طويت كم من المسافه وعودت ؟
للشوق .. وأنسام الليال العليله

حبيت من بعدك كثير .. وتعودت
على السهر مع صوتهم كل ليله

راح تعرفيني لا رحلت
ساعتها بس .. راح تعرفين
أي المداين .. خلّتك
وأي العناوين !

بتوقفين
تحت المطر
ويبللّ أهدابك
وبتفقدين مظلتك
وايدين أحبابك
وبتغرقين
ساعتها بس... راح تعرفين

بياخذك غصب الحنين
لقهوتنا ذيك
وبتجلسين
نفس المكان
وبتشربين " مرارة الفرقا عليّ "
وتلملمين اللي بـ يسيل
ما بين ايديك
من الحكي
وهمساتنا
يوم كنت أنا
ويّاك
على هالطاوله...
وبتحزنين

وبتحزنين أكثر
أذا إنتي ذكرتي ضحكتك
وانتي معاي
وكل ما يمر الوقت فينا
تصغرين
وبترجعين طفله على نشوة عمر
تتمرجحين
وكل ما نظرتي مرايتك
بتمرّ يدك
غفله على ملامحك
وبتلمسين
" أثر غزل كلامي فيك "
وبيفاجئك
لا جفّت امطار الغزل
هذي الخطوط اللي انبتت
على الجبين!
وبتفقدين
حتى فرح أنوثتك

أنا اللي كنت
أحفظ تواريخ الندى
كل مره مرّ فيها
وترك
على خدودك نجمتين
واحفظ متى
فزّت على صدرك شغف
حمامتين
ومتى الوسِم
ومتى يغيب هلال بين الشفتين
ومتى يبين!

أنا اللي كنت
أتفقّد أهدابك... عسى
ما طاح شي
وأعدّها هدب هدب
صبح ومسا
أعدّها
في كل مره... مرتين

بتفقدين بعدي فرح أنوثتك
وكل ما يجي فصل الشتا
بيعذّبك
تفتح عليك ريح الشمال
ابوابها
بيصير قلبك وقتها
جمره
تبي تدفى
ولا
تلقا دفا بثيابها
كل ما تفتّش ما لقت
إلا عيون الشامتين!

بعد الفراق
بتعرفين وش كنت لك
كل ما قريتي لي قصيده
تدوّرين باقي أثر لك بالحروف
باقي عطر ؟
باقي طيوف ؟
باقي سوالف ما انتهت ؟

وبتندمين
أدري على كل لحظه مرت بيننا
إنتي وأنا ويا الهوى
وكنا الثلاثه... ساكتين
ساعتها بس... راح تعرفين
وساعتها انتي بتكونين
بالنسبه لي ..
أماني شمعه وانطفت
مع السنين

وبتمرّ بك
ياما دروب ٍ عابره
وياما قلوب ٍعابره
وبتذكرين
بس قلب مرّك
وامتلت كفك ربيع

هذاك كان
هو آخر عهدك وقتها
بالياسمين ..


- مسفر الدوسري

‏حبيبي والله اني ماتباطيتك .. ولا طوّلت
‏تجي .. والبال دايم بالطواري مايشاورني

‏وانا كل مايسيّرني الحنين لباب بيتك قلت
‏يارب ان جيتك اذكرك فيني .. ما تذكرني

من مطر صمتك ازهر بالورق بوحي
ولا ذبل .. ورد سور البيت بأسبابك

أذكر انك زرعتي ورده بروحي
اقطفيها .. وحطيها على بابك

دافع خطايا البشر ما هو مجرد ظروف
احيان من كرهها و احيان من خوفها

بس انت زلتك يالقلب الكبير العطوف
ان كان ما شفتها .. قلبي يبي يشوفها

‏
‏خليتني للجروح اربع .. ليالي وانا
‏خليتك بحضن ضحكات الليالي تنام !

على كثر ما امنع عن البال ذكراك
للحين .. وانا للوصال اتشفق

حاول تساعدني عشان اقدر انساك
الأيد دايم وحدها .. ماتصفق

‏وش هالفراق اللي عجزت استحمله !!
‏بنساك .. ولا اسامحك .. ولا اقتلك ؟؟

‏" اشتقت لك " وانا وصلت لـ مرحله
‏مفروض فيها ما اقول " اشتقت لك "

كيف قلبك ..
في دروب الفقد تايه
وكيف انا .. ما أبيك
شوفي نفسك بالمرايه
يمكن تعرفين وش سوى غيابي فيك

منت مخطي لو انك في خطاك اسرفت
‏الصواب الصواب ؟ .. يصيب في مقتَل

‏ادري إن الجفا مصيرنا .. من شفت ..
‏السما فوقنا تمطِر ، و لا نِبتَل !!

لا تقول اخر رساله جات .. ماهي منك
خطك اعرفه مثل ما اعرف خطوط ايديني

من الصدفه احيانًا يكتب الشاعر قصيدته قبل ان يشعر بها

سعيد بتأهلي لقائمة الـ٤٨ شاعر في برنامج شاعر المليون - انتظرونا يا أصدقاء ❤️

انا مثل ما قلت انت : واسوء من اللي قلت
لكني ... احبك كثر ما تذكر عيوبي

تزول العلاقات القديمة وانا مازلت
امارسك طيش ويغفر الله لي ذنوبي