Аят
“Оларға: «Егер дұға-мінәжаттарың болмаса, Раббым сендерді қалай бағаласын!», – деп, айт”. (Фурқан сүресі, 77)

Хадис
“Кісінің сөз арасында «иншалла» деуі иманының көркемдігі”. (Табарани)

Дұға
“Уа, Раббым! Күнәм тым көп. Өзіңнің есігіңнен басқа барар есігім жоқ. Өзіңнен басқа жәрдемшім жоқ. Қателіктерімді азайтуым үшін маған жәрдем бер”. (Зәкария Әнсари)

Мақал
“Жалғыздың жары – Құдай”.

Аят
“Ол – Алла, Одан басқа құдай жоқ, (әр істің, әрбір жетістіктің) басында да, соңында да, дүниеде де, ақиретте де бар мадақ пен шексіз шүкіршілік бір Өзіне ғана тән. Бар билік, шексіз үстемдік бір Өзінің қолында және бәрің де Оған қайтарылудасыңдар”. ("Қасас" сүресі, 70)

Хадис
“Түнде оқыған намаздарыңның санын тақ қылыңдар”. (Бұхари)

Дұға
“Уа, Алла тағалам! Ризығыңа ие болдым, алайда шүкір қыла алмадым. Қиыншылықтарға душар болдым, алайда сабыр ете алмадым. Шүкір қылмағаным үшін ризығыңды азайтпадың. Сабыр етпегенім үшін мені азаптамадың. Раббым! Бұл Саған ғана тән жомарттық һәм кеңшілік”. (Сары Абдулла)

Мақал
“Өз қатесін көрмеген, Басқаның қатесін сезбейді”.

Аят
“Таразыдан (әділдіктен, негізгі өлшем мен тепе-теңдіктен) ауытқып, шектен шықпауларың үшін. Таразыны әділ тартыңдар (сөзде де, істе де қара қылды қақ жарғандай әділ болыңдар). Таразыдан жемеңдер, өлшем мен тепе-теңдікті бұзбаңдар”. ("Рахман" сүресі, 8-9)

Хадис
“(Амалдарыңда) орта жолда болыңдар, шектен шықпаңдар”. (Бұхари)

Дұға
“Уа, Раббым! Бізді Өзіңе бойұсынушылардың қатарына қоса гөр әрі ұрпағымыздан Өзіңе бағынатын үммет шығарғайсың”.

Мақал
“Артық байлық адамды аздырады, Артық күлкі жиреніш тудырады”.

Аят
“...Немесе олар қабір қойнындағылар тірілтіліп, сыртқа шыққанда, (Раббының жақсылығын көрмеу деген не екенін) білмей ме? (Сана сезім мен) көкейдегі бар нәрсе әшкере болып, ортаға салынғанда (не боларын ойламай ма?) Міне, сол күні Раббылары олардан (дүниедегі бүкіл күйлері мен істерінен әсіресе, хабардар”. (Адиат сүресі, 9-10-11)

Хадис
“Мұқтаж жандарға садақа беру қажет болып әрі оларға қандай да бір жақсылық жасауды ниет етсең оны дереу жаса (кешіктірме)”. (Муснәд)

Дұға
“Уа, Раббым! Маған жәрдем бере гөр. Осы жолдың қиындығын көтеруге күш-қуат бер. Бұл жолда нәпсімнің қалауларын жасамауға әрі нәпсімнің қаламаған нәрсесін жасауыма Өзің жәрдем бере гөр”. (Бәхауддин Бұхари)

Мақал
“Жақсы туса – ел ырысы, Жаңбыр жауса – жер ырысы”.

Аят
“Аспан әлемі мен жердегі жаратылыс біткеннің бәрі Алланың мінсіз, пәк һәм кемшілік атаулыдан ада екендігін жар салып ұлықтайды!” (Жұма сүресі, 1)

Хадис
“Күдіксіз, Алла тағала берген нығметінің әсерін құлының қолында көруді қалайды”. (Тирмизи)

Дұға
“Уа, Раббым! Өзімнің шама-шарқымша Саған шүкір етемін. Уа, Раббым! Өзіңнен кешіріміңді тілеймін”. (Абдулкадир Гайлани)

Мақал
“Жақсыны көрмекке”.

Аят
“Сондай-ақ Құран тақуа жандарға жөн сілтейтін (теңдессіз) жолбасшы”. (Хаққа сүресі, 48)

Хадис
“Мүмін ер мен мүмін әйелдің жанында, бала-шағасында және дүниесінде сәтсіздік һәм нұқсандықтар болмайды. Сондықтан қателікке бой алдырмаған қалпы Алла тағалаға қауышсын”. (Муатта)

Дұға
“Уа, Раббым! Өзіңнің құзырыңа барамын. Алайда, сауап қоржыным бос. Шексіз рақымдылығыңнан үміттімін. Мені кешір”. (Низамул Мулк)

Мақал
“Жақсының шарапаты тиер тар жерде, Жаманның кесапаты тиер әр жерде”.

Аят
“(Нух (а.с.):) «Мен оларды Өзіңнің кешіріміңе бөленсін деп, хақ жолға шақырған сайын олар саусақтарымен құлақтарын бітеп, шапандарына бүркене түсті, һәм ұдайы қасарысып, күпірлікте табандаумен әрі көкірек керіп, дандайсумен болды»”. ("Нух" сүресі, 7)

Хадис
“Сендерге екі нәрсе қалдырып барам. Одан берік ұстасаңдар ешқашан адаспайсыңдар, олар: Алла тағаланың кітабы мен менің сүннетім”. (Мууатта)

Дұға
“Уа, Раббым! Көңілімді кең етіп, ісімді жеңілдете гөр”.

Мақал
“Ғалым болсаң, өр болма, Өнерлі болсаң, кер болма”.

Аят
“Содан Біз дүниеге келуін қалаған ұрықты жатырларға жақсылап орналастырамыз да, белгілі уақытқа дейін сол жерде ұстаймыз. Кейін сендерді нәресте етіп, жарық дүниеге шығарамыз. Сонан соң ақыл-ой, күш-қуат жағынан толықсып ержетулеріңе (мүмкіндік береміз)”. (Хаж сүресі, 5)

Хадис
“Кәрілік келуден бұрын жастықтың қадірін біліңдер”. (Хаким)

Дұға
“Әлемдердің Раббысы болған Алла тағала барша жастарға абыройлы бір құл болуды нәсіп етсін. Аманаттың (жастық шақтың шексіз мүмкіндігін) қадірін жете түсінбеуден сақтасын. Алланың аманатын абыроймен тапсыруды нәсіп етсін”.

Мақал
“Жастық кетсе, қайтара алмайсың, Қарттық жетсе, тойтара алмайсың”.

Аят
“Кімде-кім Алланы, пайғамбарын және иман еткендерді өзіне жақын дос тұтса, шүбәсіз, Алланың жағында болғандардың мерейі қайткен күнде де үстем болады”. (Мәида сүресі, 56)

Хадис
“Кім кіммен жолдас болса, соның дінінде болады”.

Дұға
“Уа, Раббым! Теріс жолмен жүргенім үшін және біліп-білмей жасағандарыма тәубе еттім!...” (Абдуррахими Руми)

Мақал
“Жақсымен дос болсаң жетесің мұратқа, Жаманмен дос болсаң қаласың ұятқа”.

Аят
“Шүбәсіз, (топыраққа түскен) тұқымды да, дәнді де жарып (оларды бір жағынан топырақта шірітсе, бір жағынан оларға жаңа тіршілік сыйлау арқылы бүкіл өсімдіктерді жарататын) бір Алла. Ол өліден тіріні шығарады һәм тіріден өліні де шығарушы. Міне, Алла Осы. Ендеше, (осынау ақиқаттар «мен мұндалап» тұрғанда) олардан қалай ғана сырт айналып, сағым қуып, сан қилы теріс жолдарға түсіп кете бересіңдер?!” (Әнғам сүресі, 95)

Хадис
“Жасырын жасалған садақа Алла тағаланың азабын жеңілдетеді”. (Байһаки)

Дұға
“Уа, Алла тағалам! Мені Өзіңнің қадір-құрметіңді білетін құлдарыңның қатарынан ете гөр!” (Амр ибн Мурра (р.а.))

Мақал
“Адамнан сұрасаң ашуланады, Алладан сұрамасаң ашуланады”.

Аят
“Уа, Адамның үрім-бұтағы! Қай кезде де намаз оқитын (немесе Қағбаны тауап ететін) болсаңдар таза һәм әдемі киімдеріңді киіңдер. (Алланың өздеріңе берген нығметінен) ішіп-жеңдер бірақ, ысырап қылмаңдар. Өйткені, Алла ысырапқорларды ұнатпайды”. ("Ағраф" сүресі, 31)

Хадис
“Көңілің қалаған әр нәрсені жей беру– ысырапшылық”. (Ибн Мәжә)

Дұға
“Уа, Алла тағалам! Ұлы құдіретіңмен қосылып тұрған екі теңіздің суын бір-біріне араластырмағаныңдай, тозақ отынан және қабір азабынан мені қорғай гөр!” (Пайғамбарымыздың (с.а.с) дұғасы)

Мақал
“Тарта жесең тай қалады. Қоя жесең қой қалады”.

Аят
“Уа, иман еткендер! Аллаға шын көңілден тағзым етіп, алдында асы болудан сақтаныңдар! Сондай-ақ, Оның елшісіне де шынайы түрде иман етіңдер! ”. (Хадид сүресі, 28)

Хадис
“Кім арлылығын сақтап қалғысы келсе, Алла тағала оны арлы қылады”. (Бұхари)

Дұға
“Уа, Алла тағалам! Жүрегімізді иман һәм Құран нұрымен нұрландыр. Алла тағалам! Бізді Өз кеңшілігіңмен байыт, бізді арлы құлдарыңнан қыл”.

Мақал
“Арсызбен алысқанша, Арлымен таныс”.

Аят
“Шүбәсіз, Біз сендерді қорқынышпен, аштықпен һәм мал-мүліктеріңді, жақындарыңды әрі өнімдеріңді (табыстарыңды) кеміту арқылы сынаймыз. Ендеше, сабырлы болғандарды сүйіншілеп қуанта бер”. ("Бақара" сүресі, 155)

Хадис
“Жер жүзіндегілерге рақымдылық көрсетіңдер, сонда аспандағылар (періштелер) сендерге рақымдылық танытады”. (Тирмизи)

Дұға
“Уа, Алла тағалам! Қиыншылықарда сабыр етуді әрі одан құтылуды, шейіттердің дәрежесін, ізгілердің өмірін, дұшпандарымды жеңуімді һәм пайғамбарларға дос болуды Өзіңнің жомарттылығыңнан сұраймын”. (Пайғамбарымыздан (с.а.с) дұғасы)

Мақал
“Ақымаққа күнде той, Ақылдыға күнде ой”.

Аят
“(Өліге жан бітіріп) өмір сыйлайтын да, (тірінің жанын алып) өлтіретін де бір Өзі. Бәрің де Оған қайтудасыңдар”. ("Юнус" сүресі, 56)

Хадис
“Ләззаттарды күл-талқан етуші өлімді көп еске алыңдар”. (Тирмизи)

Дұға
“Уа, Раббым! Өлмей тұрып тәубе етуімді, жан тапсыруымның жеңіл болуын және өлгеннен кейін Өзіңнің кешірімің мен мейіріміңе жолығуымды нәсіп ете гөр”.

Мақал
“Өзекті жанға бір өлім”.

Аят
“...Ендеше, оларды жөніне қоя бер! Өздеріне уәде етілген мерзімді күндеріне тап болғанша өздері дендеп бойлаған жалғанның (саз балшығына) батып, ойнап-күліп жүре берсін”. (Мағариж сүресі, 42)

Хадис
“Адам баласының бойында болатын ең жаман қасиет; тым сараңдық пен өте қорқақтық”. (Әбу Дәуіт)

Дұға
“Уа, Алла тағалам! Бақытсыздыққа жол ашқан күнәларымды кешіре гөр. Нығметтерден құр қалдырған күнәларымды кешір. Дұғаларымның қабыл болуына кедергі болған күнәларымды кешір”. (әзірет Әли (р.а))

Мақал
“Қорқақтың қатыны болғанша, Батырдың жесірі бол”.

Аят
“(Кәпірлердің жанын аяусыз жұлқып) суырып алушы періштелерге, (мүміндердің жанын қинамай) байыппен алушы періштелерге”. ("Назиғат" сүресі, 1-2)

Хадис
“Дұға – мүміннің қаруы әрі діннің тірегі һәм аспан мен жердің нұры”. (Рамуз әл-Әхадис)

Дұға
“Уа, Раббым! Бізді ықыласты болған тақуа құлдарыңның қатарынан еткейсің. Тақуалардың имамы (жол бастаушысы) пайғамбарымыз (с.а.с) бен оның сахабаларына салауат айтып, сәлем жолдаймыз”.

Мақал
“Аузына келгенін сөйлеу – ақымақтың ісі, Алдына келгенін жеу – хайуанның ісі”.

Аят
“(Егер Аллаға қарсы келетін болсам), мені Алланың жазасынан ешкім құтқара алмайды, сондай-ақ, Одан басқа пана таппасым да анық”. (Жын сүресі, 22)

Хадис
“Бұл дүниеде жақсылық жолында болған адам ақиретте де жақсылық жолында болады”. (Рамуз әл-Әхадис)

Дұға
“Уа, Раббым! Қияметте есеп беруге тұрғанымызда мені, ата-анамды және мұсылмандарды қиындықтан құтқара гөр”.

Мақал
“Әкенің еккен ағашы ұрпаққа сая”.

Аят
“Алланың көмегі мен (өзге жеңістерге жол ашқан) жеңісі келген кезде, ал, адамдар керуен керуен (топ топ) болып Алланың дініне кіргендерінде Раббыңа мадақ айтып, Оны пәкте және Одан кешірім тіле! Өйткені ол тәубелерді қабыл етуші Таууаб. (Насыр сүресі, 1-2-3)

Хадис
“Константинополь (Ыстамбұл) сөзсіз алынады. Оны ашқан қолбасшы қандай керемет қолбасшы, оны алған әскер қандай керемет әскер”. (Муснәд)

Дұға
“Уа, Жаратушы Ием! Үмбетті жеңілдіре гөрме, дұшпандарымызды басындырма, бізді жеңіске жеткіз”. (Фатих Султан Мехмед)

Мақал
“Батырдың атын жау шығарады, Шешеннің атын дау шығарады”.

Аят
“Алайда, әлемдердің Раббысы Алла қаламайынша сендер ештеңе де қалай алмайсыңдар”. ("Тәкуир" сүресі, 29)

Хадис
“Біле тұра күнә жасауын қоймай әрі кешірім сұрамағандарға қандай өкініш!” (Рамуз әл-Әхадис)

Дұға
“Уа, Алла тағалам! Менің дене-пішінімді көркем жаратқаныңдай, жан-дүниемді де көркем ете гөр! Менің жүзімді тозақ отынан сақтағайсың”. (Айнаға қарағанда оқылатын дұға)

Мақал
“Арғымақ аттың белгісі аз оттарда көп жусар. Асыл адам белгісі аз сөйлерде көп тыңдар”.

Аят
“Ендеше, уа, адамдар! (Алла сендер үшін жер бетін тіршілікке жайлы тұрақ етті, олай болса), жердегі барлық нығметтердің адал, таза әрі денсаулыққа пайдалысынан жеп-ішіңдер. (Кәпір көсемдер мен оларға ергендерді азғырушы) шайтанның басқан ізімен жүрмеңдер. Шүбәсіз, ол сендерге анық дұшпан”. ("Бақара" сүресі, 168)

Хадис
“Серуенге шығыңдар, денсаулықтарың мықты болады”. (Табарани)

Дұға
“Уа, Раббым! Жүрегіме Өзіңді еске алудың ләззатын татқыза гөр әрі Өзіңді еске алуды ұмытудан жүрегімді ояу ұстай гөр”. (Шәйх Ахмед әл-Алауи)

Мақал
“Жақсы дәрі – тілге ащы болғанмен, дертке шипа, Жақсы сөз – құлаққа жайсыз болғанмен, іске шипа”.