Tadbirda siyosatchilar, xalqaro moliyaviy institutlar, islomiy moliya sohasi mutaxassislari va bank-moliya sektori vakillari ishtirok etdi. Ular tomonidan islomiy moliyaning barqaror va inklyuziv iqtisodiy tizimlarni rivojlantirishdagi o‘rni muhokama qilindi.

Anjumanda islomiy moliyaviy infratuzilmani yaratish, sukuk va “yashil sukuk” bozorlarini rivojlantirish, shariatga muvofiq boshqaruv tizimini takomillashtirish hamda moliya sohasi kadrlarining malakasini oshirish bo‘yicha ilmiy-amaliy yangiliklar taqdim etildi. Shuningdek, islomiy moliyaning barqaror rivojlanish, ijtimoiy inklyuziya va iqtisodiy diversifikatsiyaga qo‘shadigan hissasi haqida ham atroflicha so‘z yuritildi.

Ma’ruzalar, panel muhokamalar va bilim almashish sessiyalari davomida ishtirokchilar islomiy moliyani global barqaror moliya tizimlari bilan uyg‘unlashtirish, shu orqali milliy moliyaviy barqarorlikni kuchaytirish bo‘yicha amaliy taklif va tavsiyalarni bildirdilar.

Anjuman doirasida Bank-moliya akademiyasi va xorijiy oliy ta’lim muassasalari, xalqaro moliya institutlari, ilmiy markazlar o‘rtasida qator hamkorlik kelishuvlari imzolandi. Jumladan, Turkiyaning Marmara universiteti, Qozog‘istonning Narxoz universiteti, Malayziyaning Malaya universiteti, INCEIF – Islomiy moliya bo‘yicha xalqaro ta’lim markazi hamda IFAAS Advisory Services kompaniyasi bilan memorandumlar tuzildi. Ushbu kelishuvlar akademik almashinuv, qo‘shma ilmiy tadqiqotlar, seminar va forumlarda ishtirok etish, talabalar hamda professor-o‘qituvchilar uchun qisqa muddatli o‘quv dasturlarini tashkil etishni o‘z ichiga oladi.

Тадбирда сиёсатчилар, халқаро молиявий институтлар, исломий молия соҳаси мутахассислари ва банк-молия сектори вакиллари иштирок этди. Улар томонидан исломий молиянинг барқарор ва инклюзив иқтисодий тизимларни ривожлантиришдаги ўрни муҳокама қилинди.

Анжуманда исломий молиявий инфратузилмани яратиш, сукук ва “яшил сукук” бозорларини ривожлантириш, шариатга мувофиқ бошқарув тизимини такомиллаштириш ҳамда молия соҳаси кадрларининг малакасини ошириш бўйича илмий-амалий янгиликлар тақдим этилди. Шунингдек, исломий молиянинг барқарор ривожланиш, ижтимоий инклюзия ва иқтисодий диверсификацияга қўшадиган ҳиссаси ҳақида ҳам атрофлича сўз юритилди.

Маърузалар, панел муҳокамалар ва билим алмашиш сессиялари давомида иштирокчилар исломий молияни глобал барқарор молия тизимлари билан уйғунлаштириш, шу орқали миллий молиявий барқарорликни кучайтириш бўйича амалий таклиф ва тавсияларни билдирдилар.

Анжуман доирасида Банк-молия академияси ва хорижий олий таълим муассасалари, халқаро молия институтлари, илмий марказлар ўртасида қатор ҳамкорлик келишувлари имзоланди. Жумладан, Туркиянинг Мармара университети, Қозоғистоннинг Narxoz университети, Малайзиянинг Малая университети, INCEIF – Исломий молия бўйича халқаро таълим маркази ҳамда IFАAS Advisory Services компанияси билан меморандумлар тузилди. Ушбу келишувлар академик алмашинув, қўшма илмий тадқиқотлар, семинар ва форумларда иштирок этиш, талабалар ҳамда профессор-ўқитувчилар учун қисқа муддатли ўқув дастурларини ташкил этишни ўз ичига олади.

Mazkur xalqaro konferensiyaning ikkinchi kunida Akademiyaning keng miqyosli xalqaro aloqalar tizimi yanada boyidi — Rossiya, Turkiya va Malayziyadan kelgan nufuzli ta’lim va ilmiy muassasalar vakillari bilan yangi hamkorlik yo‘nalishlari muhokama etildi.

Uchrashuvlar davomida Rossiyaning “Oliy iqtisodiyot maktabi” Milliy tadqiqot universiteti, Turkiyaning Marmara universiteti, Malayziyaning INCEIF (Islomiy moliya bo‘yicha xalqaro ta’lim markazi), IFAAS Advisory Services kompaniyasi hamda AlmaU delegatsiyalari vakillari bilan ikki tomonlama muloqotlar o‘tkazildi.

Muzokaralarda ta’lim va tadqiqot sohasidagi hamkorlikni chuqurlashtirish, ilmiy loyihalar va o‘quv dasturlarini birgalikda amalga oshirish, islomiy moliya va fintex yo‘nalishlarida tajriba almashish masalalari muhokama etildi.

Uchrashuvlar natijasida o‘zaro hamkorlikni mustahkamlash hamda ilmiy-ta’lim sohasida yangi qo‘shma tashabbuslarni amalga oshirish bo‘yicha kelishuvlarga erishildi.

Мазкур халқаро конференциянинг иккинчи кунида Академиянинг кенг миқёсли халқаро алоқалар тизими янада бойиди — Россия, Туркия ва Малайзиядан келган нуфузли таълим ва илмий муассасалар вакиллари билан янги ҳамкорлик йўналишлари муҳокама этилди.

Учрашувлар давомида Россиянинг “Олий иқтисодиёт мактаби” Миллий тадқиқот университети, Туркиянинг Мармара университети, Малайзиянинг INCEIF (Исломий молия бўйича халқаро таълим маркази), IFАAS Advisory Services компанияси ҳамда АлмаУ делегациялари вакиллари билан икки томонлама мулоқотлар ўтказилди.

Музокараларда таълим ва тадқиқот соҳасидаги ҳамкорликни чуқурлаштириш, илмий лойиҳалар ва ўқув дастурларини биргаликда амалга ошириш, исломий молия ва финтех йўналишларида тажриба алмашиш масалалари муҳокама этилди.

Учрашувлар натижасида ўзаро ҳамкорликни мустаҳкамлаш ҳамда илмий-таълим соҳасида янги қўшма ташаббусларни амалга ошириш бўйича келишувларга эришилди.

Ana shunday faoliyat natijasi o‘laroq, “Oliy iqtisodiyot maktabi” Milliy tadqiqot universiteti bilan “Hamkorlikka asoslangan moliya: o‘sish uchun barcha sharoitlar yaratilgan” mavzusida xalqaro davra suhbati tashkil etildi. Unda Rossiya va O‘zbekistonning moliyaviy ta’lim va tadqiqot muassasalari vakillari ishtirok etib, xalqaro korporativ boshqaruv standartlari, ESG, suveren qarzlarni konversiya qilish amaliyoti va islomiy moliyaning huquqiy asoslari haqida ma’ruzalar tinglandi.

Shuningdek, davra suhbati davomida olimlar va islomiy moliya sohasidagi xalqaro ekspertlar global moliyaviy tizimda hamkorlikka asoslangan moliyaning rivojlanish istiqbollarini muhokama qildilar.

Ma’ruzalar va taqdimotlardan so‘ng Bank-moliya akademiyasi hamda “Oliy iqtisodiyot maktabi” Milliy tadqiqot universiteti o‘rtasida ilmiy hamkorlik to‘g‘risidagi kelishuv imzolandi. Unga asosan tomonlar islomiy moliya, ESG moliya instrumentlari, korporativ boshqaruv va barqaror moliya sohalarida qo‘shma ilmiy-tadqiqot ishlarini yo‘lga qo‘yish, onlayn va an’anaviy formatda seminar hamda ilmiy anjumanlar tashkil etish, xalqaro ilmiy nashrlarda maqolalar chop etish va kadrlar salohiyatini oshirish borasida hamkorlik qiladilar.

Shu bilan birga mazkur hujjat doirasida professor-o‘qituvchilar va ilmiy xodimlar o‘rtasida tajriba almashish, ilmiy maqolalar va o‘quv-uslubiy qo‘llanmalar tayyorlash bo‘yicha ham hamkorlik amalga oshiriladi.

Ана шундай фаолият натижаси ўлароқ, “Олий иқтисодиёт мактаби” Миллий тадқиқот университети билан “Ҳамкорликка асосланган молия: ўсиш учун барча шароитлар яратилган” мавзусида халқаро давра суҳбати ташкил этилди. Унда Россия ва Ўзбекистоннинг молиявий таълим ва тадқиқот муассасалари вакиллари иштирок этиб, халқаро корпоратив бошқарув стандартлари, ESG, суверен қарзларни конверсия қилиш амалиёти ва исломий молиянинг ҳуқуқий асослари ҳақида маърузалар тингланди.

Шунингдек, давра суҳбати давомида олимлар ва исломий молия соҳасидаги халқаро экспертлар глобал молиявий тизимда ҳамкорликка асосланган молиянинг ривожланиш истиқболларини муҳокама қилдилар.

Маърузалар ва тақдимотлардан сўнг Банк-молия академияси ҳамда “Олий иқтисодиёт мактаби” Миллий тадқиқот университети ўртасида илмий ҳамкорлик тўғрисидаги келишув имзоланди. Унга асосан томонлар исломий молия, ESG молия инструментлари, корпоратив бошқарув ва барқарор молия соҳаларида қўшма илмий-тадқиқот ишларини йўлга қўйиш, онлайн ва анъанавий форматда семинар ҳамда илмий анжуманлар ташкил этиш, халқаро илмий нашрларда мақолалар чоп этиш ва кадрлар салоҳиятини ошириш борасида ҳамкорлик қиладилар.

Шу билан бирга мазкур ҳужжат доирасида профессор-ўқитувчилар ва илмий ходимлар ўртасида тажриба алмашиш, илмий мақолалар ва ўқув-услубий қўлланмалар тайёрлаш бўйича ҳам ҳамкорлик амалга оширилади.