توّصى على روحك من البرد والنسناس
ترا طيحتك .. يمرض بها واحدٍ غيرك

قبل لا يطيب لْك المسامر مع الجلاس
تذّكر صباح الخير .. لامن فقد خيرك

على شوفك اعدّ الليالي صحا ، ونعاس
"مشاوير عمري كل ابوها مشاويرك"

تبسّم ترا معك المواعيد ، حبس انفاس
ولا تعتذر لي : فإنشغالك وتقصيرك

تغانم سلامي ، وأخذني عن عيون الناس
أنا عاذرك من غير ما اسمع معاذيرك

لو اللي يشوف الشعر ، حبرٍ على قرطاس
ينافس هل الساحه بوصفك ، وتصويرك

تسيّد عليهم فالعذوبه ، وفالإحساس
فما بالك : بمن يكتبه تحت تأثيرك

‏لا تعلّم غافي القلب عن خضر الطعون
‏هاتها والله كفيل بمرار إحساسها

‏فدوتك قلبٍ على كل عرقٍ به تمون
‏والطعون اللي من ايديك يسلم راسها

‏فيك ماطعت السوالف وصدّقت الظنون
‏سيرتك يحرم على خاطري دنّاسها

‏من عرفتك والقصايد تحت فيّ الغصون
‏جعل مايزعل مطرها .. على نسناسها

روح الإنسان مبنيّه على ماضيه

في رجا الشوق وإن غابت مواعيده
‏مامحى الوقت رسمٍ لك على بالي

‏وإن شكى القلب من همّه وتسهيده
‏ترضي الغالي ، الضحكة من الغالي

‏سمّ وآمر : على الخفاق ياسِيده
‏مستخفّه عليك الروح من تالي

‏عيّد الخاطر اللي شوفتك عيده
‏يابعد من رسايلهم بجوالي

والله وجتني بك الدنيا وأنا لاهي
‏لولا الدفا اللي بصوتك ماتذكرتك

‏هز البطا صورتي ولا على ماهي؟
‏دار الزمن فيك .. ولا الناس غيّرتك؟

‏مدري متى مات لك حبٍ على شفاهي
‏بس أذكر إني سهرتك عمر وأسهرتك

‏دور وتلقى عساك تعيّن أشباهي
‏أنا تنازلت عنّك .. كثر ما أخترتك

ما أنت مثلك فالقديم من الرسايل
فيك واحد حي .. والثاني توّفى

انا اول من معك خاض المعارك ، وآخر الناجين
‏كثر ماتندلع للحزن ثوره .. وتخمد ثوره

إذا لي فيك امل .. لا تقطع امالي
‏معك لا زال باقي بالدروب ، دروب

‏دخيل عيونك اللي دمعها غالي
‏دموعك من متى عن سالفتكْ تنوب

‏تبسّم .. والهموم حسابها تالي
‏لك الله : مايمر الهم لك من صوب

‏لا تحرمك السنين تعيشها خالي
‏ترا ما اقسى من الضحكه على المغصوب

انتهت ولا ابتدت معك مرحلة الحنين
‏الأكيد : إن لوعة الفقد ماجربتها

‏كثر ما فـ ادراج الأيام .. غيرك غايبين
‏ماذكرت إلا أنت من سبتها لـ سبتها

‏يوم أشوفك بين حد الشكوك من اليقين
‏فيك لا صدقت عيني ، ولا كذبتها

‏بس مدري من كلامك وش اخر كلمتين
‏عدتها مليون مره .. ولا استوعبتها

خَلت الأيام منْك .. ووادعت عيني
‏خطاوي الرايحات من السنين بهون

‏تخاف ألقى بعدك اللي ينسيني
‏واحد يقدر ينسيني غلاك؟ شلون

‏عسى اللي جابني يمك .. يوديني
‏معك مانيب لاقي للدموع عيون

‏إذا انت تحبني .. بتعرفْ وش فيني
‏انا اكثر : من عيونه فالسكات تخون