بسم الله الرّحمٰن الرّحيم والصلّاةُ والسّلامُ علىٰ أشرف الأنبياء والمرسلين مُحمّدٍ وآله الطيّبين الطّاهرين.

الفسيفساء mosaicism:
حالة تكون بيها خلايا الجسم مختلفة جينيًّا عن بعضها، بأن تكون ناشئة من طفرات بالمادة الوراثية مالتنا سواء بعملية التضاعف أو بأثر البيئة epigenetics، يأدي -مثلا- إلى اختلاف بأعداد الكروموسومات بين خلية وأخرى، مثلًا: بعض حالات متلازمة داون تكون بيها بعض الخلايا تحتوي ٣ نسخ من الكروموسوم ٢٣، والبعض الآخر يحتوي على نسختين (وهو العدد الطبيعي)، وكلما زادت نسبة الخلايا غير الطبيعية كلما قوت أعراض المتلازمة.

الخيمر chimerism:
حالة يكون بيها الاختلاف الجيني بين الخلايا نابع من منشأين، بأن مثلا يبتلع أحد التوائم داخل رحم الأم التؤام مالته!
بإحدى الحالات امرأة بولاية واشنطن طلعتها بتحليل ال DNA إن هي مو أم لأطفالها! لحد ما اكتشفوا بعدين إن المجموعة الأخرى أو النوع الآخر من الخلايا هو الأم الحقيقة! 😁

الحلو بالموضوع إن أصل الكلمة جاي من أسطورة بالتراث الأغريقي والي هي Chimera مخلوقة/وحشة تنفث النار، رأسها رأس أسد وجسمها ماعز وذيلها حية.

الإسقربوط Scurvy:
مرض ناتج عن نقص فيتامين C، الّي مصدره الأساسي الفواكه والخضراوات، طبعًا الناضجة منهن تحتوي على كميات أكبر من هالفيتامين مقارنة بالمجمدة أو المعلبة، بس الجود من الموجود، فلو هذا المتوفر أنعم الله.

زين شنو فائدة هذا الفيتامين؟
تقريبًا أهمها يساهم بتكوين الكولاجين، بأن يشتغل كـcoenzyme، بعملية إضافة OH للبرولين proline فينتج hydroxyproline، وهاي عملية مهمة بتصنيع الكولاجين [البروتين الرئيسي بالأنسجة الضامّة].

أعراض المرض:
الإرهاق والتعب والضعف وآلام بالمفاصل والعضلات، وفقر الدم وتورم ونزف اللثة ووقوع الأسنان، وتقل التئامات الجروح، بحيث حتّى الجروح القديمة تنفتح! حتّى لو أُصيب بها المريض من ٥٠ سنة! لأن ماكو بعد كولاجين كافي يسدها!
#أمراض

سوء التغذية العامل الرئيسي لهذا المرض، وعدم أخذ فيتامين سي لفترة طويلة، وعلى الرغم من المرض فتك بالوادم من فجر التاريخ إلا أن أقوى شيء جان بالقرن ال١٦ لل١٩ ميلادي، وخصوصا برحلات الأوروبين بالسفن للاستكشاف والاحتلال.*
بحيث يذكرلك أحد الضباط برحلة استكشافية إنه نادرًا ما يمر يوم بدون ما يذبون جثة بالبحر، طبعًا هاي بسبب عدم توفر الفواكه والخضراوات بالرحلات الطويلة بالبحر وعدم تأكدهم من العلاج.

* يكولك إن الصليبيّين فقدوا رجال بسبب الإسقربوط أكثر مما فقدوه بالمعركة ضدّ المسلمين.

السل الرئوي Tuberculosis, TB:
مرض تسببه البكتريا العصوية Mycobacterium tuberculosis [+] أو عصيات كوخ (اكتشفها روبرت كوخ في سنة ١٨٨٢).

أكو ٣ مراحل للمرض:

¹ العدوى الأوّلية: تنتقل هذي البكتريا من الشخص المصاب للصاحي من خلال الهواء/الرذاذ.

² العدوى الكامنة: أوّل ما تدخل من خلال المسار التنفسي وتروح للرئتين فراح تحاربها الخلايا المناعية، فتصير البكتريا غير نشطة وما تكدر تنقل العدوى، يكولك ٩٠% من المصابين بالسل عدواهم كامنة.

³ المرض النشط: راح هنا تنتظر البكتريا لحد ما جسمك يضعف (هم نازل وهم يدبج ع السطح) ببعض الحالات أو الأمراض المناعية علمود تستغل الفرصة وتتنشط (بين كل ٥ حالات وفاة بمرض الإيدز وحدة منهن سببها السل الرئوي).

طبعًا ممكن تمتد البكتريا بعدين لأجزاء أخرى من الجسم مو بس الرئتين.
#أمراض
#مرض_بكتيري

للأسف تشخيص العدوى الكامنة صعب، بس نمشيها مدام غير معدية، بس النشط شوية صعب التعامل وياه، لأن غالبًا الأدوية الموصوفة هواي وعلى مدة طويلة (تصل ل٩ أشهر) وتظهر أعراض جانبية تخلي المصاب ييأس ويقطع العلاج بمنتصف الطريق.

وهاي الحركة مالت ما ينهي كورس العلاج مالته مؤذية مو بس إله لا، للبشر بصورة عامة، لأن البكتريا راح تقاوم الدواء وبعدين يجوز تنتشر لغيره وتتكاثر وتظهرلنا سلالات مقاومة للبكتريا، وهي أصلا هالبكتريا مشهودلها بالتكيف مالتها ومقاومة العلاجات وقيس أنت.

من تتكاثر البكتريا بداخل الرئتين راح تدمر الخلايا المضيفة (خلايا الرئتين) مسببة ألم بالصدر ويبدي المريض يكح دم، الضرر بأنسجة الرئتين يسبب نقص بالأوكسجين، وأنوب تقل الشهية وإنتاج المريض للحديد.
هاي بعدنا بالرئتين، ما أحجيلك من تنتقل لباقي أعضاء الجسم 💀
تنتقل ¹للجهاز الهيكلي وتسبب ألم بالظهر وصعوبة بالحركة ²وبالأمعاء وتسبب ألم بالبطن ³وللدماغ وتسبب صداع وفقدان الوعي.

هسة أنت مكيف عبالك هاي بس بالعصور الفيكتورية وناس ماتت وخلصت، أكولك تدري ثاني أكثر مرض معدي بسنة ٢٠٢٢ ورا كوفيد ١٩ هو السل الرئوي 💀

-

شلون يشتغل الأسبرين؟
الأسبرين دواء مثبط لإنزيم الـcyclooxygenase.
وظائف هذا الإنزيم:
¹ يشارك بتصنيع هرمون الـprostaglandins (هرمون جدا مهم ومفيد بالالتهاب يسبب الانتفاخ والألم والحمى) بالتالي الأسبرين ح يقلل الأعراض هذي.
² يشارك بتصنيع الـthromboxane A2 (TXA2) أيضًا (يساعد بتجمع الصفيحات الدموية) بالتالي الأسبرين همات يقلل من هالشيء، فتشوف يوصفون الأسبرين بالـheart attacks (تجمع خثر الدم بداخل الشرايين وتضييقها ومنع مرور الدم للقلب) لأن يقلل خاصية تخثير الدم بالصفيحات الدموية.

بالعصور القديمة النباتات المحتوية على الـSalicylic acid مثل الصفصاف جانت مستخدمة لتقليل الألم والحمى، الآشوريين والمصرين القدماء استخدموه، والطبيبين اليونانيين أبقراط وگالين نصحوا بيه أيضًا، بس طبعًا جان يعرفونه مفيد من باب الملاحظة بس ميعرفون شلون وليش، بمرور الوقت عزلوا الـSalicylic acid ظلوا الأطباء يوصفوه كمسكن وعلاج للروماتزم أيضًا.
بداخل شركة بوير سنة ١٨٩٧ الكيميائي الألماني فلكس هوفمان عدل الsalicylic acid إلى acetylsalicylic acid الأسبرين المعروف.

بالسنة التالية رفضت الشركة الدواء 💀 وما قبلوا يوزعوه للسوك لأن جانوا متأملين بدواء لاخ يردون يركزون عليه (الهيروين) إي نعم هم همات صنعوه بسنة ١٨٩٧ أيضًا ورادوا يطلقوه كعلاج للسعال، المهم تالي صفت لأن الرفضه جربه ع روحه وعلى أرانبه وشافه اشتغل.

Human genome project:
بسنة ١٩٩٠ بدوا مشروع تسلسل الحمض النووي البشري، معرفة تسلسلات النيوكليوتيدات المكونة للحمض النووي البشري DNA وجيناته، من خلال sequencing الجينوم (كل الـhuman DNA) مالت عدة أفراد وانوب نجمعها معًا، علمود ينكال سوينا تسلسل جينوم بشري مو تسلسل شخص واحد (كل شخص له تسلسل خاص بيه) وبدعم حكومي ومشاركة العديد من العلماء من عدة دول (الولايات المتحدة، المملكة المتحدة، اليابان، فرنسا، ألمانيا، كندا والصين) وبعد صرف ٣ مليارات دولار نجح المشروع وخلص بسنة ٢٠٠٣، وجانت هذي نقطة تحول بالطب والبايوتكنولوجي.