“GENDER TENGLIK FAOLI” MILLIY TANLOVINING ARNASOY TUMAN BOSQICHI BO‘LIB O‘TDI

Arnasoy tumanida gender tenglik tamoyillarini keng targ‘ib qilish, xotin-qizlarning huquq va qonuniy manfaatlarini himoya qilish, jamiyatda teng imkoniyatlarni ta’minlash maqsadida “Gender tenglik faoli” milliy tanlovining tuman bosqichi o‘tkazildi.

Tanlovda tumandagi bir qator tashkilot va muassasalar jamoalari faol ishtirok etib, gender tenglikni ta’minlash borasida amalga oshirilayotgan ishlari bilan qatnashdilar.

“Gender tenglikni ta’minlashda eng faol tuman davlat organi” nominatsiyasida Arnasoy tumani 5-sonli Bolalar musiqa va san’at maktabi g‘oliblikni qo‘lga kiritib, tanlovning viloyat bosqichiga yo‘llanma oldi.

Muassasa jamoasiga tanlovning viloyat bosqichida muvaffaqiyat tilaymiz!

🌐 Ijtimoiy tarmoqdagi rasmiy sahifalarimiz⭕️
💬Veb-sayt🚀Telegram📷Instagram🔵Facebook🎬You tube

GENDER TENGLIK — TENG HUQUQ VA IMKONIYATLAR KAFOLATI

Jinoyat ishlari bo‘yicha Arnasoy tumani sudining tergov sudyasi Madina O‘sarboyeva tomonidan Arnasoy tumanidagi “Baxtli” mahalla fuqarolar yig‘inida “Gender tenglik” mavzusida davra suhbati o‘tkazildi.

Tadbir davomida gender tenglik tushunchasi, xotin-qizlar va erkaklarning jamiyatda teng huquq hamda imkoniyatlarga ega bo‘lishi, ularning ta’lim olishi, mehnat qilishi, davlat va jamiyat boshqaruvida ishtirok etishi bilan bog‘liq masalalar haqida tushunchalar berildi.

Shuningdek, O‘zbekiston Respublikasida xotin-qizlar va erkaklarning teng huquqliligi qonun bilan kafolatlangani, fuqarolarning jinsi sababli kamsitilishiga yo‘l qo‘yilmasligi ta’kidlandi.

Ma’ruzada oilada, ta’lim muassasalarida, mehnat jamoalarida va jamiyatda o‘zaro hurmat, adolat va teng munosabatni qaror toptirish, xotin-qizlarga nisbatan tazyiq va zo‘ravonlikning oldini olish hamda ularning huquq va manfaatlarini himoya qilish masalalariga alohida e’tibor qaratildi.

Tadbir yakunida gender tenglik jamiyatda adolat, barqarorlik va farovonlikni mustahkamlashga xizmat qiluvchi muhim tamoyil ekani qayd etildi.

🌐 Ijtimoiy tarmoqdagi rasmiy sahifalarimiz⭕️
💬Veb-sayt🚀Telegram📷Instagram🔵Facebook🎬You tube

O‘RIKLI KO‘CHASI AHOLISI UCHUN YANA BIR MUHIM QULAYLIK

Arnasoy tumani Bobur mahallasidagi O‘rikli ko‘chasi aholisini uzoq yillardan buyon qiynab kelayotgan muammolardan biri — tuman markaziga borishdagi noqulaylik edi.

O‘rikli ko‘chasi tuman markazidan 2 kilometr uzoqlikda joylashgan bo‘lib, aholi markazga borish uchun D-062 avtomobil yo‘lini kesib o‘tib, yo‘lning narigi tomonidagi piyodalar yo‘lakchasidan foydalanishiga to‘g‘ri kelar edi.

Aholi uchun xavfsiz va qulay harakatlanish sharoitini yaratish maqsadida piyodalar yo‘lakchasini avtomobil yo‘lining aholi xonadonlari joylashgan tomoniga ko‘chirish choralari ko‘rilmoqda. Ayni paytda yangi piyodalar yo‘lakchasini barpo etish ishlari boshlangan.

Yangi yo‘lakcha, ayniqsa, maktabga qatnaydigan o‘quvchilar hamda farzandlarini bog‘chaga olib boradigan onalar uchun yo‘lni xavfsiz va qulay kesib o‘tish imkonini yaratadi.

Shu bilan birga, eski piyodalar yo‘lakchasi joylashgan qismni asfaltlashtirish va avtomobil yo‘lini kengaytirish ko‘zda tutilmoqda.

Qurilish ishlarini oktyabr oyi yakuniga qadar yakunlab, yangi piyodalar yo‘lakchasini foydalanishga topshirish rejalashtirilgan.

🌐 Ijtimoiy tarmoqdagi rasmiy sahifalarimiz⭕️
💬Veb-sayt🚀Telegram📷Instagram🔵Facebook🎬You tube

Arnasoy tumani hokimi “Turizm fidoyisi” ko‘krak nishoni bilan taqdirlandi

Arnasoy tumani hokimi Odil Musanov turizm sohasini rivojlantirishga qo‘shgan hissasi uchun “Turizm fidoyisi” ko‘krak nishoni bilan taqdirlandi.

O‘zbekiston Respublikasi Turizm qo‘mitasi raisining tegishli buyrug‘iga asosan, mazkur mukofot tuman hokimiga turizm yo‘nalishidagi sa’y-harakatlari va hududning sayyohlik salohiyatini oshirishga qo‘shgan hissasi uchun topshirildi.

Aytish joizki, bir necha yil avval ijtimoiy-iqtisodiy ko‘rsatkichlari bilan murakkab hududlardan biri bo‘lgan Arnasoy bugungi kunda nafaqat turizm, balki tadbirkorlik, qishloq xo‘jaligi, infratuzilma va boshqa yo‘nalishlarda ham jadal rivojlanayotgan tumanlardan biriga aylanmoqda.

Ayniqsa, Aydar–Arnasoy ko‘llari hududida turizm salohiyatidan samarali foydalanish bo‘yicha keng ko‘lamli ishlar amalga oshirilmoqda. Bugungi kunda “Aydarko'l Resort” faoliyati orqali tumanga yiliga qariyb 400 ming nafar turist tashrifi ta’minlanmoqda.

Shuningdek, hududda aeroport qurilishi, temiryo‘l tarmog‘ini barpo etish ishlari olib borilmoqda. Baxtli mahallasidagi Navro‘z qo‘rg‘onida “Turizm qishlog‘i” loyihasi doirasida ham qurilish ishlari davom etmoqda.

Mazkur e’tirof Arnasoyda turizmni rivojlantirish, yangi sayyohlik yo‘nalishlarini tashkil etish va hududning turistik imkoniyatlarini kengaytirish borasidagi ishlarning munosib bahosi bo‘ldi.

🌐 Ijtimoiy tarmoqdagi rasmiy sahifalarimiz⭕️
💬Veb-sayt🚀Telegram📷Instagram🔵Facebook🎬You tube