Zafarobod tumanidagi Alisher Navoiy xiyobonida 21 oktabr — O‘zbek tiliga davlat tili maqomi berilgan kun munosabati bilan ma’naviy-ma’rifiy tadbir bo‘lib o‘tdi.

Unda viloyatdan tashrif buyurgan mehmonlar, tuman hokimi, ta’lim muassasalari vakillari, o‘quvchilar hamda faol yoshlar ishtirok etdi.

Tadbirda o‘zbek tili xalqimizning milliy o‘zligi, ma’naviyati va madaniyatini o‘zida mujassam etgan bebaho qadriyat ekani alohida ta’kidlandi. Davlat tilining nufuzini yanada yuksaltirish, uning sofligi va boyligini asrab-avaylash, yosh avlod qalbida ona tiliga mehr va ehtirom tuyg‘ularini mustahkamlash bugungi kunning muhim vazifalaridan biri ekani qayd etildi.

Shuningdek, ona tilimizning boy tarixi, betakror jozibasi va keng imkoniyatlarini kelajak avlodga yetkazish, uni kundalik hayotda to‘g‘ri va ravon qo‘llash, yoshlar o‘rtasida kitobxonlikni keng targ‘ib etish hamda nutq madaniyatini yuksaltirish masalalariga e’tibor qaratildi.

Bayram tadbirida o‘quvchilarning chiqishlari alohida ahamiyat kasb etdi. Ularning badiiy chiqishlari, ona tiliga bag‘ishlangan she’r va ijod namunalari orqali milliy qadriyatlarga hurmat, Vatanga sadoqat va o‘zbek tiliga bo‘lgan cheksiz mehr-muhabbat namoyon bo‘ldi.

Tadbir yakunida ishtirokchilar buyuk mutafakkir, o‘zbek adabiy tili taraqqiyotiga beqiyos hissa qo‘shgan so‘z mulkining sultoni Alisher Navoiy haykali poyiga gullar qo‘ydilar. Ushbu marosim buyuk ajdodimiz xotirasiga ehtirom ko‘rsatish, uning boy ma’naviy merosini qadrlash va ona tilimizga bo‘lgan sadoqatni yana bir bor namoyon etish ramzi bo‘ldi.