Zarbdor tumanida yillar davomida ta’mirtalab holga kelib qolgan asosiy avtomobil yo‘lini yangilash va asfaltlash ishlari olib borilmoqda.

Tuman yo‘llardan foydalanish davlat muassasasi balansidagi D-060 avtomobil yo‘li Oqbuloq, Sharq yulduzi, Adirobod, Nurafshon, Yangikent, Andijon, Oqar va Navbahor mahallalari, shuningdek, Baxt, Oltinko‘l, Koriz va Juvonsiyroq qishloqlarini tuman markazi bilan bog‘laydi.

Mazkur hududlarda istiqomat qiluvchi 40 mingga yaqin aholining ko‘p yillik talab va istaklari inobatga olinib, O‘zbekiston Respublikasi Prezidentining "2026–2027 yillarda Jizzax viloyatini ijtimoiy-iqtisodiy rivojlantirishni jadallashtirish bo‘yicha qo‘shimcha chora-tadbirlar to‘g‘risida”gi PQ-35-son qarori asosida yo‘l infratuzilmasini yaxshilash ishlari boshlandi.

Loyiha doirasida avtomobil yo‘lini yangilash va asfaltlash orqali aholi uchun qulay va xavfsiz harakatlanish sharoitlarini yaratish, olis hududlarni tuman markazi bilan transport aloqasini yaxshilash hamda tadbirkorlik subyektlari uchun logistika imkoniyatlarini kengaytirish ko‘zda tutilgan.

Yangilanayotgan yo‘l nafaqat aholi uchun qulaylik yaratadi, balki mahallalarning iqtisodiy faolligini oshirish, transport qatnovini yaxshilash va hududlarni kompleks rivojlantirishga ham xizmat qiladi.

Zarbdor tumanida aholi hayoti uchun muhim bo‘lgan yo‘l infratuzilmasini yaxshilashga qaratilgan amaliy ishlar izchil davom ettirilmoqda.

So‘nggi yillarda viloyatimizda bitiruvchilari oliy ta’lim muassasalariga 100 foiz qabul qilinayotgan ta’lim maskanlari soni ortib bormoqda. Shunday natijalarga erishayotgan Sharof Rashidov tumani ixtisoslashtirilgan maktabi direktori Nargiza Qarshiboyeva bilan ta’limdagi yutuqlar, samarali tizim va kelgusi maqsadlar haqida suhbatlashdik.

— Nargiza Abdulxatovna, ixtisoslashtirilgan maktabda yuqori natijaga erishishning asosiy omili nimada?

— Iqtidorli o‘quvchilar bilan ishlash, avvalo, katta mas’uliyat. Iqtidorni kashf etishning o‘zi yetarli emas, uni to‘g‘ri yo‘naltirish, bilim va ko‘nikmalarini muntazam rivojlantirish uchun aniq tizim zarur.

Maktabimiz bitiruvchilarining oliy ta’limga kirish ko‘rsatkichi 100 foizni tashkil etadi. O‘tgan o‘quv yilida 40 nafar bitiruvchining barchasi nufuzli oliy ta’lim muassasalari talabasi bo‘ldi. Ularning 26 nafari davlat granti asosida o‘qishga qabul qilindi, 12 nafari esa muddatidan oldin 189 ballni qo‘lga kiritdi. Shuningdek, o‘quvchilarimiz xalqaro va respublika miqyosidagi fan olimpiadalarida ham munosib natijalar ko‘rsatmoqda.

Ayni paytda maktabimizda 438 nafar 5–11-sinf o‘quvchisi tahsil oladi. Ularning 400 nafari turli fanlar bo‘yicha sertifikatlarga ega. 86 nafar o‘quvchida chet tili bo‘yicha sertifikat mavjud. Yaqinda 5-sinf o‘quvchimiz IELTS imtihonidan 7 ball olgani ham quvonarli natija bo‘ldi.

— Bunday natijalarni ta’minlashda pedagoglarning o‘rni qanday?

— Natijaning asosiy omili — malakali va izlanuvchan ustozlar. Maktabimizda 42 nafar oliy va birinchi toifali pedagog faoliyat yuritmoqda. Ulardan doimiy ravishda o‘z ustida ishlash, malakasini oshirish va yuqori natija ko‘rsatish talab etiladi.

Sinflarda 24 nafardan o‘quvchi ta’lim oladi, aniq va tabiiy fanlar guruhlarga bo‘lingan holda o‘qitiladi. Bu har bir o‘quvchi bilan individual ishlash imkonini beradi.

Shuningdek, direktor maslahatchisi tomonidan o‘quvchilarning qobiliyati va qiziqishlari o‘rganilib, ularning kelgusidagi ta’lim yo‘nalishini belgilash bo‘yicha individual rejalar ishlab chiqiladi. Darsdan keyingi qo‘shimcha mashg‘ulotlar ham shu maqsadga xizmat qiladi.

Oliy ta’lim muassasalari bilan hamkorlikka ham alohida e’tibor qaratamiz. Jumladan, Islom Karimov nomidagi Toshkent davlat texnika universiteti bilan hamkorlik doirasida universitet akademiklari maktab o‘qituvchilari va o‘quvchilari uchun onlayn darslar o‘tkazib keldi.

— O‘quvchilarning darsdan tashqari faolligiga ham e’tibor qaratilyaptimi?

— Albatta. Ta’lim jarayonini sport musobaqalari, turli loyihalar va qiziqarli tashabbuslar bilan boyitib borapmiz. “Maktab kubogi”, “Maktab rahbari kubogi” kabi musobaqalar tashkil etilmoqda. Maktab hovlisida katta shaxmat donalari o‘rnatilgan bo‘lib, o‘quvchilar bo‘sh vaqtlarida undan foydalanishlari mumkin.

Yana bir muhim yo‘nalish — amaliy ta’lim. O‘quvchilarimiz In’om va Kumush tomonidan tayyorlangan loyiha “Zamin” xalqaro jamoat jamg‘armasi tanlovida g‘olib bo‘lib, uning doirasida maktabda issiqxona barpo etildi. U yerda o‘quvchilar o‘simliklarni parvarishlash jarayonini amalda o‘rganishlari mumkin.

Maktabimizda fizika, kimyo va biologiya fanlari uchun maxsus laboratoriya xonalari ham mavjud.

— Erishilgan natijalar sizni qoniqtiradimi?

— Yo‘q. Biz yanada yuqori natijalarga intilamiz. Ayni paytda 183 ta ixtisoslashtirilgan maktab reytingida 80-o‘rindamiz. Bu yil har bir indikator bo‘yicha ishlashni maqsad qilganmiz.

Bizning qarashimizda, natija shunchaki raqam emas. Uning ortida o‘quvchining kelajagi bor. Shu bois joriy o‘quv yili uchun “Yuksak maqsad – chuqur bilim – qat’iy intizom – buyuk natija” shiorini belgilab, 438 nafar o‘quvchining kelajagi uchun yanada fidoyilik bilan ishlashni maqsad qilganmiz.

— Mazmunli suhbatingiz uchun rahmat.