Бошқарма ва техникум ўртасида ҳамкорлик меморандуми имзоланди

Бугун Бухоро вилояти соғлиқни сақлаш бошқармаси бошлиғи Элёр Олтиев вилоятда фаолият юритаётган Бухоро инновацион тиббиёт техникуми таъсисчиси Фаррух Умуров билан учрашиб, ўзаро мулоқот ўтказди.

Учрашув давомида Бухоро вилоятида тиббий таълим тизимини янада такомиллаштириш, соҳа учун малакали ва рақобатбардош кадрлар тайёрлаш масалалари муҳокама қилинди. Мазкур мақсадлар доирасида томонлар ўртасида икки томонлама ҳамкорлик меморандуми имзоланди.

Қайд этилишича, меморандум мавжуд ҳамкорлик алоқаларини расмийлаштириш ва фаоллаштириш, тиббий таълим сифатини ошириш, илғор тажрибаларни амалиётга жорий этиш, шунингдек, замонавий билим ва кўникмаларга эга мутахассислар тайёрлашга қаратилган.

Ҳужжатга мувофиқ, томонлар талабаларнинг тиббиёт соҳасидаги билим ва амалий кўникмаларини ошириш, тиббиёт муассасаларида ўқув-семинарлар ташкил этиш, халқаро стандартлар асосида таълим дастурларини ишлаб чиқиш, клиник базалардан самарали фойдаланиш, илмий-педагогик салоҳиятни мустаҳкамлаш ҳамда ўқув адабиётлари ва илмий материаллар билан ўзаро алмашинувни йўлга қўйиш бўйича ҳамкорлик қилади.

Шунингдек, меморандум доирасида қўшма конференциялар, илмий-амалий анжуманлар, маданий-маърифий тадбирлар ва турли кўрик-танловларни ўтказиш ҳам назарда тутилган.

Маълум қилинишича, ҳамкорлик доирасида амалга ошириладиган ҳар бир тадбир ва лойиҳа алоҳида келишув асосида ташкил этилади ҳамда томонлардан масъул ходимлар бириктирилади.

Ушбу меморандум тиббиёт соҳаси учун замонавий билимларга эга, малакали кадрлар тайёрлаш ҳамда аҳолига кўрсатилаётган тиббий хизматлар сифатини ошириш йўлида муҳим қадам сифатида баҳоланмоқда.

📱Бухоро тиббиёти