportaj: Jizzaxda muhandislik kommunikatsiyalari sohasi uchun malakali kadrlar tayyorlanmoqda

Jizzax politexnika institutida muhandislik kommunikatsiyalari yo‘nalishida tahsil olayotgan talabalar bilan uchrashuv tashkil etildi. Unda "Hududgaz Jizzax” gaz ta’minoti filiali mas’ullari ishtirok etib, dual ta’lim tizimining afzalliklari, sohada malakali kadrlar tayyorlash va gaz xavfsizligi masalalariga to‘xtaldi.

Shuningdek, muhandislik kommunikatsiyalari sohasi uchun zamonaviy bilim va amaliy ko‘nikmalarga ega mutaxassislar tayyorlash, yoshlarning sohaga qiziqishini oshirish hamda ta’lim muassasasi va ishlab chiqarish tashkilotlari o‘rtasidagi hamkorlikni rivojlantirish masalalari muhokama qilindi.

📹 Batafsil — videolavhada.

📲https://gov.uz/oz/jizzax sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|