Ushbu post izohlariga 5- va 6-sinflar oʻqishi shart boʻlgan asarlardan (hikoya, qissa, roman) yozib ketsangiz xursand boʻlaman.

@birgap

Qaysi birini qilgansiz?

Men hammasini qilganman.

@birgap

Bir odam intervyusida moshinalar juda ham qimmat boʻlishi kerak, haddan tashqari qimmat boʻlishi kerakki, hech kim ololmasin. Koʻchalar odamlar bilan toʻladi oʻshanda degandi. Kulgim kelgandi. Ammo oxirgi voqealar oʻsha odam haq ekanini isbotlamoqda. Yarim yil boʻlar boʻlmasdan yoʻllarda 70 ga yaqin bola oʻldi.

Tizim qayoqqa qarayapti, nega jarim ballari haliyam amalda emas? Nega avtoterroristlar odam oʻldirib 3–4 yil bilan qutulib ketyapti?

#Qachongacha

@birgap

Oliy taʼlimni isloh qilish uchun kelgan (hozircha bu borada aytarli qadam tashlay olmagan) Qo‘ng‘irotboy Sharipov unga qabr qazigan qaror sababini ochiqlabdi.

Ha, mana bu xabarda aytilishicha, Oliy ta’lim, fan va innovatsiyalar vaziri xususiy universitetlar uchun litsenziya berish toʻxtatilganini maʼlum qilgan (oʻzi bir yil boʻlgan toʻxtatilganiga, sababini aytibdi bu kishim). Sabab juda kulguli, masxarabozona va qonunga xilof – Oʻzbekistonda xususiy oliy taʼlim muassasalari yetarlicha.

Vazir xususiy OTMlar koʻpligi sifatsiz yoki ishsiz kadrlarni koʻpaytirishiga ham ishora qilibdi.

Toʻgʻri, xususiy universitetlarda sifat juda yuqori emas, lekin ular endi ochildi, endi ishlayapti. Kadrlar bozori oʻzi saralab qoʻyadi. Ungacha esa yoʻl berish kerak, imkon berish kerak. Davlast OTMlari ham goʻr emas juda. Sifatsiz kadrlarni pachkalab chiqarishda ular xususiylardan oldinroqda ham boʻlsa kerak. Xususiy OTMlarni yaxshi oʻqituvchilar pul va erkinlik vaʼdasi bilan oʻzlariga chorlashdi. Ana shu vaziyat davlat OTMlarini yanada qiynab qoʻydi. Bir necha yilda ana shu kadrlar evaziga xususiy OTMlar ham oʻzini tiklab olishiga ishonaman.

Ha, oliy taʼlimni xalq taʼlimiga oʻxshab qabr yonigacha olib kelishyapti. Endi ikkisini bir qilib kimdir koʻmvorishi qoldi xolos.

@birgap

Davlat qachon tushunarkin-a universitetning ishi taʼlim berish, bitiruvchilarini ish bilan taʼminlashiga koʻra uni yopish haqida qaror chiqarish ahmoqlik deb oʻylayman.

Ikkinchi sabab ham ularni yopishga asos boʻlmasligi kerak. Aksincha, ularga normal kadr olib borishga harakat qilmoq lozim.

@birgap

“Mutolaa” ilovasi ishga tushganidan deyarli hammaning xabari boʻlsa kerak. Bugun qanday yangi kitoblar qoʻshilibdi deb kirib koʻrdim. Dahshat! Koʻzni quvnatadi-ya bular. Xotinchik aytgandek, oʻzbeklar boshiga ham bitta shunaqa yaxshi narsa bitib qoldi.

Foydalaninglar, maza qilinglar!

“Mutolaa” ilovasidagi yangilanishlar haqida ushbu blogda oʻqisangiz boʻladi.

Audiopleyerdagi muammolarni ham bartaraf etishibdi.

@birgap

Nega faqat men maza qilib kulishim kerak?

@birgap

Mana bu xabarni oʻqidim-u, ichim kuyib ketdi.

Aytilishicha, Oʻzbekiston Xalqaro biologiya olimpiadasi (IBO)dan chetlashtirilibdi.

Odatda chetlashtirish va roʻyxatdan butkul oʻchirib tashlash uchun oʻsha davlat qatnashchilari ayyorlik, yolgʻon ishlatgan firibgarlik qilgan boʻlishi kerak. Oʻzbekistonliklar ham shunday qilgan koʻrinadi.

Jazo kamida 2 yil qatnashmaslik, juda qoʻpollashsa, butkul qatnasha olmaslik.

Haa, maktabda koʻchirmakashlik, ayyorlik ishlatishga koʻz yumish, unga sherik boʻlish oʻz mevasini berishi tayin edi. Bu meva achchiq boʻlishi ham aniq edi. Bir ahmoqni deb endi kelajakdagilar ham qatnasha olmasligi mumkin.

P.S. chetlashtirish sababi 100% aniq emas.

@birgap

Sodiq School maktabimiz “Zakovat” oʻyinini juda yaxshi koʻradi. 2 yildan beri maktabning muntazam turniri bor. Maktab jamoalari turli darajadagi liga va musobaqalarda muvaffaqiyatli qatnashib keladi. Maktab zakovat jamoasining asosiy oʻyinchilar “Taʼlimda zakovat va zakovatda taʼlim” mavzusida suhbat qurishibdi. Tavsiya qilaman.

https://youtu.be/AJxXHq0UFHY?si=v9giA70y03KIlNBU

@birgap

Biz hamon prezident va podshoh / sultonni bir-biridan farqlamaymiz. Ikkisi bir narsa deb oʻylaymiz. Koʻp qiliqlarimiz shuning natijasi boʻlsa kerak.

@birgap

Ana endi izoh bersam bo‘ladi, boisi Maktabgacha va maktab ta'limi vazirligining o‘zi holat haqida yozib chiqdi.

O‘zbekiston nega IBOdan chetlatildi? Chunki biznikilar g‘irromlik qilishdi, shu sabab haydaldik. Voqea qanday bo‘lganini tushuntiraman. Har bir davlatdan to‘rt ishtirokchi boradi. O‘quvchilar bilan terma jamoa ustozlari ham birga borishadi. Bu gal bizdan besh ustoz ketgandi.

IBOda savollar ingliz tilida tuziladi. Ertaga nazariy imtihon degan kuni o‘quvchilarning telefon va kompyuterlari olib qo‘yiladi, internetdan batamom ixotalanadi. Bu vaqtda terma jamoa ustozlari tuni bilan ertaga tushadigan nazariy savollarni o‘z tillariga tarjima qilib chiqishadi. Tarjima tugagach materiallar tashkilotchilarga topshiriladi. To imtihon o‘tmaguncha ustozlar o‘z o‘quvchilari bilan ko‘rishtirilmaydi, gaplashtirilmaydi.

Bizdan borgan ustozlar tarjima qilinayotgan matnga o‘quvchi uchun to‘g‘ri javobni topishiga yordam beradigan savolda yo‘q bo‘lgan belgi qo‘yishgan. Bu holat bilishim bo‘yicha bizdan borgan to‘rt o‘quvchidan biri uchun maxsus qilingan. Imtihon o‘tgan. Shundan so‘ng hakamlarda natijalar shubha uyg‘otgan. Savollar kitobini olib tekshirib ko‘rishganda to‘g‘ri javobga ortiqcha belgi qo‘yilganini payqashgan. Hamma ishkal shu yerdan boshlangan. Hakamlar bizni ustozlarga g‘irromlik qilishganini isbotlab berishgan, biznikilarning tan olishdan boshqa choralari qolmagan 🤦‍♂️.

Shu sabab biz IBO2024 dan sharmandalarcha chetlashtirildik. IBO qo‘mitasi bizning ustozlar bundan avvalgi yillarda ham g‘irromlik qilgan bo‘lishi mumkinligini iddao qilmoqda. Bu ham tekshirilishini va agar shunday hol aniqlansa berilgan medallar bekor qilinishini aytishgan va O‘zbekistonni IBOga a'zo 80 davlat ro‘yxatidan chiqarib yuborishgan.

Mana hammasi qanday bo‘lgan edi. To‘g‘risi bu juda sharmandali hol, shunday emasmi? Bir o‘quvchiga yordam beraman deb butun boshli davlatni sharmanda qilishdi.

Bir aqlli inson aytganidek, "Bitta ahmoq quduqqa tosh tashlaydi, endi uni qirqta aqlli ham chiqara olmaydi".

@hujayrauz

IMOda 5 ta medal!

Yaqinda tugagan Xalqaro Matematika Olimpiada(IMO)sida oʻzbekistonlik yigit va qizlar 5 ta medal – 2 ta kumush, 3 ta bronzaga egalik qildi. Umumiy reytingda 43-oʻrindamiz.

Qutlayman! Bundanda katta zafarlar tilayman!


Kumush medal sohiblari:
Toʻlqin Jaylovov
Elbek Zohidjonov

Bronza medal sohiblari:
Rasulbek Gʻafforov
Ozodbek Axtamov
Madina Suyunova

@birgap

Oʻzbekiston 2030-yilga borib PISAda kuchli 30 talikka kirmoqchi. Ochigʻi men bu marrani zabt eta olishimizga ishonmayman. Real qarashimiz, vaziyatni real baholashimiz kerak.

Masalan, bor yoʻgʻi 5 yildan keyin hozir turgan joyidan kamida 50 oʻrin yuqorilamoqchi boʻlgan Oʻzbekistonning yagona taʼlim standartlari va oʻquv dasturi mavjud emas. Ha, toʻgʻri oʻqidingiz. Hozir oʻquvchilar quyidagi dasturlar asosida taʼlim olmoqda:

1–4-sinflar: qandaydir nomaʼlum, hech qayerda eʼlon qilinmagan, borligi ham shubha ostidagi fincha niqob kiygan dastur;

5-sinf: 2017-yilda qabul qilingan Davlat taʼlim standarti (DTS) asosidagi dastur;

6–7-sinf: 2021-yilda qabul qilingan Milliy oʻquv dasturi asosidagi dastur;

8–9-sinf: 2017-yilda qabul qilingan Davlat taʼlim standarti (DTS) asosidagi dastur;

10-sinf: 2021-yilda qabul qilingan Milliy oʻquv dasturi asosidagi dastur;

11-sinf: 2017-yilda qabul qilingan Davlat taʼlim standarti (DTS) asosidagi dastur.

Xoʻsh, hurmatli taʼlim vazirligi masʼullari, ayting-chi, mana shunday “kasha” holatda qanday qilib 5 yildan keyin 50 oʻrin tepaga chiqmoqchisizlar? Oʻzi yagona oʻquv dasturi hamda taʼlim standartlarini qabul qilish niyatlaring bormi? Bu uchun nimadir harakat qilyapsizlarmi? Bir yaxshi yurib turgan Milliy oʻquv dasturini dasturxondan surib tashladinglar, ura-ura qilib koʻtarib kelgan fincha dastur-u darsliklaringizni koʻrdik. Maza qildik! Endi bu yogʻiga bizni nimalar kutyapti? Bir yarim oy oʻtar-oʻtmas yangi oʻquv yili boshlanadi axir. Oʻtgan yili shu paytlarda ham dastur eʼlon qilasizlarmi deb yurgan edim. Bir yil oʻtdiki, vaziyat oʻzgarmadi.

P.S. bu yil IBOda qoʻllagan firibimizni ishga solsakkina 2030-yilda 30 talikka kira olsak kerak (tagʻin yaxshi gʻoya, deb amalga oshirish chora tadbirlarini ishlab chiqvormanglar).

@birgap

Hozirgi gaplarim uchun meni toshboʻron qilishlaring aniq, lekin ichimdagi gaplarni aytishim kerak. Koʻpchilikning xato oʻylayotgani shu gaplarni yozishga undadi.

Gap elektr energiyasi uchun oʻrnatilgan cheklov haqida

Aslida bu cheklov emas, bu arzon narxda berilayotgan elektr energiyasi hajmi. Buni chegirma desak toʻgʻriroq boʻladi (Koʻpchilik shuni tushunmasdan limitni BEKOR qilinglar deyapti, agar limit bekor qilinsa har bir ishlatilgan kilovatt uchun 900 soʻmdan toʻlashga toʻgʻri keladi).

Yaʼni 1 kilovatt elektr energiyani uyimizga yetib kelish narxi oʻrtacha 900 soʻm atrofida boʻladi. Agar oʻsha 200 kilovattlik chegirma boʻlmasa ishlatgan har bir kilovattimiz uchun 900 soʻmdan toʻlashimiz kerak. Shu paytgacha davlat bizga 225 soʻmdan qilib berdi. Mana shu chegirma sabab elektr energiyasini ishlab chiqarish va uzatish tarmoqlari chirib ketdi. Yangilash, modernizatsiya qilish uchun pul yetmadi. Hamma pul chegirmani qoplash uchun sarflanaverdi (toʻgʻri, sabab faqat shu emas, lekin katta quvvatni yeb qoʻygani aniq). Endi davlatning aqli kirdi. Har kim oʻz aravasini tortsin, biz shu paytgacha yordam berdik, boshqa kuchimiz yoʻq dedi.

Endi ishlatgan hamma kilovattingizga 225 soʻm toʻlamaysiz, 900 soʻmdan toʻlashingiz kerak. Davlat chegirma qilib, 200 kilovatt uchun 450 soʻmdan toʻlasangiz boʻladi, undan ortigʻiga 900 soʻmdan toʻlaysiz deyapti.

Kelinglar, raqamlarda koʻrsatib beraman:
Bizning uyimizda gaz yoʻq, hamma narsa elektrda ishlaydi. Xonadonda 4 kishi yashaymiz, 2 ta mini konditsioner, elektr plita, elektr choynak, sovitkich, kir yuvadigan mashina, dazmol, noutbuklar va telefonlar bor. Shular bilan iyun oyida 203 kilovatt sarf qilibmiz.

200 kilovattni 225 soʻmdan toʻladik (sababi uyimiz gazlashmagan, gazlashgan boʻlganda 450 soʻmdan toʻlar edik). 3 kilovattni 450 soʻmdan toʻladik. Jami 46 350 soʻm boʻldi.

Endi chegirmani yoʻq deb hisoblaymiz-da, hammasini 900 soʻmdan (yaʼni tannarxda) hisoblab koʻramiz – 182 700 soʻm.

Demak, davlat bizga 203 kilovatt uchun 136 350 soʻm chegirma qilib beryapti (oʻrnimizga shu pulni oʻzi toʻlayapti). Biz yashaydigan koʻpqavatli uyda 135 ta xonadon bor, hammasiga shunchadan yordam qilinsa 18 407 250 soʻm boʻlyapti. Birgina koʻpqavatli uyga shuncha boʻlsa, qolganini oʻzingiz hisoblab olarsiz.

Aslini olganda, chegirma pulini ham oʻzimiz soliqlarimizdan toʻlayapmiz, lekin bu hammaga teng taqsimlanmayotgan edi-da.

Masalan, Karim bir oyda 1000 kilovatt tok ishlatadi (uyida konditsionerlari, basseyn-u saunalari bor). Oddiyroq yashaydigan Salim esa bir oyda 300 kilovattgina ishlata oladi. Ikkisi ham daromadining 12 foizini soliq sifatida toʻlaydi. Ammo Karimning elektr ehtiyoji uchun davlat 675 000 sarflaydi, Salimning ehtiyoji uchun esa 202 500 soʻm. Narxlarning bunday oʻzgarishi mana shu adolatsizlikni ham biroz oʻrniga qoʻyadi.

Xullas, men elektr energiyaning bunday islohotini qoʻllab-quvvatlayman, endi tizim qoʻlida pul paydo boʻla boshlagach uzilishlarni ham kamaytiradi, tizimni yangilaydi degan umiddaman.

Narxlar oshgandan keyin tok sarfimizni yanada nazorat qilishimiz kerak. Avvalgidek bemalolchilik emas endi. Masalan, bir kishi qahva ichmoqchi boʻlsa, choynakni toʻldirib suv qaynatish shart emas, bir stakanga yetarli suv quyib qaynatsayam boʻladi va h.k.

@birgap

Sizlarga kichik test tayyorladim. Oʻzingizni sinab koʻring.

Natijalar bilan maqtanish yoki "maxtanish" esdan chiqmasin.

View score tugmasini bosib natijangizni va toʻgʻri javoblarni koʻrib olsangiz boʻladi.

Testni boshlash havolasi:
https://forms.gle/6VbpLqGK7P1y1MqY9

@birgap