Uchinchi muammo – to‘g‘ri javoblar qanday?

Ayrim testlarda to‘g‘ri javoblarning mavjud emasligi yoki berilganlar orasidan hammasini to‘g‘ri deyish mumkinligi haqida Komil Jalilov yozdi. Komil akaning gaplarini takrorlab o‘tirmayman, bu yerdan o‘qib olsangiz bo‘ladi.

Yuqorida rasmi berilgan testda to‘g‘ri javob didaktik tahlil bo‘ladi. Ammo bazadagi kalit metodologik ekan. Buni qanday bildik? Testga kirib 10 tadan 10 ta ishlab chiqqan ustozlar didaktikni emas, metodologikni tanlagan ekan.

Xo‘sh, to‘g‘ri javobni tanlagan o‘qituvchining baholarini kim qaytarib beradi? Aynan shu testda xato qilganini bilmagan o‘qituvchi balldan quruq qolaveradimi? Bazadagi xato kimlarningdir bahosi tushishiga, kimlarningdir bahosi ortishiga sabab bo‘lyapti-ku.

@birgap

Mana shu attestatsiyada ishlatilgan testlarning validlik koʻrsatkichlari eʼlon qilinmadi.

Normal test tashkilotlari bunday koʻrsatkichlarni testlar boshlanishidan oldin eʼlon qilib qoʻyadi. Mana, biz senga qoʻyadigan baho haqiqatga oʻta yaqin chiqadi, degan mazmunda.

Gap kelganda aytib ketay, Prezident maktablariga qabul spetsifikatsiyasi va testlar validligi xulosasi hamon eʼlon qilinmadi. Oʻtgan yili vaʼda berishgandi.

@birgap

Taqdimot boshlandi. Kela olmaganlar onlayn koʻrsa boʻladi.

@birgap

Javlon Jovliyevning "Qoʻrqma" asari haqidagi filmni quyidagi havola orqali tomosha qilishingiz mumkin:

https://youtu.be/PYNopQErSuQ?si=W6wOAEGs8v8RYXWZ

P.S. menga yoqdi, sizga ham nimalardir ayta olishiga ishonaman

@birgap

Ustozimning Sevinch ismli qizi bor. Ustoz u qiz chizgan rasmlarni Facebookda ulashib turadi. Haqiqiy isteʼdod egasi Sevinch oʻzi kanal ochibdi. Kanalida nafaqat oʻzi chizgan rasmlar turli mobil ilova, oʻyinlar uchun yaratgan UX / UI dizaynlari, grafik dizaynerlikka oid ishlari va ish jarayonidan lavhalarni ulashib borayotgan ekan. Sohaga qiziquvchilar bor boʻlsa, deb ulashib qoʻyyapman.

Kanal manzili:
https://t.me/sevinchmavlonova

@birgap

O'zbekistonda yangi loyiha - Teach for Uzbekistan ish boshladi. Loyihaning maqsadi - maktablarni yuqori malakali o'qituvchilar bilan ta'minlashda yordam berish. Bunda nopedagogik OTMlar bitiruvchilari tanlovdan va intensiv pedagogik tayyorgarlikdan o'tib, maktablarga o'qituvchi sifatida ishlashga yuboriladi. Ularga pedagogik faoliyati davomida yordam beradigan kuratorlar biriktiriladi. Bu, bir tarafdan, maktabda malakali o'qituvchilar yetishmovchiligini hal qilishga hissa qo'shadi, ikkinchi tarafdan, OTMlar bitiruvchilariga o'zlarini yangi sohada sinab ko'rish, keyingi ish faoliyati uchun kerakli ko'nikmalarni egallashga yordam beradi.

Yuqorida tasvirlangan model asosida ishlaydigan loyihalar ko'p davlatlarda bor. Masalan, o'zim Nyu Yorkda o'qib yurgan paytimda "Teach for Amerika" loyihasining konferensiyasida qatnashganman.

Qiziquvchilarni loyihada qatnashib ko'rishga chaqiraman - balki o'zingizning yangi qirralaringizni kashf etarsiz? Qolaversa, yurt kelajagini qurishga hissa qo'shish imkoniyati. Zero, yoshlarimiz bizdan bilimliroq bo'lsa, tanqidiy fikrlay olsa, biz ko'rmagan orzudagi O'zbekistonni qurishi mumkin ....

Ta'lim tizimi ustidan tushunarsiz tajribalar davom etadi ...

Vazirlar Mahkamasining "Umumiy o'rta ta'lim muassasalarining o'quvchilarini pedagog kasbiga maqsadli tayyorlash va bitiruvchilarning bandligini ta'minlash chora-tadbirlari to'g'risida"gi qarori (№242, 2024-yil 24-aprel) qabul qilindi. Qarorga ko'ra, 2024/25 o'quv yilidan boshlab tajriba-sinov tariqasida maktablarning 10-11-sinflarida "pedagogik sinflar" ochiladi. Bu sinflarni tamomlagan bitiruvchilarga maktabgacha ta'lim muassasalarida (bog'chalarda) tarbiyachi yordamchisi bo'lib ishlash huquqini beradigan sertifikat beriladi.

Pedagogik sinflar kasbiy ta'lim yo'nalishida o'quv rejasiga ajratilgan soatlar hisobidan o'qitiladi. (Bu degani - Maktabgacha va maktab ta'limi vazirligi hali maktab dasturini to'liq o'zlashtirmagan maktab o'quvchisini haftasiga 3 soatdan, jami 204 soat o'qitib, qo'liga "pedagog" degan hujjat bermoqchi degani). Qarorda belgilanishicha, o'quvchilarga 10-sinfda pedagog kasbining ahamiyati, o'ziga xos xususiyatlari, qadriyatlari, odob-axloqi, tarbiyachining kasbiy sifatlari haqida tushunchalar beriladi, 11-sinfda esa pedagogika, psixologiya, metodika (!!!) bo'yicha boshlang'ich bilimlar beriladi va chuqurlashtiriladi, tanishuv amaliyotlari tashkil etiladi.

Maktabgacha ta'lim muassasasi - bolani vaqtincha ushlab turadigan joy emas. Kichik yoshdagi bolaning ta'limi va tarbiyasi - murakkab va mas'uliyatli jarayon, chunki bolaning kelajak hayoti uchun fundament aynan shu yoshda shakllanadi. Maktabgacha yoshdagi bola ta'limi bilan shug'ullanadigan mutaxassis bu yoshdagi bolalar ta'limining hamda ijtimoiy, emotsional rivojlanishining o'ziga xos xususiyatlari, yosh bolaning rivojlanishiga oid nazariy qarashlar, nutqi va savodxonligining o'ziga xususiyatlari, bu yoshdagi bola uchun muhitga qo'yiladigan talablar, bu yoshdagi bolalarning o'rganishini baholashning o'ziga xos xususiyatlari haqida yetarlicha bilimga ega bo'lishi kerak. Vazirlik bu narsalarni hali maktab dasturini o'zlashtirib bo'lmagan o'quvchiga qanday o'rgatmoqchi? Yoki tarbiyachi yordamchisi bu narsalarni bilishi shart emasmi?

Yana bir narsa. Pedagogik sinflarni bitiradigan o'quvchilarga Milliy malakalar ramkasining 2-darajasidagi sertifikat berilishi belgilanmoqda. Oldinroq yozganimdek, milliy makalar ramkasida 2-daraja - bu standart va oddiy vazifalarni oddiy qoidalar va instrumentlar orqali bajarish, yo‘riqnoma bo‘yicha harakat qilish usulini tanlay olish ko'nikmasini talab qiladigan kasblar degani. Bolaning rivojlanishida o'ta muhim o'rin tutadigan davrida ta'lim va tarbiya berishga mas'ul kasblardan biri "standart va oddiy vazifalarni oddiy qoidalar va instrumentlar orqali bajarish" tavsifiga mos keladi deb o'ylaysizmi?

Ta'lim bo'yicha har xil takliflar tayyorlanayotganda, ular asosida qarorlar qabul qilinayotganda bu taklif va qarorlarning hech bo'lmaganda sog'lom mantiqqa mosligini kimdir tahlil qiladimi?

Shu qarorni ishlab chiqqanlar OTMlardagi xarob ahvolga kelib qolgan pedagogik taʼlimni zoʻr deb oʻylashsa kerak.

Elmurod Haqnazarovning Ahad Qayumga qarata aytgan gapi esimga keldi.

@birgap

Prezident maktablariga kirish imtihonlari uchun spetsifikatsiyalar eʼlon qilinibdi.

Ma, ollaring, teshib chiqsin. Senlarga shu ham boʻlaveradi, qabilida ekan.

Normal spetsifikatsiya bunday boʻlmaydi.

https://portal.piima.uz/page/qabul-imtihon-materiallari-spesifikatsiyasi

@birgap

Men doim gapiradigan, baʼzilarga biroz yoqimsiz, ammo taʼlim sifati uchun anchayin muhim mavzuda ekan maqola.

Oʻqinglar, koʻringlar, xulosa qilinglar.

https://kun.uz/news/2024/04/30/ozbekistondagi-maktablarning-87-foizida-kanalizatsiya-yoq-delivery-unit

@birgap

Kecha 8-sinf oʻquvchisi yozgan qisqa hikoyalardan biri:

U oʻgʻlining xonasiga kirdi. Oʻgʻli yigʻlab oʻtiribdi, koʻzi toʻla yosh. U negadir roʻparadagi koʻzguda oʻzini koʻrmadi.

Muallif: Davronbekov Behzod

@birgap

Bolalarga juda kichkinaligidan chet tillarini o‘rgatish shart emas deb hisoblayman. Chunki chet tili shunday narsaki, uni ona tilingday bilishni sedan hech kim talab qilmaydi. Muloqot va ilmiy ish yozish darajasidagi tilni esa uzog‘i bilan 4 yilda o‘rgansa bo‘ladi.

Yosh bolalarni til kurslariga yetaklashdan ko‘ra ularga atrofni tushunishni, narsalarning mohiyatini anglashni o‘rgatish, jismoniy mashg‘ulotlar bilan band qilish yaxshiroq samara beradi. Etika qoidalarini o‘rgating. Bozor qilishni, kiyim tanlashni o‘rgating. Boshqalar bilan muloqot odobini o‘rgating. Rus tilini ham, ingliz tilini ham 9-sinf bo‘lgandan boshlasa, 11-sinfgacha bemalol kerakli darajada o‘rgana oladi.

Tilni, dunyoni endi anglayotgan odamchaning miyasini umuman boshqa bir til, boshqa bir struktura bilan portlatish kerak emas.

Gap ko‘p-u ko‘mir oz deganday, bu mavzuda aytarlarim bisyor, ammo yozishga imkon kam. Vaqti-vaqti bilan sekin-sekin yozib borarman bu haqida ham.

@birgap

O‘tgan yili o‘quvchilarim bir ideografik lug‘at ustida ish boshlab qo‘ygan edik. G‘oya shunday – biz turli mavzularni tanlaymiz (tana a’zolari, tabiat hodisalari, uy hayvonlari kabi). Tanlangan mavzuga oid so‘zlarni ajratamiz (tana a’zolari tanlangan bo‘lsa: qosh, ko‘z, soch, burun, oyoq kabi). Keyin har bir so‘z bilan birgalikda ishlatsa bo‘ladigan so‘zlarni ajratamiz (soch so‘zi bilan: hilpiramoq, uchmoq, kaltalamoq, sariq, qora, jingalak kabi). Keyin shu so‘zlar qatnashgan iboralar, shu so‘zga oid iboralar ham qo‘shiladi.

Tasavvur qilyapsizmi? Bunday lug‘at tilning boyligini ko‘rsatishda qanday qimmatli bo‘lar edi-ya.

Sun’iy idrokka ham, tarjima dasturlariga ham tilni o‘rgatishimiz yanada osonlasharmidiii.

Kimnidir shu g‘oya qiziqtirsa, olsin, ilmiy ish qilsa ham bo‘ladi, lug‘at tayyorlasa ham bo‘ladi. Xususiy nashriyotlar bolalar uchun rasmli qilib chiqarsayam bo‘ladi.

@birgap

U "Mostbet"dan yutgan pullarini bolalar xayriya fondiga oʻtkazdi.

Muallif: Abdurahmon Abdumoʻminov ("Sodiq School", 8-"B" sinf oʻquvchisi)

@birgap

Aniq va tabiiy fanlarni o‘qitishda loyihaga texnologiyasidan foydalanish bo‘yicha bir qator ilmiy tadqiqotlar olib borilgan. Lingvodidaktika yo‘nalishida esa, asosan, ma’lum bir tilni xorijiy til sifatida o‘qitishda loyihaga asoslangan ta’limning ahamiyati bo‘yicha ilmiy ishlar e’lon qilingan.

Ona tili ta’limida esa loyihaga asoslangan topshiriqlarga murojaat qilinayotganiga ko‘p bo‘lgani yo‘q, xususan, ona tilini o‘qitishda loyiha texnologiyasidan foydalanishning samaradorligini aniqlash, ona tili darslarida foydalanish mumkin bo‘lgan loyihaviy topshiriqlar, ularga qo‘yiladigan talablar, o‘quvchilarning o‘quv-loyihaviy faoliyatini to‘g‘ri tashkillashtirish kabi masalalarning nazariy-metodik taraflari hali to‘liq o‘rganilmagan. Tadqiqot davomida shu kabi masalalarga ilmiy jihatdan yechim topish, metodik tavsiyalar ishlab chiqishdan avval o‘qituvchilarning fikrlarini o’rganishni muhim deb topdik.

Quyidagi so‘rovnoma ayni damda maktabda faoliyat yurituvchi ona tili o‘qituvchilariga mo‘ljallangan bo‘lib, ona tili ta’limida loyiha texnologiyasidan foydalanish bo’yicha mavjud holatni va o‘qituvchilarning fikr-mulohazalarini tahlil qilishga qaratilgan.

Soʻrovnoma manzili:
https://docs.google.com/forms/d/e/1FAIpQLScOKqnWkEzRBXKYm1VhH3dem9H-9850J9CpTbYBf2BYoaCuzw/viewform?usp=sf_link

P.S. hurmatli ustozlar, shu soʻrovnomani xolis toʻldirib, bir ilmiy tadqiqotchining ishiga yordam bersangiz, ilmiy tadqiqotning real chiqishiga koʻmaklashsangiz.

@birgap