BMB HOLDING ҚАШҒАРДА ХИТОЙ ТОМOНИ БИЛАН ЯНГИ ҲАМКОРЛИК ЛОЙИҲАЛАРИНИ МУҲОКАМА ҚИЛДИ
 
Хитойнинг Қашғар шаҳрида Ўзбекистон ва Хитой ўртасидаги савдо-иқтисодий, инвестицион ва технологик ҳамкорликни янада кенгайтиришга қаратилган бизнес-форум доирасида BMB Holding ташқи иқтисодий алоқалар департаменти директори Бобир Яхяев Хитойнинг турли компания ва ташкилотлари вакиллари билан ўзаро манфаатли ва истиқболли ҳамкорлик массалалари юзасидан бир қатор музокаралар ўтказди.
 
Мазкур тадбир давомида Ўзбекистонда хорижий инвесторлар учун яратилаётган имкониятлар ҳамда BMB Holdingнинг инвестиция ва экспорт салоҳияти, чуқур қайта ишлаш йўналишларида амалга оширилган лойиҳалар туғрисида ўтказилган тақдимот бир қатор Хитойлик компаниялар орасида катта қизиқиш уйғотди ва улар томонидан ҳамкорлик ўрнатиш юзасидан ташаббуслар билдирилди.
 
Жумладан, Guangdong Yuanchuang Industrial Development Co., Ltd. директори Винсент Хуань, Гуандун халқаро илмий-техник ҳамкорлик уюшмаси халқаро ҳамкорлик лойиҳалари раҳбари Сюй Хуаньюй ҳамда Шинжон илм-фан ва маданий алоқалар ассоциацияси ташқи алоқалар бўлими бошлиғи Ян Цзиньхуа (Yang Jinhua) билан ўтказилган музокараларда икки томонлама инвестиция ва экспорт қўшма лойиҳаларни амалга ошириш, илмий-технологик ва инновацион ҳамкорликни кенгайтириш, юқори технологияли компаниялар билан алоқаларни йўлга қўйиш, шунингдек, Ўзбекистон ва Шинжон ўртасидаги савдо-иқтисодий ҳамда маданий-гуманитар ҳамкорликни янги босқичга олиб чиқиш масалалари муҳокама қилинди.
 
Шунингдек, бизнес-форум доирасида ташкил қилинган Қашғар шаҳрига ташриф доирасида сунъий интеллект (AI) технологиялари интеграция қилинган техникалар ва IT-компаниялар учун яратилган Марказ билан танишилди.
Учрашувларнинг амалий натижаларидан бири сифатида Ўзбекистон маҳсулотлари учун ажратиладиган махсус ҳудудда BMB Holding маҳсулотларига алоҳида стенд ташкил этиш, шунингдек, онлайн савдо платформалари орқали Ўзбекистон маҳсулотларини Хитой бозорига чиқариш бўйича ҳамкорликни йўлга қўйиш масалалари бўйича келишувларга эришилди.
 
Умуман олганда, Қашғар шаҳридаги музокаралар BMB Holdingнинг Хитой билан савдо-иқтисодий, инвестицион ва технологик ҳамкорликни янги босқичга олиб чиқиш, янги шериклар ва лойиҳаларни жалб қилиш ҳамда миллий маҳсулотларимизни Хитой бозорига экспортини кенгайтиришга қаратилган амалий қадам бўлди.

Telegram l Website l Facebook l Instagram l YouTube l LinkedIn

Қашғарда BMB Holding ва Хитой компаниялари ўртасида музокаралар ўтказилди

Жорий йилнинг 15 август куни BMB Holding ташқи иқтисодий алоқалар департаменти директори Бобир Яхяев Хитойнинг Қашғар шаҳрида ўтказилган 16-"Қашғар — Марказий ва Жанубий Осиё товар ярмаркаси"да иштирок этди.

Ташриф доирасида Хитойнинг қатор компаниялари раҳбарлари билан учрашувлар ўтказилиб, саноат, қурилиш материаллари, электротехника ва иссиқхона технологиялари бўйича ҳамкорлик масалалари муҳокама қилинди. Шунингдек, бир қатор завод ва фабрикаларнинг ишлаб чиқариш жараёнлари билан танишилди.

Учрашувларда Хитой томонига BMB Holdingнинг асосий фаолият йўналишлари, Ўзбекистонда хорижий инвесторлар учун яратилаётган имкониятлар ва холдингнинг халқаро тажрибаси ҳақида маълумот берилди.

Шунингдек, BMB Holding маҳсулотлари 40 дан ортиқ мамлакатга, жумладан Хитойга ҳам экспорт қилинаётгани, сўнгги йилларда эса 1000 дан ортиқ хорижий компания холдинг хизматларидан фойдалангани қайд этилди.

Мулоқот давомида Changhui Power Kahui Cable, Xinjiang Xiaode Electrical Technology Co., Ltd. ҳамда Baoding Xinhai Plastic Sheet Co., Ltd. компаниялари билан ҳамкорлик истиқболлари кўриб чиқилди.

Музокаралар якунига кўра, Ўзбекистонда қўшма инвестициявий лойиҳаларни амалга ошириш масалалари юзасидан келишувларга эришилди.

Telegram l Website l Facebook l Instagram l YouTube l LinkedIn

ЎЗБЕКИСТОН-ҚАШҚАР ИНВЕСТИЦИЯ ВА САВДО МАРКАЗИ ТАШКИЛ ЭТИЛДИ
 
Давлат раҳбарларининг сиёсий иродаси ва юксак даражадаги ўзаро ишончи туфайли Ўзбекистон-Хитой муносабатлари ҳар томонлама стратегик шерикликнинг янги босқичига кўтарилиб, тобора аниқ иқтисодий лойиҳалар ва амалий ташаббуслар билан бойиб бормоқда. 2025 йил якунлари бўйича икки мамлакат ўртасидаги ўзаро товар айланмаси 15 миллиард доллардан ошгани, Хитой капитали иштирокидаги корхоналар сони эса уч баробарга кўпайгани мазкур ҳамкорликнинг жадал суръатларда ривожланаётганидан далолат беради.
 
Ана шу изчил жараённинг мантиқий давоми сифатида Хитойнинг Қашқар шаҳрига амалий ташриф доирасида Ўзбекистон-Қашқар инвестиция ва савдо марказини ташкил этиш бўйича меморандум имзоланди.
 
Мазкур тадбирда BMB HOLDING Ташқи иқтисодий алоқалар департаменти директори Бобир Яхяев иштирок этиб, Холдингнинг асосий фаолият йўналишлари, инвестициявий ва экспорт салоҳияти, консалтинг хизматлари, халқаро тажрибаси ҳамда амалга ошираётган истиқболли лойиҳалари ҳақида тақдимот ўтказди.
 
Янги марказ Ўзбекистон ва Қашқар ўртасида инвестициявий ва савдо-иқтисодий алоқаларни ривожлантириш, экспорт-импорт ҳажмини кенгайтириш, тадбиркорлар ўртасида тўғридан-тўғри бизнес мулоқотларини йўлга қўйиш ҳамда қўшма сармоявий лойиҳаларни амалга оширишга хизмат қилади.
 
Мазкур ҳудуднинг Хитой учун Марказий Осиёга чиқишидаги муҳим савдо ва логистика нуқталаридан бири сифатидаги мавқеи мазкур ташаббуснинг стратегик аҳамиятини янада оширади. Айниқса, Хитой-Қирғизистон-Ўзбекистон темир йўли қурилишининг бошлангани минтақадаги транзит ва логистика имкониятларини янада кенгайтириш учун янги истиқболларни очмоқда.
 
Ташриф доирасида “Юэбин сифатли интеллектуал товарлар маркази”да BMB HOLDING учун алоҳида стенд ташкил этилиши бўйича келишувга эришилди. Унда Холдинг маҳсулотлари, инвестиция лойиҳалари консалтинг хизматлари ва экспорт салоҳияти Хитой тадбиркорлари ва инвесторларига тўғридан-тўғри тақдим этилади.
 
Шу нуқтаи назардан, Қашқарда ташкил этилаётган инвестиция ва савдо маркази Ўзбекистон бизнесининг Хитой бозорига чиқиши, янги экспорт йўналишларини шакллантириши, инвестиция ва замонавий технологияларни жалб этиши ҳамда қўшма лойиҳаларни илгари суриши учун доимий B2B платформа вазифасини бажаради.
 
Қашқарда ташкил этилаётган янги платформа Ўзбекистон-Хитой стратегик шериклигининг иқтисодий мазмунини янада бойитиб, сиёсий ишончни амалий бизнес натижаларига айлантириш учун янги имкониятлар яратади. Бу ташаббус BMB HOLDINGнинг Хитой бозоридаги иштирокини кенгайтириш билан бир қаторда, мамлакатимиз корхоналари учун янги экспорт йўналишлари, инвестициявий шериклик ва технологик ҳамкорлик учун янги уфқларни очиши кутилмоқда.
 
Шу билан Холдинг вакилларининг Қашқар шаҳрига амалий ташрифи ўз ниҳоясига етиб, делегация Тошкент шаҳрига йўл олди.

Telegram l Website l Facebook l Instagram l YouTube l LinkedIn

ЎЗБЕКИСТОН РЕСПУБЛИКАСИ ПРЕЗИДЕНТИНИНГ ТАДБИРКОРЛАР БИЛАН VI ОЧИҚ МУЛОҚОТИ БЎЛИБ ЎТДИ
 
Жорий йилнинг 18 август куни Хива шаҳрида Ўзбекистон Республикаси Президенти Шавкат Мирзиёевнинг тадбиркорлар билан VI очиқ мулоқоти бўлиб ўтди. Мазкур учрашув мамлакатимизда тадбиркорлик ва хусусий секторни янада ривожлантириш, бизнес учун барқарор ўсиш шароитларини шакллантириш, ҳудудларда янги иқтисодий имкониятларни кенгайтириш ҳамда давлат ва ишбилармон доиралар ўртасидаги бевосита мулоқотни янги босқичга олиб чиқишга қаратилган муҳим тадбир бўлди.
 
Бу йилги мулоқотда 500 нафарга яқин тадбиркор бевосита иштирок этган бўлса, илк бор туманларда ташкил этилган махсус студиялар орқали яна 25 мингга яқин ишбилармонлар, жумладан, BMB HOLDING таркибига кирувчи бир қатор корхоналар раҳбарлари ҳам қатнашди.
 
Давлатимиз раҳбари мамлакатимиз иқтисодий қудратини мустаҳкамлашга муносиб ҳисса қўшаётган 1 миллион 200 минглик бизнес ҳамжамиятини Тадбиркорлар куни билан табриклади. Шунингдек, улар билан очиқ мулоқот ўтказиш анъанаси бошланганидан буён бизнесга тўсиқ бўлган минглаб масалаларга ечим топилгани, мазкур йўналишда 84 та қонун, 861 та фармон ва қарор қабул қилингани қайд этилди.
 
Учрашувда тадбиркорликни барқарор ривожлантириш, ҳудудларда бизнес имкониятларини кенгайтириш ва янги инвестициявий лойиҳаларни амалга ошириш масалалари муҳокама қилинди. Шунингдек, жорий йилнинг биринчи ярим йиллигида иқтисодий ўсиш 8,5 фоизни ташкил этгани таъкидланди. 

Президент, шунингдек, хорижий бозорларга чиққан тадбиркорларни қўллаб-қувватлаш, экспорт салоҳиятини ошириш ва миллий брендларни ташқи бозорларга олиб чиқиш масалаларини муҳим вазифалар қаторида белгилади. Бу ёндашув миллий ишлаб чиқарувчиларнинг халқаро бозорлардаги иштирокини кенгайтириш, экспорт географиясини бойитиш ва рақобатбардош маҳсулотларни янги истеъмолчиларга етказиш учун муҳим аҳамият касб этади.
 
Мулоқотда корхоналарнинг капитал бозорига чиқиши ва хорижий инвестицияларни жалб этиш имкониятларини кенгайтиришга ҳам алоҳида эътибор қаратилди. Жорий йил илк бор Миллий инвестиция жамғармасининг 30 фоиз улуши Тошкент ва Лондон фонд биржаларига чиқарилгани капитал бозорини ривожлантиришда муҳим қадам сифатида қайд этилди. Шу билан бирга, йирик маҳаллий корхоналарни IPOга тайёрлаш ва уларнинг халқаро бозорларга чиқишини қўллаб-қувватлаш бўйича янги механизмлар жорий этилиши таъкидланди.
 
Кун тартибида туризм соҳасини ривожлантиришга ҳам алоҳида ўрин берилди. Ҳудудларнинг сайёҳлик салоҳиятидан самарали фойдаланиш, туризм билан боғлиқ бизнес фаоллигини ошириш ва мазкур йўналишда янги имкониятларни ишга солиш масалаларига тўхталиб ўтилди.
 
Замонавий бошқарув ёндашувлари ва сунъий интеллект технологияларини кенг жорий этиш ҳам мулоқотнинг муҳим йўналишларидан бири бўлди. Давлат раҳбари “сунъий интеллект - бошқарув самарадорлиги - янги инвестициялар” ўзаро боғлиқ экотизимини шакллантириш зарурлигини таъкидлаб, замонавий технологиялардан бизнес жараёнларида самарали фойдаланиш масаласига эътибор қаратди.
 
Хива шаҳрида ўтказилган анжуман тадбиркорликни қўллаб-қувватлаш бўйича давлат сиёсатида очиқ мулоқот ва амалий ёндашувлар изчил давом этаётганини намоён этди. Бугун белгиланган устувор йўналишлар бизнеснинг барқарор ўсиши, экспорт ва инвестиция фаоллигининг янада ортиши, миллий брендларнинг халқаро майдондаги иштирокини кенгайтириш ҳамда мамлакат иқтисодий салоҳиятини янада юксалтиришга хизмат қилади.

Telegram l Website l Facebook l Instagram l YouTube l LinkedIn