ZAFAROBODDA VILOYAT PROKURORINING TADBIRKORLAR BILAN OCHIQ MULOQOTI O‘TKAZILDI

Zafarobod tumanida Jizzax viloyati prokurori Baxtiyor Ibrohimovning tadbirkorlar bilan ochiq muloqoti bo‘lib o‘tdi.

Uchrashuvda tuman hokimi, huquqni muhofaza qiluvchi organlar hamda mutasaddi tashkilotlarning viloyat va tuman darajasidagi mas’ullari ishtirok etdi.

Muloqotdan ko‘zlangan asosiy maqsad tadbirkorlarning faoliyati davomida yuzaga kelayotgan muammo va to‘siqlarni o‘rganish, ularning murojaatlarini tinglash hamda qonuniy yechim topishdan iborat bo‘ldi.

Uchrashuv davomida tadbirkorlarning huquq va qonuniy manfaatlarini himoya qilish, ularning faoliyatiga asossiz aralashuvlarning oldini olish, biznes yuritish uchun qulay sharoitlar yaratish hamda mavjud muammolarni bartaraf etish masalalariga alohida e’tibor qaratildi.

Tadbirkorlar o‘zlarini qiynayotgan masalalar va takliflarini ochiq bayon etdilar. Bildirilgan murojaatlarni tegishli tashkilotlar ishtirokida ko‘rib chiqish, ularning yechimi bo‘yicha aniq chora-tadbirlarni belgilash va mas’ullar vazifalarini aniqlashtirish yuzasidan fikr almashildi.

Ta’kidlanganidek, tadbirkorlikni rivojlantirish, yangi ish o‘rinlarini yaratish va aholi bandligini ta’minlash hudud iqtisodiy taraqqiyotining muhim omillaridandir. Buning uchun tadbirkorlarning muammolariga befarq bo‘lmaslik, murojaatlarni o‘z vaqtida ko‘rib chiqish va ularning qonuniy manfaatlarini ishonchli himoya qilish zarur.

Muloqot yakunida ko‘tarilgan masalalarni hal etish, murojaatlar ijrosini ta’minlash va tadbirkorlar bilan tizimli muloqotni davom ettirish yuzasidan mas’ullarga tegishli vazifalar belgilandi.

Bunday ochiq muloqotlar tadbirkorlarning muammolarini joyida aniqlash, ularga amaliy yechim topish hamda tumanda ishbilarmonlik muhitini yanada yaxshilashga xizmat qiladi.

📲https://gov.uz/oz/jizzax sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

JIZZAXDA 435 NAFAR YoSh SPORTCHIGA SPORT FORMALARI TOPSHIRILDI

Jizzax olimpiya va paralimpiya sport turlariga tayyorlash markazida yosh sportchilarni qo‘llab-quvvatlash va ular uchun zarur sharoitlarni yanada yaxshilash maqsadida O‘zbekiston Respublikasi Sport vazirligi tomonidan sport formalari topshirildi.

Tadbir davomida markazda tahsil olayotgan 435 nafar yosh sportchiga sport formalari tarqatildi. Mazkur tashabbus yoshlarning sportga bo‘lgan qiziqishini oshirish, ularni yangi marralar sari ruhlantirish hamda muntazam mashg‘ulotlar uchun zarur imkoniyatlarni kengaytirishga xizmat qiladi.

Markaz rahbariyati yosh sportchilarni quvonchli voqea bilan tabriklab, ularga kelgusi musobaqalarda ulkan zafarlar, yuqori natijalarga erishish va xalqaro maydonlarda O‘zbekiston bayrog‘ini baland ko‘tarishlarini tiladi.

Shuningdek, yosh avlodni har tomonlama qo‘llab-quvvatlash, iqtidorli sportchilarning salohiyatini ro‘yobga chiqarish va sportni rivojlantirishga qaratilayotgan e’tibor uchun Prezidentimizga hamda Sport vazirligiga minnatdorlik bildirildi.

Bunday tashabbuslar yoshlarning sport bilan muntazam shug‘ullanishi, o‘z mahoratini oshirishi va kelgusida nufuzli musobaqalarda munosib natijalarni qo‘lga kiritishi uchun muhim rag‘bat bo‘lib xizmat qiladi.

📲https://gov.uz/oz/jizzax sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

🎥 Videoreportaj: Mahalla — inson qadri va ijtimoiy adolat maskani

Mahalla nafaqat hududiy birlik, balki inson qadrini ulug‘lash, muammolarni hal etish va ijtimoiy adolatni ta’minlashning muhim bo‘g‘inidir. Mamlakatimizda mahalla institutini takomillashtirish, mavjud muammolarni joyida hal etish va xodimlar uchun munosib sharoitlar yaratishga alohida e’tibor qaratilmoqda.

Mirzacho‘l tumanidagi mahallalardan birida ham bu boradagi ishlar davom etmoqda. Qariyb yarim asrlik tarixga ega mahalla binosi bugun aholiga xizmat ko‘rsatish va fuqarolar muammolarini hal etishda muhim o‘rin tutmoqda.

📹 Batafsil — videolavhada.

📲https://gov.uz/oz/jizzax sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

BAXMALDAGI “NATURAL JUST” KORXONASI FAOLIYATI KO‘ZDAN KECHIRILDI

Baxmal tumaniga tashrif buyurgan delegatsiya vakillari tumanda faoliyat yuritayotgan “Natural Just” korxonasida bo‘lib, korxonaning ishlab chiqarish jarayonlari, faoliyat yo‘nalishlari va mavjud imkoniyatlari bilan yaqindan tanishdi.

Tashrif davomida qishloq xo‘jaligi mahsulotlarini yetishtirish va qayta ishlash samaradorligini oshirish, zamonaviy texnologiyalarni joriy etish hamda ilg‘or tajribalarni amaliyotga tatbiq etish imkoniyatlariga e’tibor qaratildi.

Ushbu tashriflar Baxmal tumanida kartoshkachilikni rivojlantirish, agrar sohada innovatsion yondashuvlarni kengaytirish va istiqbolli hamkorlik loyihalarini amalga oshirishga qaratilgan.

📲https://gov.uz/oz/jizzax  sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|

20 TA TUMAN VA SHAHAR HOKIMI BOG‘DORCHILIK HAMDA KARTOSHKACHILIK YO‘NALISHIDAGI JIZZAXNING BAXMAL TAJRIBASI BILAN TANISHDI

Jizzax viloyatining Baxmal tumanida respublikaning 20 ta tuman va shahar hokimlari, shuningdek, Germaniyadan tashrif buyurgan kartoshkachilikni rivojlantirish va qishloq xo‘jaligi mahsulotlarini qayta ishlash yo‘nalishidagi delegatsiya vakillari ishtirokida tajriba almashish tadbiri bo‘lib o‘tdi.

Tadbir davomida ishtirokchilar Baxmal tumanida bog‘dorchilik, kartoshkachilik va qishloq xo‘jaligini rivojlantirish borasida amalga oshirilayotgan ishlar, mavjud imkoniyatlar hamda ilg‘or tajribalar bilan yaqindan tanishdilar.

Uchrashuvda Andijon viloyatining Asaka va Qo‘rg‘ontepa, Jizzax viloyatining Baxmal, G‘allaorol va Zomin, Qashqadaryo viloyatining Kitob, Namangan viloyatining Yangiqo‘rg‘on, Samarqand viloyatining Bulung‘ur, Jomboy, Toyloq va Urgut, Surxondaryo viloyatining Boysun, Toshkent viloyatining Bo‘stonliq, Zangiota, Toshkent, Parkent, Yangiyo‘l va Qibray, shuningdek, Farg‘ona viloyatining Quvasoy va So‘x hududlari rahbarlari ishtirok etdi.

Muloqot davomida kartoshkachilikni rivojlantirish, zamonaviy agrotexnologiyalarni joriy etish, xorijiy tajribani o‘rganish, mahsulot yetishtirish hajmi va sifatini oshirish, shuningdek, uni qayta ishlash orqali qo‘shimcha qiymat yaratish masalalariga alohida e’tibor qaratildi.

📲https://gov.uz/oz/jizzax  sayti va sahifalari:👇

Telegram|jizzaxviloyatihokimi|Facebook|YouTube|Instagram|ok.ru|@jizzaxuz_bot|X|