Milliy statistika qo‘mitasi ma’lumotlariga ko‘ra, 2026-yilning yanvar–avgust oylarida Jizzax viloyatida 6,2 trln so‘mlik qurilish ishlari bajarildi.

Mamlakatimiz bo‘yicha joriy yilning dastlabki sakkiz oyida qurilish ishlari hajmi 259,4 trln so‘mni tashkil etib, o‘tgan yilning mos davriga nisbatan 11,8 foizga oshgan.

Hududlar kesimidagi ko‘rsatkichlarga e’tibor qaratilsa, Jizzax viloyatida amalga oshirilgan qurilish ishlari hajmi Sirdaryo viloyatidagi 5,3 trln so‘mlik ko‘rsatkichdan yuqori bo‘ldi.

Qurilish sohasidagi faollik hududning iqtisodiy rivojlanishi, infratuzilmani yaxshilash, aholi uchun munosib yashash sharoitlarini yaratish hamda tadbirkorlik imkoniyatlarini kengaytirishda muhim ahamiyat kasb etadi.

Endilikda mazkur ko‘rsatkichlarning o‘sishi bilan bir qatorda, qurilayotgan obyektlarning sifati, belgilangan muddatlarda foydalanishga topshirilishi va ularning aholi ehtiyojlariga xizmat qilishi ham muhim mezon hisoblanadi.

Zafarobod tumanida Jizzax viloyati prokurori Baxtiyor Ibrohimovning tadbirkorlar bilan ochiq muloqoti bo‘lib o‘tdi.

Uchrashuvda tuman hokimi, huquqni muhofaza qiluvchi organlar hamda mutasaddi tashkilotlarning viloyat va tuman darajasidagi mas’ullari ishtirok etdi.

Muloqotdan ko‘zlangan asosiy maqsad tadbirkorlarning faoliyati davomida yuzaga kelayotgan muammo va to‘siqlarni o‘rganish, ularning murojaatlarini tinglash hamda qonuniy yechim topishdan iborat bo‘ldi.

Uchrashuv davomida tadbirkorlarning huquq va qonuniy manfaatlarini himoya qilish, ularning faoliyatiga asossiz aralashuvlarning oldini olish, biznes yuritish uchun qulay sharoitlar yaratish hamda mavjud muammolarni bartaraf etish masalalariga alohida e’tibor qaratildi.

Tadbirkorlar o‘zlarini qiynayotgan masalalar va takliflarini ochiq bayon etdilar. Bildirilgan murojaatlarni tegishli tashkilotlar ishtirokida ko‘rib chiqish, ularning yechimi bo‘yicha aniq chora-tadbirlarni belgilash va mas’ullar vazifalarini aniqlashtirish yuzasidan fikr almashildi.

Ta’kidlanganidek, tadbirkorlikni rivojlantirish, yangi ish o‘rinlarini yaratish va aholi bandligini ta’minlash hudud iqtisodiy taraqqiyotining muhim omillaridandir. Buning uchun tadbirkorlarning muammolariga befarq bo‘lmaslik, murojaatlarni o‘z vaqtida ko‘rib chiqish va ularning qonuniy manfaatlarini ishonchli himoya qilish zarur.

Muloqot yakunida ko‘tarilgan masalalarni hal etish, murojaatlar ijrosini ta’minlash va tadbirkorlar bilan tizimli muloqotni davom ettirish yuzasidan mas’ullarga tegishli vazifalar belgilandi.

Bunday ochiq muloqotlar tadbirkorlarning muammolarini joyida aniqlash, ularga amaliy yechim topish hamda tumanda ishbilarmonlik muhitini yanada yaxshilashga xizmat qiladi.

Jizzax olimpiya va paralimpiya sport turlariga tayyorlash markazida yosh sportchilarni qo‘llab-quvvatlash va ular uchun zarur sharoitlarni yanada yaxshilash maqsadida O‘zbekiston Respublikasi Sport vazirligi tomonidan sport formalari topshirildi.

Tadbir davomida markazda tahsil olayotgan 435 nafar yosh sportchiga sport formalari tarqatildi. Mazkur tashabbus yoshlarning sportga bo‘lgan qiziqishini oshirish, ularni yangi marralar sari ruhlantirish hamda muntazam mashg‘ulotlar uchun zarur imkoniyatlarni kengaytirishga xizmat qiladi.

Markaz rahbariyati yosh sportchilarni quvonchli voqea bilan tabriklab, ularga kelgusi musobaqalarda ulkan zafarlar, yuqori natijalarga erishish va xalqaro maydonlarda O‘zbekiston bayrog‘ini baland ko‘tarishlarini tiladi.

Shuningdek, yosh avlodni har tomonlama qo‘llab-quvvatlash, iqtidorli sportchilarning salohiyatini ro‘yobga chiqarish va sportni rivojlantirishga qaratilayotgan e’tibor uchun Prezidentimizga hamda Sport vazirligiga minnatdorlik bildirildi.

Bunday tashabbuslar yoshlarning sport bilan muntazam shug‘ullanishi, o‘z mahoratini oshirishi va kelgusida nufuzli musobaqalarda munosib natijalarni qo‘lga kiritishi uchun muhim rag‘bat bo‘lib xizmat qiladi.