Baxmal tumanida investitsiya va xalqaro hamkorlikni kengaytirish, ishlab chiqarish salohiyatidan samarali foydalanish hamda yangi loyihalarni amalga oshirishga qaratilgan amaliy uchrashuv o‘tkazildi.

Tuman hokimi Aziz Ergashev Turkiya Respublikasining "NTS Global” konsalting, to‘qimachilik, ichki va tashqi savdo kompaniyasi vakillari bilan uchrashib, tumanda sanoat va ishlab chiqarish yo‘nalishlarida hamkorlikni yo‘lga qo‘yish masalalarini muhokama qildi.

Muloqot davomida kichik sanoat zonasida yangi ishlab chiqarish yo‘nalishlarini tashkil etish imkoniyatlariga alohida e’tibor qaratildi. Xususan, to‘qimachilik va oziq-ovqat sanoati uchun zamonaviy uskunalar, ehtiyot qismlar ishlab chiqarish, shuningdek, ularga texnik xizmat ko‘rsatish va servis tizimini yo‘lga qo‘yish bo‘yicha takliflar ko‘rib chiqildi.

Shuningdek, mahalliy tadbirkorlarni sifatli sanoat uskunalari, ehtiyot qismlar va maxsus buyurtma asosida tayyorlanadigan detallar bilan ta’minlash, Baxmalda ishlab chiqarilayotgan mahsulotlarni tashqi bozorlarga olib chiqish va eksport geografiyasini kengaytirish masalalari yuzasidan fikr almashildi.

Uchrashuvda qo‘shma loyihalarni amalga oshirish, yangi ish o‘rinlari yaratish va tumanning eksport salohiyatini oshirish bo‘yicha hamkorlikning istiqbolli yo‘nalishlari belgilab olindi.

G‘allaorol tumani Oqtosh MFY hududidan o‘tuvchi 4K237-a avtomobil yo‘lida beton qoplama yotqizish ishlari izchil davom etmoqda.

Bugungi kunga qadar yo‘lning 25,449 kilometrida betonlash ishlari bajarildi. Loyihani to‘liq yakunlash uchun esa yana 429 metr masofada ish olib borish qolgan.

Ayni paytda qurilish ishlari yakuniy bosqichga kirgan bo‘lib, qolgan qismda ham sifat va belgilangan talablarga rioya etilgan holda ishlar davom ettirilmoqda.

Yangi beton yo‘l aholi va transport vositalari harakati uchun qulaylik yaratish, yo‘l infratuzilmasini yaxshilash hamda hududning transport qatnovini yanada rivojlantirishga xizmat qiladi.