Jizzax viloyati va Qoraqalpog‘iston Respublikasi Taxtako‘pir tumani o‘rtasida ijtimoiy sohaning turli yo‘nalishlarida o‘zaro manfaatli hamkorlikni yo‘lga qo‘yish va uni yanada rivojlantirish maqsadida Jizzax viloyati rahbarlari ayni damda ushbu tumanda bo’lib turibdi.

Hamkorlik doirasida Taxtako‘pir tumanida istiqomat qilayotgan aholi, ayniqsa, yoshlar uchun yangi imkoniyatlar yaratish, ularning bandligini ta’minlash, ta’lim olishi va kasb-hunar egallashiga ko‘maklashishga alohida e’tibor qaratiladi.
Jumladan, 14–30 yoshdagi yoshlarni xatlovdan o‘tkazib, ishsiz yoshlarni Jizzax viloyatidagi sanoat korxonalariga ishga jalb etish, sportga qiziqadigan yoshlarni viloyatimizdagi ixtisoslashtirilgan sport maktablariga o‘qishga yo‘naltirish bo‘yicha amaliy ishlar olib boriladi.

Aholi salomatligini mustahkamlash maqsadida Jizzax viloyatining malakali shifokorlari ishtirokida Taxtako‘pir tumanidagi mahallalarda bepul tibbiy ko‘riklar tashkil etiladi.

Ijtimoiy himoyaga muhtoj fuqarolar, yolg‘iz keksalar va ehtiyojmand oilalar vakillarini Jizzax viloyatidagi sanatoriy-kurort muassasalarida sog‘lomlashtirish, ularni tegishli yo‘llanmalar bilan ta’minlash hamda tashkiliy masalalarni hal etish bo‘yicha ham amaliy choralar ko‘riladi.

Ta’lim yo‘nalishida esa oliy ta’lim bilan qamrab olinmagan bitiruvchilarni Jizzax viloyatidagi oliy ta’lim tashkilotlariga o‘qishga jalb etish imkoniyatlari o‘rganiladi.

Bundan tashqari, tumandagi ta’lim, tibbiyot, madaniyat, sport va boshqa ijtimoiy soha muassasalaridagi mavjud shart-sharoitlar o‘rganilib, aniqlangan muammolarni bartaraf etish, moddiy-texnik bazasini mustahkamlash hamda zarur mebel, jihoz va asbob-uskunalar bilan ta’minlash bo‘yicha manzilli ishlar amalga oshiriladi.

Mazkur hamkorlik Jizzax viloyati va Taxtako‘pir tumani o‘rtasida tajriba almashish, mavjud imkoniyatlardan samarali foydalanish, yoshlar bandligini ta’minlash hamda ijtimoiy sohada yangi loyihalarni amalga oshirishga xizmat qiladi.