Ustozning qadri uning shogirdlari yutug‘ida namoyon bo‘ladi. Ayniqsa, tarix fani o‘qituvchisining mas’uliyati katta. Zero, u yosh avlodga nafaqat o‘tmish haqida bilim beradi, balki milliy xotira, Vatanga muhabbat va ajdodlarga hurmat tuyg‘ularini ham singdiradi.

Zarbdor tumanidagi 1-umumta’lim maktabi tarix fani o‘qituvchisi, "Shuhrat” medali sohibi Nuriddin Bosimov ana shunday fidoyi ustozlardan. 1964-yilda Zomin tumanida tug‘ilgan ustoz mehnat faoliyatini ta’lim sohasida boshlagan. 21 yildan buyon Zarbdor tumanidagi 1-maktabda yoshlarga tarixdan saboq berib kelmoqda.

— Tarix fani oddiy sanalar va voqealar majmui emas. Tarixni o‘rgangan inson kechagi kunni anglaydi, bugunni qadrlaydi va ertangi kun haqida mushohada yuritadi. Shu bois darslarimda o‘quvchilarni voqealar mohiyatini anglashga, mustaqil fikrlash va izlanishga undashga harakat qilaman, — deydi ustoz.

Nuriddin Bosimovning shaxsiy kutubxonasida 2000 dan ziyod badiiy, siyosiy va tarixiy adabiyot jamlangan. Ko‘p yillik pedagogik tajribasi samarasi o‘laroq, uning o‘nlab shogirdlari fan olimpiadalarida munosib natijalarga erishib kelmoqda. Tuman maktablari tarix fani o‘qituvchilari hamkorligida o‘tkazilayotgan "Semurg‘” olimpiadasi ham yoshlarning bilim va iqtidorini namoyon etishga xizmat qilmoqda.

Ustozning samarali mehnati munosib e’tirof etilgan. 2025-yilda "Xalq ta’limi a’lochisi” unvoniga sazovor bo‘lgan Nuriddin Bosimov Mustaqilligimizning 35 yilligi arafasida Prezident farmoniga ko‘ra "Shuhrat” medali bilan taqdirlandi.

Maktab direktori Nilufar Qarshiyevaning ta’kidlashicha, ustozning shogirdlari bugun turli oliy ta’lim muassasalarida tahsil olib, jamiyatning turli sohalarida faoliyat yuritmoqda. Ularning yutuqlarida Nuriddin ustoz bergan bilim va tarbiyaning o‘rni bor.

Ustoz hayotida oila ham muhim o‘rin tutadi. Umr yo‘ldoshi Maqsuda aya bilan uch nafar farzandini mehr va e’tibor bilan tarbiyalab kelayotgan Nuriddin Bosimov farzand kamolida shaxsiy namuna muhim, deb hisoblaydi.

— Farzandlarimning kamolini ko‘rish men uchun eng katta baxt. Ularning odobli, bilimli va elga naf keltiradigan inson bo‘lib ulg‘ayishidan ortiq quvonch yo‘q, — deydi ustoz.

Nuriddin Bosimovning 21 yillik ustozlik faoliyati — mehnat, sadoqat va izlanish bilan yo‘g‘rilgan hayot maktabi. Uning har bir darsida tarixga hurmat, Vatanga muhabbat va ilmga intilish g‘oyalari mujassam.

Zero, haqiqiy ustozning eng katta mukofoti — uning shogirdlari yutug‘i, farzandlari kamoli va jamiyatga qo‘shgan munosib hissasidir.

Milliy statistika qo‘mitasi ma’lumotlariga ko‘ra, 2026-yilning yanvar–iyul oylarida Jizzax viloyatida aholi jon boshiga ko‘rsatilgan bozor xizmatlari hajmi 11,1 million so‘mni tashkil etdi.

Mazkur ko‘rsatkich xizmatlar sohasida iqtisodiy faollik izchil davom etayotganini ko‘rsatadi.

Rasmiy statistikada aholi jon boshiga to‘g‘ri keladigan bozor xizmatlari hajmi oylik hisobda Jizzax viloyati uchun iyul oyida 11 110,9 ming so‘m sifatida qayd etilgan.

Viloyatda xizmatlar sohasining rivojlanishi aholiga ko‘rsatilayotgan savdo, transport, maishiy, moliyaviy va boshqa xizmatlar turlarining kengayishi bilan uzviy bog‘liq.

Hududlarda xizmat ko‘rsatish tarmoqlarini kengaytirish, yangi subyektlarni tashkil etish, zamonaviy xizmat turlarini joriy qilish va aholi uchun qulayliklarni oshirish mazkur yo‘nalishdagi muhim vazifalardan hisoblanadi.

Jizzax viloyatida xizmatlar sohasidagi faollikning ortishi aholi ehtiyojlarini yanada to‘liq qondirish, yangi ish o‘rinlari yaratish va hudud iqtisodiy salohiyatini oshirishga xizmat qilmoqda.

— Beshinchi sinfda o‘qib yurgan kezlarimda Hamid Olimjon muzeyining ochilishida she’r o‘qiganman. Shunda taniqli davlat va jamoat arbobi Sharof Rashidov: "Sen she’r yozasanmi?” deb so‘radi. "Yo‘q”, degan javobimni eshitgach, «Yoz, sendan yaxshi shoira chiqadi”, deya rag‘bat berdi. Shu ishonchdan so‘ng she’r yoza boshladim. Ijod namunalarim dastlab maktab devoriy gazetasida, keyinchalik «Jizzax haqiqati”da chop etildi, — deydi ustoz Nodira Soatova.

Inson hayotida shunday uchrashuv va so‘zlar bo‘ladiki, yillar o‘tsa-da, xotiradan o‘chmaydi. Sharof Rashidovning yosh Nodiraga bildirgan ana shu ishonchi uning ijodiy va ilmiy izlanishlariga katta turtki berdi.

Bugun Jizzax davlat pedagogika universiteti professori, filologiya fanlari doktori Nodira Soatova o‘zbek adabiyoti tarixi, adabiy meros, an’ana va vorislik, badiiy tafakkur hamda ta’lim metodikasi yo‘nalishlarida samarali ilmiy faoliyat olib bormoqda.

Olimaning Abdulla Qodiriyning "O‘tkan kunlar” romanida epik tasvir an’analariga bag‘ishlangan tadqiqoti ilmiy faoliyatida muhim bosqich bo‘ldi. 2023-yilda «XX asr o‘zbek adabiyoti taraqqiyotida Shuhrat ijodining o‘rni” mavzusida doktorlik dissertatsiyasini himoya qilib, filologiya fanlari doktori (DSC) ilmiy darajasiga erishdi. Uning qalamiga mansub monografiya, o‘quv qo‘llanma, lug‘at va antologiyalar, shuningdek, respublika va xorijiy nashrlarda e’lon qilingan 250 dan ortiq maqola ko‘p yillik izlanishlar samarasidir.

Nodira Soatovaning ilmga mehri oila muhitida shakllangan. Ota-onasi farzandlarining ta’lim olishiga alohida e’tibor qaratgan. Onasi unda adabiyotga qiziqish uyg‘otgan bo‘lsa, otasi uyga kitoblar olib kelib, bilimga intilishini qo‘llab-quvvatlagan.

1988-yilda oliygohni imtiyozli tamomlab, maktabda ishlagan Nodira Soatova 1994-yilda o‘zi tahsil olgan institutning o‘zbek adabiyoti kafedrasida faoliyatini davom ettirdi. Ustozi Olimjon Jo‘rayev ham uning kitob va qo‘lozmalarga qiziqishini ko‘rib, ilmiy izlanishga undadi.

Ustozlardan olgan ana shu rag‘bat bugun olimaning shogirdlar bilan ishlash tamoyiliga aylangan.

— Inson hayotida ustozning o‘rni beqiyos. Menga bir vaqtlar aytilgan bir og‘iz rag‘bat qanday ta’sir qilgan bo‘lsa, bugun shogirdlarim bilan ishlashda shuni his qilaman. Talabaga faqat bilim berish emas, uning qobiliyatini ko‘rish va o‘z kuchiga ishontirish muhim, — deydi olima.

Bugun uning ilmiy rahbarligida yosh tadqiqotchilar filologiya fanlari bo‘yicha PHD darajasi uchun izlanish olib bormoqda. Ko‘plab shogirdlari ko‘rik-tanlovlarda ishtirok etib, o‘z iqtidorini namoyon etmoqda.

Nodira Soatova uchun ustozlik faqat dars yoki ilmiy rahbarlik bilan cheklanmaydi. U haqiqiy ustoz shogirdiga mustaqil fikrlash, manba izlash, to‘g‘ri savol qo‘yish va izlanishdan to‘xtamaslikni o‘rgatishi kerak, deb hisoblaydi.

Ustozlik an’anasi olimaning oilasida ham davom etmoqda. Uch nafar farzandi pedagoglik kasbini tanlab, bugun yosh avlodga ta’lim bermoqda.

Zero, ilmning eng katta qadri — uning bir insonda to‘xtab qolmasligida. Ustozdan shogirdga, shogirddan esa keyingi avlodlarga o‘tadigan bilim va ma’naviy meros Nodira Soatovaning hayot yo‘lida ham o‘z ifodasini topmoqda.