Bugun maktab ostonasidan kirib kelayotgan har bir avlod o‘qituvchidan yangicha yondashuv, izlanish va yuksak mas’uliyatni talab qiladi. Zero, bolaga faqat bilim berishning o‘zi yetarli emas — uning qalbiga yo‘l topish, mustaqil fikrlashga undash, kitobga mehr uyg‘otish ham ustoz zimmasida.

Arnasoy tumanidagi 20-maktab ona tili va adabiyot fani o‘qituvchisi Umida Axmatova ana shu tamoyil asosida o‘z ustida izchil ishlab kelayotgan yosh mutaxassislardan biri.

30 yoshli Umida Axmatovaning pedagogik faoliyatiga olti yil bo‘ldi. U "G‘afur G‘ulom” mahallasida istiqomat qiladi, ikki nafar qiz farzandni tarbiyalamoqda. Turmush o‘rtog‘i ham ta’lim sohasida mehnat qiladi. Tanlov sinovlari jarayonida ham u rafiqasini qo‘llab-quvvatladi.

Umida kasb tanlashda esa ona tili va adabiyot fani o‘qituvchisi Feruza ustozning ibratidan ta’sirlangan. Bolaligida shifokor bo‘lishni orzu qilgan bo‘lsa-da, keyinchalik o‘z taqdirini pedagogika bilan bog‘ladi.

Qizig‘i shundaki, bugun u bir vaqtlar o‘zi tahsil olgan dargohda dars beradi. Sobiq ustozlari endi uning hamkasblariga aylangan. Kechagi shogird bugun ular bilan yonma-on mehnat qilib, tajriba va maslahatlaridan bahramand bo‘lmoqda. Bu muhit uning kasbiy mahoratini oshirishda muhim ahamiyat kasb etmoqda.

Umida Axmatova dars jarayonida o‘quvchilarning yoshi, qiziqishi va qobiliyatini inobatga oladi. Mashg‘ulotlarni yanada qiziqarli va interaktiv tashkil etish maqsadida Wordwall, Topqir.uz, Kahoot kabi zamonaviy vositalardan foydalanadi. Savollar, topishmoqlar va mantiqiy topshiriqlar orqali o‘quvchilarni darsning dastlabki daqiqalaridanoq fikrlashga jalb etadi.

Adabiyot darslarida sun’iy intellekt imkoniyatlaridan ham samarali foydalanib, interaktiv vazifalar tayyorlaydi. Bu orqali asar muallifi va qahramonlarini o‘quvchi tasavvurida yanada yaqinlashtirishga harakat qiladi.

Uning fikricha, ta’limda tayyor javobdan ko‘ra mustaqil mushohada muhimroq. Shu bois o‘quvchi xato qilganida uning fikrini rad etish emas, balki to‘g‘ri xulosaga yo‘naltirishga intiladi.

Pedagogning kuzatishicha, bugungi o‘quvchilar bir xillikdan tez zerikadi, internetdan faol foydalanadi va samimiy muloqotni qadrlaydi. Demak, har bir bolaning o‘ziga xos jihatini anglash, qiyinchiligini o‘z vaqtida sezish va unga mos yondashuvni topish muhim.

Kasbiy izlanishlar samarasi attestatsiya jarayonida ham namoyon bo‘ldi. Attestatsiya yakuniga ko‘ra, Umida Axmatova oliy toifa va 70 foizlik ustamaga ega bo‘ldi. Shundan so‘ng u «Yil o‘qituvchisi” tanlovi ishtirokchilari safiga kiritildi.

Bu taklif Umida uchun kutilmagan va ayni paytda katta mas’uliyat yuklaydigan voqea bo‘ldi. Yangi sinov undan bor bilimi, tajribasi va pedagogik mahoratini namoyon etishni talab qildi.

Ayniqsa, ikkinchi bosqichda kameralar va hakamlar hay’ati oldida dars o‘tish katta mas’uliyat yukladi. Bu jarayonda fanni bilish darajasi, darsni tashkil etish mahorati, ma’naviy-ma’rifiy faoliyat hamda kitobxonlik madaniyatiga alohida e’tibor qaratildi.

Umida uchun esa tanlov natijadan ko‘ra kengroq ma’noga ega bo‘ldi. U jarayon davomida o‘z faoliyatidagi ayrim kamchiliklarni ko‘rib, kelgusi ishi uchun yangi maqsad va vazifalarni belgilab oldi.

Bugun ustoz oldida turgan maqsadlar aniq: dars berish mahoratini yanada oshirish, zamonaviy pedagogik usullarni chuqurroq o‘zlashtirish, sun’iy intellekt imkoniyatlaridan samarali foydalanish, badiiy adabiyot bilan ko‘proq oshno bo‘lish va o‘quvchilar psixologiyasini yaxshiroq anglash.

Ayniqsa, yosh avlodda kitobga qiziqish va mutolaa madaniyatini shakllantirishni muhim vazifalardan biri deb biladi.

Umida Axmatovaning qarashlarida ustozlik bir marta egallanadigan maqom emas, balki har kuni davom etadigan izlanish va o‘z ustida ishlash jarayonidir.

Shu bois u yosh hamkasblariga ham o‘z ustida ishlashni, yangilikdan qo‘rqmaslikni va har bir darsga ijodiy yondashishni tavsiya qiladi.