Jizzax viloyatida sug‘oriladigan yerlarning meliorativ holatini yaxshilash, tuproq unumdorligini saqlash hamda suv resurslaridan oqilona va samarali foydalanishga qaratilgan chora-tadbirlar izchil davom ettirilmoqda.

Ayni kunlarda Sirdaro–Zarafshon irrigatsiya tizimlari havza boshqarmasi huzuridagi Meliorativ ekspeditsiya mutaxassislari tomonidan Mirzacho‘l, Do‘stlik va Zafarobod tumanlaridagi kuzatuv quduqlarini ta’mirlash va qayta tiklash ishlari olib borilmoqda.

Jumladan, kuzatuv quduqlariga himoya halqalarini o‘rnatish orqali ularning texnik holatini yaxshilash va uzluksiz foydalanish imkoniyatini ta’minlashga alohida e’tibor qaratilmoqda.

Belgilangan rejaga muvofiq, viloyat hududida jami 198 ta kuzatuv qudug‘ini ta’mirlash va qayta tiklash ko‘zda tutilgan. Mazkur quduqlar orqali sug‘oriladigan yerlardagi sizot suvlari sathi muntazam kuzatib boriladi.

Kuzatuv quduqlarining soz holatda bo‘lishi yer osti suvlari sathidagi o‘zgarishlarni o‘z vaqtida aniqlash, yerlarning meliorativ holatini baholash va zarur choralarni belgilashda muhim ahamiyatga ega.

Ayniqsa, suv tanqisligi tobora dolzarb ahamiyat kasb etayotgan sharoitda sug‘oriladigan yerlarning holatini muntazam nazorat qilish, mavjud suv resurslaridan tejamkor va oqilona foydalanish qishloq xo‘jaligi samaradorligini ta’minlashda muhim omil bo‘lib xizmat qiladi.

Amalga oshirilayotgan ishlar natijasida sug‘oriladigan yerlarning meliorativ holatini barqaror saqlash, ularning unumdorligini oshirish va qishloq xo‘jaligi maydonlaridan samarali foydalanish uchun zarur sharoitlar yaratiladi.

BMB HOLDING tarkibidagi BMB-NRC AGROLOGISTICS korxonasi tomonidan navbatdagi muhim eksport amaliyoti muvaffaqiyatli bajarildi. Mahalliy qishloq xo‘jaligi mahsulotlarini jahon standartlari asosida saralash va dunyo bozorlariga yetkazib berish borasidagi tizimli ishlarning davomi sifatida, navbatdagi yuqori sifatli brokkoli mahsulotlari partiyasi Rossiya Federatsiyasiga jo‘natildi.

Eksport jarayonining dastlabki bosqichida mahsulotlar sinchkovlik bilan saralab olindi. Faqatgina xalqaro sifat talablariga to‘liq javob beradigan, shikastlanmagan va yangi uzilgan mahsulotlar tanlab olinib, keyingi - saqlash jarayonlariga yo‘naltirildi.

Mahsulotlar belgilangan maqbul iqlim sharoiti va namlik darajasi ta’minlangan zamonaviy sovitish omborxonalarida saqlandi hamda uzoq masofali transportirovka talablariga mos ravishda puxta qadoqlandi.

Eksportga tayyorlangan sifatli brokkoli karamlari alohida isitish-sovitish rejimi nazorat qilinadigan maxsus avtotransport vositalariga yuklanib, Rossiya Federatsiyasiga qarab yo‘lga chiqdi.

BMB HOLDING milliy mahsulotlarimizning xorijiy bozorlardagi o‘rnini yanada mustahkamlash va eksport hajmini izchil oshirish yo‘lida samarali faoliyatini faol davom ettirmoqda.