BMB AGRO ИССИҚХОНАЛАРИДАГИ МАВСУМИЙ ИШЛАР ҚИЗҒИН ПАЛЛАДА

BMB AGRO корхонаси ҳудудидаги иссиқхоналарда сабзавот экинлари кўчатларини етиштириш ва парваришлаш ишлари тизимли равишда олиб борилмоқда. Хусусан, помидор, булғор қалампири ва карам кўчатларининг соғлом ўсиши, ривожланиши ҳамда келгусида сифатли ҳосил олиш учун зарур шароитларни яратишга алоҳида эътибор қаратилган.

Иссиқхоналарда кўчатларни парваришлаш жараёни белгиланган агротехник талаблар асосида ташкил этилган. Жумладан, ўсимликлар учун мақбул ҳарорат ва намлик шароитини таъминлаш, суғориш ишларини ўз вақтида амалга ошириш ҳамда кўчатларнинг ҳолатини мунтазам кузатиб боришга устувор аҳамият берилмоқда. Бу каби чора-тадбирлар кўчатларнинг бир маромда ўсиши ва ривожланиши учун муҳим омил ҳисобланади.

Айни пайтда, парваришлаш жараёнлари соҳа мутахассислари томонидан доимий назорат қилиб бориляпти. Кўчатларнинг ҳолати баҳоланиб, уларни соғлом сақлаш ва ривожланиши учун зарур агротехник тадбирлар ўз вақтида амалга оширилаётир.

Корхонада сабзавот экинларини етиштириш жараёнларини самарали ташкил этиш, агротехник талабларга риоя қилиш ва юқори сифатли маҳсулот олишга қаратилган ишлар изчил давом эттирилмоқда.

Telegram l Website l Facebook l Instagram l YouTube l LinkedIn

БАХМАЛДА ЗАЪФАРОНЧИЛИК: ТАЖРИБА, ИНВЕСТИЦИЯ ВА ҲУДУДИЙ РИВОЖЛАНИШ

Қишлоқ хўжалигида юқори иқтисодий самарадорликка эга экинларни етиштириш, мавжуд табиий-иқлим имкониятларидан унумли фойдаланиш ва янги иш ўринларини яратиш бугунги куннинг долзарб вазифаларидан ҳисобланади.

Бу борада Бахмал туманида йўлга қўйилган заъфарончилик фаолияти мутахассислар, ҳудудий раҳбарлар ва хорижий инвесторлар эътиборини тортмоқда. Бугун BMB HOLDING таркибидаги BMB OPERA ZAFFERANO ҳамда BMB SHIFO корхоналарига Ўзбекистон Республикаси Қишлоқ хўжалиги вазирлиги масъул ходимлари, республикамизнинг 20 дан ортиқ туманлари ҳокимлари, илмий-тадқиқот институтлари вакиллари ҳамда Европанинг бир қатор давлатларидан инвесторлар ташриф буюришди.

Ташриф доирасида меҳмонлар заъфаронни йиғиб олишдан тортиб, тайёр маҳсулот ҳолатига келтиришгача бўлган технологик жараёнларни кузатдилар.

Жумладан, заъфарон гулларини териш, улардан нозик стигмаларни ажратиб олиш ва маҳсулотни қуритиш босқичлари билан танишдилар. Ушбу жараёнлар орқали корхоналарда заъфаронни етиштириш ва қайта ишлаш ишлари қандай ташкил этилгани, маҳсулот тайёрлашдаги ўзига хос жиҳатлар ҳамда ишлаб чиқариш жараёнига қўйиладиган талаблар ҳақида тасаввурга эга бўлдилар.

Меҳмонлар, шунингдек, корхоналарда ходимлар учун яратилган меҳнат шароитлари ва ташкил этилган иш ўринлари билан қизиқдилар.

Ташрифнинг муҳим йўналишларидан бири заъфарончиликнинг ҳудуд аҳолиси бандлигини таъминлашдаги аҳамиятини ўрганишдан иборат бўлди.

Айниқса, тоғолди ҳудудларида жойлашган туманлар раҳбарлари Бахмалнинг табиий-иқлим шароитларига яқин бўлган ҳудудларда мазкур экинни етиштириш имкониятларига алоҳида эътибор қаратдилар.

Бу орқали мавжуд тажрибани бошқа ҳудудларда қўллаш истиқболлари ҳамда заъфарончиликни ривожлантириш учун зарур шарт-шароитлар хусусида фикр алмашилди.

Мазкур ташриф Бахмал туманида шаклланган заъфарончилик тажрибасини ўрганиш ва унинг имкониятларини кенгроқ тарғиб этиш нуқтаи назаридан аҳамиятлидир.

Хорижий инвесторлар, соҳа мутахассислари ва ҳудудий раҳбарларнинг ушбу йўналишга қизиқиши заъфарончиликни ривожлантириш, янги лойиҳаларни амалга ошириш ҳамда тоғолди ҳудудларининг қишлоқ хўжалиги салоҳиятидан самарали фойдаланиш учун муҳим замин яратади.

Бахмал тажрибаси эса табиий имкониятларни ишлаб чиқариш билан уйғунлаштириш орқали ҳудудий тараққиётга ҳисса қўшиш мумкинлигини кўрсатади.

Telegram l Website l Facebook l Instagram l YouTube l LinkedIn

БАХМАЛ ЗАЪФАРОНИ - МИЛЛИЙ БРЕНД ВА ИҚТИСОДИЙ ИМКОНИЯТ

Бахмал туманидаги BMB HOLDING таркибига кирувчи BMB OPERA ZAFFERANO ҳамда BMB SHIFO корхоналарида заъфароннинг оммавий терим мавсуми бошланди. Эрта тонгдан маҳаллий аҳоли ва мавсумий ишчилар заъфарон экилган қир ва адирликларга йўл олади.

Қуёшнинг заррин шуълалари остида гулларга бурканган майдонларда қизғин меҳнат бошланади. Ҳар бир гулни эҳтиёткорлик билан териб олиш, табиатнинг ноёб неъматини нобуд қилмасдан йиғиш ва унинг сифатини сақлаш теримчилардан катта маҳорат ҳамда масъулият талаб этади.

Заъфарон теримидаги энг муҳим жараёнлардан бири - гул ичидаги қимматбаҳо қизил стигмаларни ажратиб олишдир. Териб келинган гуллар сараланиб, улардан нозик толалар қўл меҳнати ёрдамида эҳтиёткорлик билан ажратилади. Шундан сўнг маҳсулот белгиланган талаблар асосида қуритилиб, сифати сақланган ҳолда қадоқлаш босқичига ўтказилади.

Теримдан тортиб тайёр маҳсулот ҳолига келгунга қадар давом этадиган ушбу жараёнларнинг ҳар бирида пухталик ва аниқлик муҳим аҳамият касб этади. Зеро, заъфароннинг қиймати унинг сифати, хушбўйлиги ва тайёрлаш технологиясига бевосита боғлиқ.

Айни мавсумнинг бошланиши ҳудуд аҳолиси учун ҳам қўшимча имкониятлар эшигини очмоқда. Заъфарон гулларининг очилиши ва терим ишларининг жадаллашиши муносабати билан корхоналарда кўплаб мавсумий иш ўринлари яратилди.

Бу эса маҳаллий аҳолининг бандлигини таъминлаш, оилалар даромадини ошириш ва уларнинг иқтисодий фаровонлигини юксалтиришга хизмат қилади. Айниқса, қишлоқ жойларда мавсумий меҳнат орқали қўшимча даромад топиш имконияти аҳоли учун муҳим аҳамиятга эга. Шу тариқа заъфарон етиштириш нафақат қишлоқ хўжалиги тармоғини ривожлантирмоқда, балки ҳудудда янги иқтисодий имкониятларни ҳам шакллантиряпти.

Бугунги кунда заъфарон юқори қиймати ва халқаро бозордаги талаби билан ажралиб турадиган экспортбоп қишлоқ хўжалиги маҳсулотларидан бири ҳисобланади. BMB HOLDING таркибидаги корхоналарда амалга оширилаётган ишлар ушбу ноёб маҳсулотни етиштириш, қайта ишлаш ва ташқи бозорларга етказиб бериш имкониятларини кенгайтиришга хизмат қилмоқда.

Заъфароннинг миллий бренд сифатидаги нуфузини мустаҳкамлаш, унинг рақобатбардошлигини ошириш ва экспорт салоҳиятидан самарали фойдаланиш орқали мамлакат иқтисодиётига ҳам муносиб ҳисса қўшиш мумкин.

Бахмал туманида бошланган заъфарон мавсуми эса баракали ҳосил, янги иш ўринлари ва аҳоли фаровонлиги билан бир қаторда, туман иқтисодий тараққиёти учун ҳам муҳим омил бўлиб хизмат қилади.

Telegram l Website l Facebook l Instagram l YouTube l LinkedIn