Jizzax bosh nasos stansiyalari boshqarmasi tasarrufidagi "Jizzax-1” nasos stansiyasida kuzgi-qishki ta’mirlash va tiklash ishlari jadal olib borilmoqda. Ushbu jarayonda texnika xavfsizligi talablariga qat’iy rioya qilish, uskunalarni sifatli ta’mirlash hamda agregatlarning ishonchliligini ta’minlashga alohida e’tibor qaratilmoqda.

Ayni paytda mutaxassislar nasos agregatlarining texnik holatini baholash, aniqlangan nosozliklarni bartaraf etish va uskunalarni kelgusi sug‘orish mavsumiga puxta tayyorlash ustida ish olib bormoqda. Elektr jihozlari va mexanik qismlar ko‘rikdan o‘tkazilib, mavjud kamchiliklarni bartaraf etish choralari ko‘rilmoqda.

Nasos stansiyalarining barqaror faoliyati qishloq xo‘jaligi ekinlarini o‘z vaqtida va zarur miqdorda suv bilan ta’minlashda muhim ahamiyatga ega. Ayniqsa, sug‘orish mavsumida suvga bo‘lgan talab ortishi hisobga olinsa, nasos agregatlarining texnik jihatdan sozligi va uzluksiz ishlashi dolzarb vazifalardan biri hisoblanadi.

Shu bois, mavsum oralig‘ida ta’mirlash-tiklash ishlarini sifatli va o‘z vaqtida bajarish, mavjud uskunalarning xizmat muddatini uzaytirish hamda suv yetkazib berish tizimining ishonchliligini oshirishga ustuvor vazifa sifatida qaralmoqda.

Mazkur yo‘nalishdagi ishlar suv resurslaridan oqilona foydalanish va suv xo‘jaligi obyektlarini samarali boshqarishga qaratilgan islohotlar bilan hamohangdir. O‘zbekiston Respublikasi Prezidentining 2025-yil 14 oktabrdagi "Quyi bo‘g‘inda suv resurslarini boshqarish tizimini yanada takomillashtirish hamda sohaning xususiy sektor uchun jozibadorligini oshirish chora-tadbirlari to‘g‘risida”gi qarorida Jizzax viloyatidagi nasos stansiyalarining 50 foizini 2026-yilda davlat-xususiy sheriklik asosida boshqaruvga berish vazifasi belgilangan. Shuningdek, suv hisobini yuritish, resurslardan samarali foydalanish va suv xo‘jaligi obyektlarini texnik jihatdan soz holatda saqlash masalalariga alohida e’tibor qaratilgan.

Ushbu vazifalar ijrosi sohadagi har bir obyektda mas’uliyatni oshirish, mavjud texnik imkoniyatlardan unumli foydalanish va ta’mirlash ishlarini belgilangan muddatlarda sifatli bajarishni taqozo etadi.

"Jizzax-1” nasos stansiyasida olib borilayotgan kuzgi-qishki ta’mirlash-tiklash ishlari ham aynan shu maqsadga qaratilgan. Bugun amalga oshirilayotgan har bir texnik tadbir kelgusi sug‘orish mavsumida suv yetkazib berish barqarorligini ta’minlash, dehqon va fermer xo‘jaliklarining suvga bo‘lgan ehtiyojini o‘z vaqtida qondirishga xizmat qiladi.

"Baxmal olmasi” geografik ko‘rsatkich sifatida davlat reyestriga kiritildi. Mazkur ro‘yxatdan o‘tkazish 2026-yil 9 oktabr sanasida qayd etilgan bo‘lib, geografik ko‘rsatkichdan foydalanish huquqi egasi etib Baxmal tumani hokimligi belgilangan.

Shu munosabat bilan Baxmal tumani hokimligida Jizzax viloyati Adliya boshqarmasi boshlig‘ining o‘rinbosari Bekzod Choliyev ro‘yxatdan o‘tkazilganlikni tasdiqlovchi guvohnomani tuman hokimi Aziz Ergashevga topshirdi.

Baxmal olmasi o‘zining ta’mi, yirikligi, shirdorligi va sifati bilan ajralib turadi. Bu xususiyatlar, avvalo, hududning o‘ziga xos tabiiy-iqlim sharoitlari bilan bog‘liq.

Tuman dengiz sathidan 600–1800 metr balandlikda joylashgan bo‘lib, olma bog‘larining asosiy qismi 1200–1600 metr balandlikdagi vodiylar va tog‘ yonbag‘irlarida barpo etilgan. Haroratning kun va tun davomidagi farqi, tog‘li hududga xos tabiiy havo oqimlari hamda boshqa iqlim omillari mevalarning ta’mi va sifat xususiyatlari shakllanishiga ta’sir ko‘rsatadi.

Bugungi kunda tumanda qariyb 7 ming gektar maydonda olma bog‘lari mavjud. Taxminan 9 300 ta xonadonda olma yetishtirish aholi daromadining muhim manbalaridan biri hisoblanadi. Hududda olmaning 10 ga yaqin navi parvarishlanadi.

Ushbu ko‘rsatkichlar bog‘dorchilik Baxmal tumani iqtisodiyotida, aholi bandligini ta’minlashda va xonadonlar farovonligini oshirishda muhim o‘rin tutishini ko‘rsatadi. Asrlar davomida shakllangan bog‘dorchilik tajribasi va hududning tabiiy imkoniyatlari esa Baxmal olmasining o‘ziga xosligini ta’minlovchi muhim omillardan sanaladi.

"Baxmal olmasi”ning geografik ko‘rsatkich sifatida davlat reyestriga kiritilishi hududning o‘ziga xos qishloq xo‘jaligi mahsulotini keng targ‘ib qilish, uning kelib chiqish hududi bilan bog‘liq xususiyatlarini e’tirof etish hamda bozorlardagi nufuzini mustahkamlash uchun yangi imkoniyatlar yaratadi.

Shuningdek, mazkur ro‘yxatdan o‘tkazish Baxmal olmasining o‘ziga xos xususiyatlarini asrash, mahalliy bog‘dorchilik an’analarini qo‘llab-quvvatlash va mahsulotning raqobatbardoshligini oshirishga xizmat qilishi mumkin.

Bu natija baxmallik bog‘bonlarning ko‘p yillik mehnati, avloddan-avlodga o‘tib kelayotgan dehqonchilik tajribasi va tumanning tabiiy salohiyatini namoyon etadi.

Baxmal olmasi — hududning tabiiy boyligi, bog‘bonlar mehnatining samarasi va tumanning o‘ziga xos brendi!

Maktabgacha ta’lim tizimi bolalarning ilk bilim va ko‘nikmalarini shakllantirish, ularni maktab ta’limiga tayyorlashda muhim o‘rin tutadi.

Jizzax viloyatida ham maktabgacha ta’lim tashkilotlari tarmog‘ini kengaytirish, bolalarni ta’lim-tarbiya bilan qamrab olish va soha infratuzilmasini rivojlantirishga alohida e’tibor qaratilmoqda.

Milliy statistika qo‘mitasi ma’lumotlariga ko‘ra, 2026-yil 1 yanvar holatiga Jizzax viloyatida faoliyat yuritayotgan maktabgacha ta’lim tashkilotlari soni 1 709 tani tashkil etgan.

Viloyatda maktabgacha ta’lim xizmatlarini kengaytirish, yangi tashkilotlarni ishga tushirish va mavjud quvvatlarni oshirishga qaratilgan chora-tadbirlar amalga oshirilmoqda.

Jumladan, 2026-yildagi dasturlar doirasida 11 ta davlat, 2 ta xususiy, 12 ta davlat-xususiy sheriklik asosidagi hamda 86 ta oilaviy maktabgacha ta’lim tashkilotini tashkil etish rejalashtirilgan. Bu orqali 6 750 ta qo‘shimcha o‘rin yaratish ko‘zda tutilgan.

Mazkur tashabbuslar bolalarning maktabgacha ta’lim bilan qamrovini oshirish, ota-onalar uchun qulay sharoitlar yaratish va ta’lim xizmatlaridan foydalanish imkoniyatlarini kengaytirishga xizmat qiladi.

Eng muhimi, maktabgacha ta’lim tashkilotlari tarmog‘ining rivojlanishi bolalarning intellektual va ijtimoiy salohiyatini erta yoshdan shakllantirish, ularni maktab ta’limiga puxta tayyorlash hamda kelajakdagi ta’lim muvaffaqiyati uchun mustahkam zamin yaratishda muhim ahamiyat kasb etadi.