សេចក្ដីជូនដំណឹងជាសាធារណៈ ពីក្រុមហ៊ុន ប៊ុកឃីអន ( BOOKEYOND CO.,LTD.)

ក្រុមហ៊ុន ពិតជាសោកស្ដាយណាស់ចំពោះទង្វើអសីលធម៌របស់បុគ្គលគ្មានវិជ្ជាជីវៈដែលបានបំពានច្បាប់អាជីវកម្ម និងប្រព្រឹត្តបទល្មើសប្រឆាំងនឹងបច្ចេកវិទ្យា។ កាលពីមុន មានមនុស្សមួយក្រុមបានលួចយកសៀវភៅសម្លេង និងមាតិកាមួយចំនួនរបស់អេបក្រុមហ៊ុនប៊ុកឃីអនទៅកែកុនបន្តិចបន្តួច ហើយដាក់ចូលទៅក្នុងអេបរបស់ពួកគេ ហើយឥឡូវនេះស្រាប់តែមានជនមួយក្រុមទៀត បានលួចយក និងចែកចាយសៀវភៅសម្លេងដែលជាកម្មសិទ្ធិពេញច្បាប់របស់ក្រុមហ៊ុនប៊ុកឃីអនយ៉ាងអាណាធិបតេយ្យនៅក្នុងបណ្តាញសង្គមនានា ក្នុងគោលបំណងក្តិចត្រួយបំផ្លិចបំផ្លាញសមិទ្ធផលរបស់ក្រុមហ៊ុនតែម្តង។ ទង្វើដែលជនទាំងនោះបានធ្វើចំពោះក្រុមហ៊ុនប៊ុកឃីអននៅពេលនេះ គឺជាទង្វើខុសច្បាប់ ជាទង្វើអសីលធម៌ និងជាគម្រូដ៏អាក្រក់មួយដែលមិនគួរណាវាបានកើតឡើងក្នុងសង្គមអ្នកផ្តល់ចំណេះដឹងរបស់យើងទាល់តែសោះ។

យើងខ្ញុំជាក្រុមការងារក្រុមហ៊ុនប៊ុកឃីអន សូមបញ្ជាក់ថា សម្លេង ឬសៀវភៅដែលផលិតដោយក្រុមហ៊ុន ពុំមានផ្សព្វផ្សាយតាមបណ្ដាញសង្គមនានាឡើយ(មានតែនៅក្នុងអេប bookeyond) ហើយយើងខ្ញុំសូមបដិសេធរាល់ការចែកចាយរាល់សៀវភៅជាសម្លេង ឬជាអត្ថបទតាមបណ្ដាញសង្គមនានាទាំងស្រុង ពីព្រោះមិនមែនចែកចាយដោយក្រុមការងារយើងឡើយ។