Bugun maktabning vazifasi faqat bilim berish bilan cheklanmaydi. U bolaning qobiliyati va qiziqishi namoyon bo‘ladigan, mustaqil fikrlash, kasb tanlash va hayotga tayyorgarlik ko‘nikmalari shakllanadigan muhim maskanga aylanmoqda.

Prezident Shavkat Mirziyoyevning O‘qituvchi va murabbiylar kuni arafasida ustozlar bilan uchrashuvida ta’limni rivojlantirish Yangi O‘zbekistonni barpo etishning muhim bo‘g‘ini ekani ta’kidlanib, endi asosiy e’tibor ta’lim mazmuni va sifatiga qaratilishi zarurligi qayd etildi.

Jizzax viloyatida ham bu boradagi ishlar ta’lim muhitini yangilash bilan bir qatorda, o‘quvchilarni ertangi hayotga tayyorlashga qaratilmoqda.

Xususan, 2025–2026 o‘quv yilida 20 ta maktabda kasb-hunarga o‘qitish tizimi joriy qilinib, 914 nafar o‘quvchi ishchi kasblar hamda axborot texnologiyalari yo‘nalishlarida tahsil oldi. Ulardan 397 nafariga elektron kasbiy sertifikat berildi.

Yangi o‘quv yilidan maktabgacha va maktab ta’limi tashkilotlarida uzluksiz kasbga yo‘naltirish dasturlarining joriy etilishi bu jarayonni yanada tizimlashtiradi. Besh yoshdan boshlab bolalar turli kasblar bilan o‘yinlar orqali tanishsa, keyingi sinflarda kasblar, mehnat bozori va o‘z qiziqishlariga mos yo‘nalishlarni anglashga e’tibor qaratiladi.

Ta’lim sifati, albatta, munosib sharoitni ham talab qiladi. 2023–2026 yillarda Jizzax viloyatida maktab va maktabgacha ta’lim obyektlarini qurish, rekonstruksiya qilish va ta’mirlash ishlariga 654 milliard 979 million 300 ming so‘m mablag‘ yo‘naltirilib, 180 ta obyektda ishlar amalga oshirildi. Natijada minglab yangi o‘quvchi va bolalar o‘rinlari yaratilmoqda.

Biroq ta’lim sifati faqat yangi bino va zamonaviy jihozlar bilan belgilanmaydi. Uning asosiy tayanchi — ustoz. Shu bois pedagoglarning kasbiy salohiyatini oshirish, malaka va toifasini yuksaltirishga ham alohida e’tibor qaratilmoqda. Viloyat maktablarida oliy ma’lumotli o‘qituvchilar ulushi 2 foizga oshirilib, oliy va birinchi malaka toifasiga ega pedagoglar ulushi 34 foizga yetkazildi.

Dars jarayonida ham yangi yondashuvlar joriy etilmoqda. 2025–2026 o‘quv yilida 164 ta maktabda yangi baholash tizimi amaliyotga tatbiq etilgan bo‘lsa, yangi o‘quv yilidan bu tizim qamrovi 314 ta maktabga yetkaziladi.

Shuningdek, ta’lim sifatini baholashda "sifat indeksi”ni joriy etish va pedagoglarning kasbiy rivojlanishini vaucher tizimi asosida qo‘llab-quvvatlash rejalashtirilgan.

Xorijiy mutaxassislarni ta’lim jarayoniga jalb etish, matematika, fizika, kimyo va biologiya fanlarini chuqur o‘qitish, ayrim maktablarda ushbu fanlarni ingliz tilida o‘qitishga o‘tish kabi choralar ham o‘quvchilarning zamonaviy bilim va ko‘nikmalarini shakllantirishga xizmat qiladi.

Islohotlarning samarasi natijalarda ham namoyon bo‘lmoqda. Jizzax viloyatida oliy ta’lim muassasalariga kirishning o‘rtacha bali 92 ballga yetdi. Bu avvalgi davrga nisbatan 20,2 ballga yuqori ko‘rsatkichdir. Viloyat so‘nggi uch yilda davlat oliy ta’lim muassasalariga kirish ko‘rsatkichi bo‘yicha 6,1 foiz o‘sish qayd etdi.

Eng muhimi, bu jarayonlarning markazida bola turibdi. Uning qiziqishi va qobiliyatini erta aniqlash, sifatli ta’lim berishi, kasb tanlashi va mustaqil hayotga tayyorgarlik ko‘rishi uchun zarur sharoitlarni yaratish — bugungi ta’lim islohotlarining asosiy mazmunidir.

Zero, ta’limning haqiqiy samarasi faqat bahoda emas, balki o‘quvchining nimani bilishi, nimani qila olishi va kelajakda o‘z o‘rnini topa bilishida namoyon bo‘ladi.