1-oktabr — O‘qituvchi va murabbiylar kuni umumxalq bayrami munosabati bilan Jizzax viloyati hokimligi Anjumanlar saroyida tantanali tadbir bo‘lib o‘tdi.

Unda ta’lim sohasida samarali mehnat qilib, yosh avlodga sifatli ta’lim-tarbiya berish va ularning bilim-salohiyatini yuksaltirishga munosib hissa qo‘shayotgan fidoyi pedagoglar ishtirok etdi.

Tadbirda Jizzax viloyati hokimi Ulug‘bek Mustafoyev ustozlarni kasb bayrami bilan samimiy muborakbod etdi.

— Siz azizlarning timsolingizda o‘z hayotini dunyodagi eng mashaqqatli va sharafli kasbga bag‘ishlab kelayotgan barcha viloyatimiz pedagoglarini O‘qituvchi va murabbiylar kuni bilan chin qalbimdan samimiy tabriklayman, — dedi viloyat hokimi.

Mamlakatimizda ta’lim-tarbiya sohasini rivojlantirish, o‘qituvchilar nufuzini oshirish va ular mehnatini munosib rag‘batlantirish ustuvor vazifalardan biriga aylangan. Jizzaxda ham ta’lim sifatini oshirish, zamonaviy maktablar barpo etish, iqtidorli o‘quvchilarni qo‘llab-quvvatlashga alohida e’tibor qaratilmoqda.

Jizzaxlik pedagoglarning mehnati respublika miqyosida ham yuksak e’tirof etilmoqda. Prezidentimiz Farmonlariga muvofiq, bir guruh jizzaxlik ustozlar davlat mukofotlari bilan taqdirlandi.

Jumladan, Zomin tumanidagi 1-maktab jamoatchilik kengashi raisi Ismatulla Raimovga “O‘zbekiston Respublikasida xizmat ko‘rsatgan yoshlar murabbiysi” faxriy unvoni berildi. Jizzax davlat pedagogika universiteti tabiiy fanlar fakulteti dekani Zuhra Yaxshiyeva I darajali “Sog‘lom avlod uchun” ordeni bilan, Yangiobod tumanidagi 7-maktab direktori Tal’at Sulaymonov, Do‘stlik tumanidagi 10-maktab ona tili va adabiyot fani o‘qituvchisi Barno Alibayeva hamda Sharof Rashidov tumani ixtisoslashtirilgan maktabining informatika fani o‘qituvchisi Hasan G‘iyosov “Shuhrat” medali bilan taqdirlandi.

Tantanada “Yil o‘qituvchisi — 2026” kasbiy ko‘rik-tanlovida Jizzax viloyatidan g‘oliblikni qo‘lga kiritgan ustozlarga 616 million so‘m mablag‘ topshirildi.

Shuningdek, viloyat hokimi tashabbusi bilan o‘tgan yildan yo‘lga qo‘yilgan ezgu an’ana davom ettirilib, bitiruvchilarning oliy ta’limga kirish ko‘rsatkichlari yuqori bo‘lgan 3 ta tumanga 100 million so‘mdan,13 ta maktabga 100 million so‘mdan hamda 13 nafar sinf rahbariga 30 million so‘mdan pul mukofotlari berildi.

Ta’limga qaratilayotgan e’tibor natijasida maktabgacha ta’lim bilan qamrov darajasi so‘nggi o‘n yilda 16 foizdan 79 foizga, maktab bitiruvchilarining oliy ta’limga qamrovi 7 foizdan 40 foizga yetdi.

Joriy yilda 1 318 nafar bitiruvchi oliy ta’limga kirish imtihonlarida 150 balldan yuqori natija qayd etgan bo‘lsa, 304 nafari 189,9 ball to‘pladi. Jizzax ushbu ko‘rsatkich bilan respublikadagi kuchli uchlikdan joy oldi.

Tadbirda viloyat hokimi Ulug‘bek Mustafoyev pedagoglarni qo‘llab-quvvatlashga qaratilgan yangi tashabbuslarni ham e’lon qildi.

Unga ko‘ra, o‘quv yili yakunida viloyatdagi eng yaxshi 100 nafar fan o‘qituvchisiga mamlakatimizdagi nufuzli sihatgohlarda dam olish uchun bepul yo‘llanmalar ajratiladi. Shuningdek, 1 000 nafar faol pedagogning Islom sivilizatsiyasi markaziga sayohati tashkil etiladi. Respublika yoki xalqaro fan olimpiadalarida o‘quvchisi birinchi o‘rinni egallagan ustozlarni xorijiy davlatlarga sayohatga yuborish amaliyoti yo‘lga qo‘yiladi.

Tashabbuslar ta’lim sohasida sog‘lom raqobatni kuchaytirish, pedagoglarning o‘z ustida ishlashi va ta’lim sifati oshishiga xizmat qiladi.

Tadbirda faol pedagoglarga tashakkur va rag‘batlar bildirilib, bayram sovg‘alari topshirildi.