«Энг осон шарҳ» китоби тақдимоти бўлиб ўтди

2026 йил 17 октябрь куни «Hilol-Nashr» нашриётининг суҳбатгоҳида Одинахон Муҳаммад Содиқ ўзбек тилига таржима қилган «Энг осон шарҳ» — «Арбаъин Нававий» шарҳи китобининг тақдимоти бўлиб ўтди.

Қамариддин Бекмуҳаммад олиб борган тадбирда устоз Исҳоқжон домла Муҳаммаджон ўғли, Қудратуллоҳ домла Сидиқметов ҳамда китобхонлар иштирок этдилар.

💠Асар шаръий ва исломий фанлар доценти Жалолуддин ибн Абдуллоҳ Шиҳата қаламига мансуб. У Одинахон Муҳаммад Содиқнинг таклиф ва ташаббуси билан ёзилган ҳамда у киши томонидан ўзбек тилига таржима қилинган.

💠Муаллиф «Арбаъин Нававий»га ёзилган шарҳлар ва уламоларнинг сўзларига таяниб, ҳадисларни ихчам ва содда услубда шарҳлаган. Китобда ҳадис ровийларининг қисқача таржимаи ҳоли келтирилган, нотаниш сўзларнинг маънолари изоҳланган. Шунингдек, ҳадислардан олинадиган фойдалар ва амалий машқлар берилган.

💠Исҳоқжон домла китобнинг оммабоплиги ва унда динимизнинг асосини ташкил этувчи муҳим ҳадислар жамланганини таъкидлаб, «Амаллар ниятга боғлиқдир» ҳадисини шарҳлаб бердилар. Қудратуллоҳ домла эса асарнинг ўзига хос услуби, машҳур «Жаброил ҳадиси»дан олинадиган фойдалар ҳамда китобда ниятни тўғрилаш, ибодатларни ислоҳ қилиш ва ихтилофлардан сақланиш каби мавзуларнинг ёритилиши ҳақида сўз юритдилар.

💠Китоб таржимони Одинахон Муҳаммад Содиқ асарни нашрга тайёрлаш ва тақдимотни ташкил этишда хизмат қилган барчага миннатдорчилик билдирдилар. Шунингдек, «Hilol-Nashr»нинг 15 йиллиги муносабати билан нашриёт жамоаси ва меҳмонларга эсдалик совғалари топширилди.

Маросим Қуръони карим тиловати ва хайрли дуолар билан якунланди.

🌿 «Энг осон шарҳ» китобини «Hilol-Nashr» дўконлари ҳамда hilol.uz сайти орқали харид қилишингиз мумкин.

❤️ @BintuSodiq