ЖИЗЗАХ ШАҲРИДА ЗАМОНАВИЙ “BMB BUSINESS MARKAZ” ОЧИЛДИ
 
Ўзбекистон Республикаси Президенти томонидан тадбиркорлик субъектлари учун қулай ишбилармонлик муҳитини шакллантириш, хусусий секторни қўллаб-қувватлаш, инвестициявий фаолликни рағбатлантириш ва ҳудудларда янги иш ўринларини яратиш борасида амалга оширилаётган изчил ислоҳотлар мамлакатимизда тадбиркорлик ташаббусларининг кенгайишига мустаҳкам замин яратмоқда. Яратилган қулай шароитлардан самарали фойдаланган ҳолда, маҳаллий тадбиркорлик субъектлари томонидан замонавий ва истиқболли лойиҳалар амалга ошириляпти.

Жумладан, 2026 йил 28 август куни Ўзбекистон Республикаси Давлат мустақиллигининг 35 йиллиги муносабати билан Жиззах шаҳрида BMB HOLDING томонидан амалга оширилган янги лойиҳа - “BMB BUSINESS MARKAZ”нинг тантанали очилиш маросими бўлиб ўтди.

Тадбирда BMB HOLDING таъсисчиси Азиз Маматқулов, Жиззах шаҳар ҳокими Комил Холмуродов, Ўзбекистон Савдо-саноат палатаси Жиззах вилояти ҳудудий бошқармаси раҳбари Бобур Умрзоқов ҳамда Меҳнат фахрийси Саъдулла Шукуровлар мамлакатимизда тадбиркорликни қўллаб-қувватлаш, хусусий сектор учун яратилаётган кенг имкониятлар ва ҳудудларда амалга оширилаётган инвестиция лойиҳаларининг аҳамияти ҳақида сўз юритдилар.

Қайд этилганидек, “BMB BUSINESS MARKAZ”нинг ишга туширилиши Жиззах шаҳрида бизнес, савдо, хизмат кўрсатиш ва таълим соҳаларини ривожлантириш, аҳолига замонавий хизматлар кўламини кенгайтириш, янги иш ўринларини яратиш ҳамда тадбиркорлик муҳитини янада мустаҳкамлашга қаратилган изчил фаолиятининг навбатдаги амалий натижасидир.

Жиззах шаҳри, Наврўз маҳалласи, Шароф Рашидов кўчаси, 44А-уй манзилида жойлашган “BMB BUSINESS MARKAZ” замонавий архитектура ва кўп функционалликлик тамойиллари асосида барпо этилган. Қурилиши 2025 йил август ойида бошланган мазкур мажмуа 2026 йил август ойида якунланган бўлиб, лойиҳанинг умумий қиймати 27,5 миллиард сўмни ташкил этади. Лойиҳа тўлиқ BMB HOLDINGнинг ўз маблағлари ҳисобидан молиялаштирилган бўлиб, бош пудратчи - “BMB High-Tech” корхонаси ҳисобланади.

Беш қаватли бинода маҳаллий бизнес вакиллари учун барча зарур шароитлар яратилган. Жумладан, юқори тезликдаги интернет ва Wi-Fi, видеокузатув, замонавий иситиш ва совитиш тизимлари, 2 тонна юк кўтариш қувватига эга лифт ҳамда 800 квадрат метрлик автотураргоҳ ташкил этилган.

Лойиҳанинг концепциясига кўра, бизнес-марказда савдо, умумий овқатланиш ва таълим хизматлари бир жойда жамланган. Шунингдек, биринчи босқичда бинонинг пастки қаватларида “BMB Market”, SABER савдо белгиси дўконлари ҳамда “Z BURGER” тез тайёрланадиган овқатланиш тармоғи фаолияти йўлга қўйилган.
Иккинчи босқич доирасида бизнес-марказнинг юқори қаватларида таълим йўналишини қамраб олувчи замонавий ўқув-таълим маркази ҳамда “Book Cafe” ташкил этиш режалаштирилган.

Шуни алоҳида таъкидлаш лозимки, бизнес-марказда замонавий таълим ёндашувлари ва ўқитиш усуллари асосида ёшлар ҳамда аҳоли учун янги билим ва амалий кўникмаларни эгаллашга қаратилган таълим хизматларини йўлга қўйиш кўзда тутилган. Бу эса ҳудудда таълим хизматлари сифатини ошириш, ёшларнинг замонавий касб ва кўникмаларни эгаллаши учун қўшимча имкониятлар яратишга хизмат қилади.

Янги лойиҳанинг ишга туширилиши Жиззах шаҳрида бизнес, савдо, таълим ва хизмат кўрсатиш соҳаларини янада ривожлантириш учун янги имкониятлар яратади. Айниқса, “BMB BUSINESS MARKAZ”нинг босқичма-босқич ривожлантирилиши орқали таълим йўналишининг кенгайтирилиши ёшлар ва аҳоли учун замонавий ўқув хизматларидан фойдаланиш имкониятларини янада оширади.

BMB HOLDING учун ҳар бир янги лойиҳа - халқимиз учун янги имконият, замонавий хизматлар ва янги иш ўринлари яратишга қаратилган муҳим қадамдир.

Telegram l Website l Facebook l Instagram l YouTube l LinkedIn

ЯХШИ ДАМ МЕҲНАТГА ҲАМДАМ!
 
Жорий йилнинг 29-30 август кунлари BMB HOLDING тизимида фаолият юритиб келаётган раҳбар ва ходимлар учун Жиззах вилоятининг сўлим ва бетакрор ҳудудларидан бири - Зомин тоғлари бағрида жойлашган Za’faron Premium Hotel мажмуасига навбатдаги сафар ташкил этилди.
 
Ташрифнинг асосий мақсади ходимларга кундалик иш жараёнидан бироз узилиб, ҳордиқ чиқариш билан бирга, жамоадаги ўзаро муносабатларни мустаҳкамлаш ва корпоратив руҳни оширишдан иборат бўлди. Шу билан бирга, сафарнинг муҳим қисми бўлган teambuilding тамойилларини мустаҳкамлаш, жамоада ўзаро ишонч, ҳамкорлик ва бирдамлик муҳитини кучайтиришга хизмат қилди.
 
Саёҳат давомида самимий суҳбатлар, табиат бағридаги ҳордиқ ва кўнгилочар дастурлар ходимларга иш муҳитидан ташқарида биргаликда вақт ўтказиш ва янги таассуротлар олиш имконини берди. Дам олиш дастурининг ёрқин лаҳзаларидан бири эса ўзбек эстрадаси юлдузлари иштирокида ташкил этилган концерт бўлиб, у барча иштирокчиларга кўтаринки кайфият ва унутилмас таассуротлар бағишлади.
 
Зоминнинг мусаффо ҳавоси, бетакрор табиати ва хушманзара масканлари эса сафарга алоҳида файз бағишлади.
 
Зеро, кучли жамоа - бу фақат бир мақсад сари меҳнат қиладиган ходимлар эмас, балки умумий қадриятлар атрофида бирлашган, бир-бирини қўллаб-қувватлайдиган ва ҳамкорликда юқори натижаларга интиладиган ягона кучдир.
 
BMB HOLDINGда ходимлар ўртасидаги ҳамжиҳатликни ривожлантириш ва соғлом корпоратив муҳитни шакллантиришга қаратилган ташаббуслар муҳим аҳамият касб этади. Зоминдаги ушбу сафар эса ана шу йўналишдаги яна бир мазмунли қадам бўлди.

Telegram l Website l Facebook l Instagram l YouTube l LinkedIn