Baxmal tumanida chorvachilik tarmog‘ini zamonaviy yondashuvlar asosida rivojlantirish, ozuqa bazasini mustahkamlash hamda ilg‘or xorijiy tajribalarni joriy etish borasidagi xalqaro hamkorlik yangi bosqichga ko‘tarilmoqda.

Joriy yilning 22-iyul kuni Xitoy Xalq Respublikasining Ichki Mo‘g‘uliston Avtonom Rayoni Qishloq xo‘jaligi va chorvachilik departamenti hamda Baxmal tumani hokimligi o‘rtasida tumanda chorvachilikni rivojlantirish, ozuqa ekinlarini yetishtirish, ularni qayta ishlash va zamonaviy texnologiyalarni joriy etish bo‘yicha hamkorlikni nazarda tutuvchi Anglashuv memorandumi imzolandi.

Mazkur muhim tadbirda Ichki Mo‘g‘uliston Avtonom Rayoni Kotibining o‘rinbosari, Savdo departamenti rahbari, Qishloq xo‘jaligi va chorvachilik departamenti rahbari, shuningdek, Xitoyning chorvachilik yo‘nalishida faoliyat yurituvchi bir qator yetakchi kompaniyalari vakillari ishtirok etdilar.

Memorandum doirasida Baxmal tumanida chorvachilikni zamonaviy texnologiyalar asosida rivojlantirish, sifatli ozuqa ekinlarini yetishtirish, ularni saqlash va qayta ishlash tizimini takomillashtirish, investitsiyalarni jalb etish hamda xitoylik mutaxassislarning ilg‘or tajribalarini amaliyotga joriy etish rejalashtirilgan.

Ushbu hamkorlik tumanning chorvachilik salohiyatini yanada oshirish, mahsuldorlikni ko‘paytirish, yangi ish o‘rinlarini yaratish va agrar sohada xalqaro tajribalarni keng tatbiq etishga xizmat qilishi bilan ahamiyatlidir. Memorandum Baxmal tumanida chorvachilik tarmog‘ini yangi rivojlanish bosqichiga olib chiqish yo‘lidagi muhim qadam sifatida e'tirof etilmoqda.